44
Banang Azo
1 Oute Josef nynh a inn kya ryalahtupaw kha, “Minmin nynh a phu kho hae thyhte mih sungkua kya looh kha phe beih lan ruinpah hae lah mih phua raveih kha mih sungkua raveih kya sangpah hae.
2 Asoi huapaw kya-e sungkua kyakhe ngun banang te looh mee lang yn phupaw phua kha sangpah,” a cipya. Te Josef nynh a hopya thyhte aning nynh a cyi.
3 Awkhua he yn aw tuh mih lann hae ryte minmin kha a cciasah vae hae.
4 Minmin nynh khua kyate eih asaw leinaw cia he a cceih hae khe, Josef nynh a ryalawpahtupaw kha, “Cceih lah minmin kha la deehui hae; he na phah hae te minmin kha, ‘Pawcce ahoypaw kha ahoy leipaw te nae liaru oh? Pawcce ka ngun banang kha na ru oh?
5 E hynh ka bawipaw nynh a nianawpaw banang thua khyh tou? Malang yn cyihkuh lanpaw kha ny nawlan a mangpaw banang thua khyh tou? E na cyi oh paw hynh phe na sei oh,’ cite la hopah hae,” a cipya.
6 Aning nynh minmin kha he a phah hae tuh khah-e bya kha a hopya hae.
7 Minmin nynh, “E bya hynh bawipaw nynh pawcce a ho? Tuhte cyi lanpaw tuh na see hae nynh tua mah kae tua boi khyh!
8 Kae sungkua kya kae muihpaw phua kha Kanaan ram kyate namaw kalan phe kae kikhae vae; na bawipaw inn kya-e sui thuasah, ngun thuasah, pawcce kae ru lanpaw tuh?
9 Na see hae lukhakheit kyakhe tuh-e uccaw kha muih athua zetuh, tuh-e paw tuh chihsah; tuhpiaze tuhlaepaw kaening balyn hynh bawipaw see lang kae tang cih,” a cipya hae.
10 Aning nynh, “Na ho oh hawte thuasah; amaw kya banang muih athuapaw tuh ka see lang a tang cih, thuasalama tuhlaepaw tuh na la cceih cih oh,” a ci.
11 Oute minmin nynh mih sungkua raveih kha laephi kya nyakuh hae zah mih sungkua kha a phou hae.
12 Aning nynh atawccaw kyate asoi huapaw kyacia he ccung tuh, banang kha Benjamin sungkua kya a muih.
13 Minmin nynh mih ngaethah zah mih uccaw kha a sei hae. Te mih lann raveih tungvaw khe mih uccaw kha khang hae zah khua lang a ki vae hae.
14 Judah te a uno hae tuh Josef innvaw a la um lyakhe oun thua hae; te minmin nynh Josef malang a bakhung hae.
15 Josef nynh, “Pawcce hynhte na cyi oh? Kae tahawpaw ccungccaw nynh tuh malang yn cyihkuh lanpaw kha phe a ny kho cipaw na nyh khyh oh tou?” a cipya hae.
16 Te Judah nynh, “Bawipaw, namaw kya pawmou kae ho kho cih? Kaemaw kong kha pawtemou ccaerarih lan kae hopah thya cih? Pachia nynh na see hae seinaw kha phe muih vae; kaening tuh a uccaw kya banang muih athuapaw ryte ka bawipaw see hae nynh kae thua,” a cipya.
17 Josef nynh, “Tuhte ka cyih lan khyh, a uccaw kya banang muih athuapaw ccungccaw rou nynh ka see lang a tang cih; thuasalama nanning tuh nae paaw kalan daetedae lan la cceih oh,” a cipya.
Judah nynh Benjamin Lue nawlan A Ngia
18 Oute Judah nynh amaw kalan naekuh zah, “Pou ka bawipaw, na seepaw kae nynh ka bawipaw na nakaring kya bya kaw kheit beih kae hopah lah na seepaw tungvaw na thinria nan sah; pawccecize nang tuh Faro te na lae khyh oh.
19 Bawipaw, nang nynh kaening kha, ‘Nae paaw na hoi oh tou? Nae neitaw na hoi oh tou?’ cite nae khia.
20 Te kaening nynh, ‘A taw vae paw paaw kae hoi, te kae paaw nynh a kum phe tang te a saahpaw imua, kae neitaw lu kheit kae hoi. A upaw tuh phe chih vae; a nung nynh a saah hae paw ccaaw hae kyaze amaw makhae nynh a um vae, tukeiccuze a paaw nynh myarya a sungsah,’ cite ka bawipaw kha kae hopya.
21 Te nang nynh na see hae kaening kha, ‘Tuh-e paw tuh ka muihtua ccaw, ka kalan oun cciakhae oh,’ nae cipya.
22 Kaening nynh, ‘Imuapaw nynh a paaw kha phiakuh kho lan khyh, pawccecize aning nynh a paaw kha a cciataw zetuh a paaw tuh a chihsei cih,’ cite kae hopya.
23 Oute nang nynh, ‘Nae neitaw asoi huapaw yn cciabua khyh zetuh ka mitmae kha nae muih vae lan khyh oh,’ cite na see hae kaening kha nae cipya.
24 Kaening nynh na seepaw kae paaw kalan kae ki zah ka bawipaw na bya kha kae hopya.
25 Te kae paaw nynh, ‘Bua la cceih oh lah aening hanlan looh beihtaraw kha oun re oh,’ cite oun hopah zah
26 kaening nynh, ‘Kae cceih kho lan khyh, kae neitaw asoi huapaw a cciabua ze rou nynh kae cceih cih; pawccecize kae neitaw asoi huapaw a cciabua khyh zetuh khah-e paw a mitmae kha kae muih kho lan khyh,’ kae cipya.
27 Oute na seepaw kae paaw nynh, ‘Ccapaw lu ning kha ka zu nynh yn saahpya cipaw phe na ny oh;
28 lu kheit tuh phe yn cciataw vae, amaw kha saw nynh zoihtatyh lan phe a pae ccaccing vae cite ka ci; tuin kyate amaw kha ka muih boi vae khyh.
29 E lu kheit hynh mah kamaw kyate na cciakhae oh zah vawsawnaw a tungsei zetuh nanning nynh ka sang phe paw vae paw hynh ngaethyanaw te michi khua lang nae cciasah sei cih oh,’ oun cipya.
30 Tukeiccuze kae nynh imuapaw leite na seepaw ka paaw kya ka thua zetuh ka paaw hiinnaw tuh imuapaw hiinnaw kya akyngkuhpaw thua zah
31 imuapaw nynh kaemaw kya a umbua khyhpaw kha ka paaw nynh he a muih tuh a chih vae cih; te na see hae kaening nynh a sang phe paw vae paw, na seepaw kae paaw kha ngaethyanaw te Michi khua lang kae cciasah sei cih.
32 Te na seepaw kae nynh, ‘Imuapaw hynh ka paaw kalan bua kae kikhae khyh zetuh ka paaw malang seiphusahnaw kha ka hiin lungkhu ka ing vae sah,’ cite ka hopya keiccuze kae tuh ka paaw kya imuapaw hanlan aamahkhan nynh ka thua.
33 Tukeiccuze na seepaw kae hynh imuapaw ccelang namaw kya see lang beih kae tangsah lah imuapaw hynh tuh a upaw hae ryte la kibua sah.
34 Pawccecize imuapaw leite pawtemou ka paaw kalan ka ki ngan cih? Ka paaw nynh a tung lanpaw teingnaw kha muih lan ka rih,” a ci.