4
Pachia Lungrypaw Hiinnaw
1 Nyathyakou, uteno hae, nanning nynh pawtemou hiin lan accan, Pachia kha pawtemou a lungrythuasah lan accan cipaw kha kae kyate na ccangku vae oh hawte, tuhcite houhouh na hiin nawlan oh, Bawipaw Jesu min te kae ngia oh zah kae hyy oh.
2 Pawccecize Bawipaw Jesu liate pawcihawpaw kawbya hae mou kae pya oh cipaw kha na ny oh.
3 Pawccecize Pachia nynh a rypaw tuh na thyaa lan oh paw kha nynh thua: nanning nynh ohhuakunaw kha na sungku nawlan oh,
4 nanning milu raveih nynh nae pyn kha athyaapaw te sawtuapaw athua nawlan pawtemou sungku lan cipaw na ny nawlan oh,
5 Pachia nyh leipaw Zenta hae hawte myarya ohhuaku rynaw thinlung kha hoi leite,
6 hynh-e kong kya hum nynh sanmah a uno kha hynpyate a sei khyh nawlan Pachia nynh a ry. Pawccecize kaening nynh kae hopah vae oh zah raeringnaw hoyte kae pya vae oh hawte, Bawipaw tuh tuhcihawpaw uccaw balyn hanlan liarutu nynh thua.
7 Pawccecize Pachia nynh aening kha athyaa leipaw kalan ko leite athyaapaw kalan nynh oun ko.
8 Tukeiccuze hynh-e ccangpyanaw a eipaw tuh ccungccaw ccangpyanaw kha a eipaw thua leite, a Thyaa Muisaw ae pyatu oh paw Pachia ccangpyanaw kha a eipaw nynh thua.
9 Thuasalama uteno sungsakunaw konglang te lukhakheit nynh nae kalan zei ho vae khyh, pawccecize Pachia nynh naemaw ccaccei kha lu kheit te lu kheit sungsaku lan ae ccangpya vae oh.
10 Mesidonia ram kya umpaw uteno hae balyn kha tuhcite na sungsah ccaccing vae oh. Thuasalama uteno hae, tuhlaeze houh ahoy lante na hiin nawlan oh kae ngia oh.
11 Kae hopya vae oh hawte, daebabi lan na umthya nawlan oh, nae ryalaw kha pekikute, nae kuih te na lawku nawlan oh kae ngia oh;
12 atolang e ccungccaw hae kya kou ngaekuh lante na hiin nawlan oh te ming hae kha na ngaehoiku khyh nawlan oh kae ngia oh.
Bawipaw Rungnaw
13 Uteno hae, ngaehoinaw a hoi leipaw mingccang hae nynh mih ngaethya hawte nae ngaethya khyh nawlan a chih hae paw konglang kha ny leite na um lan oh paw ka ry khyh.
14 Pawccecize Jesu tuh chih zah a thoothui cite ah zyn oh ze, tuhawte Jesu kya a chih hae paw kha amaw ryte Pachia nynh a cciakhae cih hae.
15 Kaening nynh Bawipaw bya liate e hynh kae hopya oh: Bawipaw yn thua cia ah hiinhy oh paw aening nynh a chih vae hae paw kha laan ah thoih lan khyh oh.Ref 4.15-17: 1Ko 15.51-52
16 Pawccecize Bawipaw amaw tuh kawpyanaw roi, vaaw hae lakuze lupi athuapaw roi te Pachia mungkae roi ryte vaawlang te yn rungbung cih. Tetuh Khri kya a chih hae paw tuh masaty oun tho cih hae.
17 Tukoute ah hiinhy oh paw aening tuh vaawlang kya Bawipaw te tungku khylan minmin ryte pynkheihlan maeking kya hangthung ah thua cih oh, tetuh Bawipaw ryte zungzae umkheih lan vae.
18 Tukeiccuze hynh-e bya hae hynhte lu kheit te lu kheit thawzung la pyakuh oh.