5
1 Thuasalama uteno hae, accyh te kumvaelori kong tuh nae kalan zei ho vae khyh.
2 Pawccecize Bawipaw Nin tuh khuazi e miruh hawte nynh yn thua cih cipaw kha naemaw nynh ccaerarih lan na ny oh.Ref 5.2: Mat 24.43; Luk 12.39; 2Pe 3.10
3 “Daenaw te khynnaw a um,” a ci lya hae khe, ccaaw a poipaw nopinung tungvaw neitangia nynh a thuanua hawte, minmin tungvaw ronaw nynh vaekheihmawte oun thuanua cih hae zah minmin tuh lue lan khyh hae.
4 Thuasalama uteno hae, nanning tuh mohnaw kya na um khyh oh keiccuze tuh-e Nin nynh miruh hawte yn thuapaw kha na siikuh lan khyh oh.
5 Nanning balyn tuh awnaw ccaaw hae te khuadae ccaaw hae nynh na thua oh; aening tuh khuazi ccaaw hae te mohnaw ccaaw hae ah thua khyh oh.
6 Tukeiccuze ming hae nynh a i hae hawte ih nan oh sih, aening tuh raeringkuh oh sih lah, hawrarih lan um oh sih.
7 Pawccecize a ih hae paw tuh khuazi nynh a i hae, a rui hae paw mah khuazi nynh a rui hae.
8 Thuasalama aening tuh khuadae te ah seku oh keiccuze hawrarih lan um oh sih, zynnaw te sungsakunaw kya-e bykhaw khate ccaankuh oh sih lah, khumnaw kya-e ngaehoinaw sivawlukhung kha khungkuh oh sih.Ref 5.8: Isa 59.17; Efe 6.13-17
9 Pawccecize Pachia nynh a thinrianaw kha teing khylan aening kha oun paccyn khyh; ah Bawipaw Jesu Khri liate khumnaw mue khylan nynh oun paccyn.
10 Aening tuh ah thaeku oh zemah, ah i oh zemah, amaw ryte umkheih khylan, Khri tuh aening hanlan a chih.
11 Tukeiccuze na cyimae oh hawte thawzung pyakuh kalang oh lah, lu kheit te lu kheit tynsakuh oh.
Nyathya Hyynaw te Beihlangnaw
12 Uteno hae, nae kya ryalahtu hae, Bawipaw kya ae cciakhae oh paw te ae thuihei oh paw kha saw la tua oh cite kae ngia oh;
13 mih ryalaw keiccuze minmin kha myarya sawtua oh lah sungsah oh. Naemaw te naemaw ccawkute la um oh.
14 Uteno hae, nanning kha kae ngia oh; mih thawnaw hae paw kha raeringnaw la pya oh, lungthawzya hae paw kha thawzung la pya oh, thawzya hae paw kha la bawm oh, ccungccaw miakaw kya nae lung la sae sah.
15 Hum nynh sanmah lukhakheit tungvaw hoyleinaw kha hoyleinaw te a liaru khyh nawlan raeringkuh sah, naemaw te naemaw kya thuasah, ccungccaw balyn kya thuasah ahoypaw kha rae lan zuakuh zungzae oh.
16 Zungzae nae lungtua sah.
17 Apaekuh lei lan sawsang oh.
18 Atyn-are kya lungtuabya ho oh; pawccecize tuh-e tuh Khri Jesu kya nae hanlan Pachia rynaw nynh thua.
19 Thyaa Muisaw kha daesah nan oh.
20 Profehbya honaw kha pawlangria leite um nan oh.
21 Pawpaw balyn kha syntawtua oh lah, ahoypaw kha tynkaring lan kyngkuh oh;
22 ahoy leipaw miakaw kha sibia oh.
23 Daenaw Pachia amaw ccaccei nynh nanning kha marya ae la thyaasah vae oh sah; ah Bawipaw Jesu Khri yn thua te, nae muisaw, nae thinlung te nae pyn kha abalynte ccaenaw um lei lan ae la nung vae oh sah.
24 Nanning ae kotu oh paw tuh a lungzipaw thua zah, tuhcite a cyih cih.
25 Uteno hae, kaening hanlan saw oun la sangpah oh.
26 Uteno hae balyn kha athyaapaw myngkunaw khate bya la beih oh.
27 E ccaky hynh uteno hae balyn kha la riapah oh cite Bawipaw liate kae nynh bya kae tawsya oh.
28 Ah Bawipaw Jesu Khri thawccinaw tuh nae kya la um vae sah.