THESALON HAE
KALAN PAUL CCAKY KYKHEITNAW
Thessalonians
Thesalon hae kalan Paul Ccaky Kykheitnaw hynh tuin kya-e Khriccaaw hae thawpyanaw te lungthang leite atyn kho nawlan hae zeipaw nynh thua. Mih zynnaw te sungsahnaw konglang a thae vae ze a luung hae. Mih kya a um lyaze a hiinzia bua a liathuisah hae, te Khri rungnaw konglang Khriccaawbuu kyate a poupaw kha a phipya hae: Khri rung maw kya a chih hae paw zyntu hae hynh oun rung vae hae ze zungzae hiinnaw lungkhu kya a umbua cih hae tou? Hohtuhmou Khri yn rung cih? Khri rungnaw ngaehoite na ngaw lya oh hynh daebabi lan nae rya hynh lawkuh oh, cite Paul nynh a cipya hae.
1
Beihlangnaw
1 Paul, Silas te Timote nynh Paaw Pachia te Bawipaw Jesu Khri kya a umpaw Thesalon khua e khriccaawbuu kalan ccaw kae ky oh. Thawccinaw te daenaw tuh nae kya la um sah.Ref 1.1: Loc 17.1
Thesalon hae Zynnaw te Hiinnaw
2 Nanning balyn hanlan Pachia kalan lungtuabya palei kae ho zah kae sawsangnaw kya nanning kha palei kae hobia oh.
3 Ah Paaw Pachia malang nae zynnaw te asekuhpaw nae ryalawnaw, sungsakunaw hoite na zuakunaw oh te ah Bawipaw Jesu Khri kya atynpaw nae ngaehoinaw kha tyty kae liathui.
4 Pachia nynh a sungsahpaw uteno hae, amaw nynh nanning kha ae po vae oh cipaw kae ny.
5 Pawccecize kaening kya-e thehoypaw tuh bya kyalya te thua leite, thungnaw te Thyaa Muisaw te ny ccaccingnaw te nynh yn thua; nae kya kae um lyaze kaening tuh nanning hanlan pawcihawpaw ccungccaw hae nynh kae thua cipaw kha na ny oh.
6 Nanning tuh vawsawnaw patae na teing oh zemah Thyaa Muisaw kyate yn thuapaw lungtuanaw khate Pachia bya kha na lawkuh oh zah, kaening thydokuh hae paw te Bawipaw thydokuh hae paw nynh na thua oh.Ref 1.6: Loc 17.5-9
7 Tukeiccuze Mesidonia ram te Akhai ram kya umpaw zyntu hae balyn hanlan nanning tuh dosuinku lan um hae paw nynh na thua oh.
8 Pawccecize nanning kyate Bawipaw bya roi tuh Mesidonia ram te Akhai ram kya kyalya ccae khyh, Pachia na zynnaw oh paw tuh hmin takyh kya mah pong zeihkuh vae, tukeiccuze kaening nynh paw sanmah kae ho ho vae khyh.
9 Pawccecize kaening nynh nae kalan pawcihte nynh kae tee cipaw kaening kong kha tuin ram kya-e ccungccaw hae nynh a ho hae, te a hiinpaw te ahmepaw Pachia kha ryalawpya khylan zohtuh hae kyate Pachia kalan pawcihte nynh na paleihku oh cipaw kha thuasah,
10 yn thua lanpaw thinrianaw kyate aening kha yn luesahtupaw Jesu, Pachia nynh chinaw kyate a thoosahpaw, vaawlang kyate yn thua cih paw a Ccapaw ngaw lanpaw kha thuasah a ho hae.