41
Josef nynh Faro Maan A Leih
Kum ning he aro koute Faro nynh maansah zah a maan kyaze Nal vawpi pe khe a la thadyn, te puithya zah athopaw vaetua sa sari tuh vawpi lungkhu te oun pou hae zah vawkhu kin umpaw lonua kha a boukuh hae. Tukoute a muinthah zah angethahpaw vaetua sa sari tuh Nal vawpi kyate oun pou hae zah Nal vaw kin kya umpaw masaty e vaetua hae pe khe a la thadyn hae. A muinthah zah angethahpaw vaetua hae nynh puithya zah athopaw vaetua sa sari kha phe ae hae. Te Faro tuh luih a thaekuh. Oute Faro nynh ih zah vaeningnaw maan a sah; a maan kyaze accan le zah ahoypaw loohku kya-e avui vui sari tuh ku kheit kyate a lethung hae. Accan dih zah nithua lang e khisan keiccuze asipaw loohku kya-e avui tuh vui sari a vui hae. Te accan dihpaw looh avui hae nynh accan le zah ahoypaw looh avui vui sari kha phe a laang hae. Faro nynh he thaekuh tuh a maan nynh thua cipaw a ny. Khua he yn dae te, Faro tuh a lungriathae; tukeiccuze Izip ram e mitleihthya hae paw te ahaw hae paw balyn kha kosah hae zah Faro nynh a maan kha a hopya hae, thuasalama Faro maan kha a leihpah khopaw lu kheit sanmah um khyh hae.Ref 41.8: Dan 2.2
Oute banang kyngtu bawi nynh Faro kha, “Ka seinaw kha atunin ka nykuh cih. 10 Vaekheit tuh Faro nynh a ryalawpahtu hae tungvaw a thinria zah kae te sanlou raetu bawi kha inn rintu bawi a inn kya-e thonginn kyakhe yn nung. 11 Kae te aning nynh zi kheit lungkhu kaemaw raveihte asuilan umpaw maan kha kae sah. 12 Tuin kya kaening ryte inn rintu bawi a seepaw Hebru ccangvaepaw a umbua. Kae maan kha kae hopah zah kae maan raveih thyhte yn leihpya. 13 Maan yn leihpya thyhte phe accing; kae nynh langmaw ka ryalaw kha bua ka mue zah sanlou raetupaw kha tuh theih zah a sae,” a ci.
14 Oute Faro nynh Josef kha kosah hae zah Josef tuh thonginn kyate arangte a cciakhae hae. Josef nynh a khawming kha ngokuh zah uccaw a liakuh koute Faro kalan a tee. 15 Te Faro nynh Josef kha, “Maan ccangkheit ka sah zah a leih khopaw lu kheit sanmah um khyh. Maan kha he na thae ze phe na leih kho cipaw ka thae,” a ci. 16 Josef nynh Faro kha, “E tuh kamaw cyi khonaw thua khyh, Pachia nynh nang kha ahoypaw maan asuilan ae pya cih,” a cipya. 17 Tukoute Faro nynh Josef kha, “Ka maan kyaze Nal vawpi kin khe ka la thadyn; 18 te puithya zah athopaw vaetua sa sari tuh Nal vawpi lungkhu te oun pou hae zah vawpi kin kya popaw lonua kha a boukuh hae. 19 Tuh-e vaetua hae malang khe a muinthah zah angethahpaw ccangpaw vaetua sa sari tuh oun pou hae, tuhte amuinthahpaw vaetua hae tuh Izip ram balyn kya ka muih boi khyh. 20 Muinthah zah angethahpaw vaetua hae nynh masaty e athopaw vaetua sa sari kha phe a ae hae, 21 thuasalama he a ae kou hae te, phe a ae vae hae cipaw kha humhung nynh mah nyh khyh, pawccecize minmin tuh atakaw lya hawte mih muinthah mamin. Tukoute luih ka thaekuh vae. 22 Vaeningnaw ka ih zah ka maan kyaze accan le zah ahoypaw loohku kya-e avui vui sari tuh ku kheit kya a lethung hae, 23 tukoute accan dih zah nithua lang e khisan keiccuze asipaw avui vui sari tuh a vui hae; 24 te accan dihpaw avui hae nynh accan hoypaw vui sari hae kha phe a laang hae. Tuh-e tuh mitleihthya hae paw kya ka hopah hae zah yn leihpah khopaw lu kheit sanmah um khyh,” a ci.
25 Oute Josef nynh Faro kha, “Na maan hae tuh phuin kheit thua zah phe lokuh hae; Pachia nynh a cyi lanpaw kha namaw kya ae langsapyaku vae. 26 Ahoypaw vaetua sa sari tuh kum sari thua zah ahoypaw looh avui vui sari tuh mah kum sari cipaw nynh thua; na maan hae tuh ccangkheit nynh thua hae. 27 Nulang te oun pou hae paw vaetua a ngethah zah a muinthah hae paw tuh kum sari cipaw nynh thua. Nithua lang e khisan keiccuze asipaw looh avui vui sari tuh mah ccakannaw kum sari cipaw nynh thua. 28 Phe kae hopya vae hawte nynh thua; Pachia nynh a cyi lanpaw kha namaw kya ae muihsah. 29 Izip ram balyn kya kum sari lungkhu myarya loohvoi cih. 30 Tukoute ccakannaw kum sari yn thua cih zah Izip ram kya loohvoinaw balyn kha phe oun ning cih hae; te ccakannaw nynh ram kha yn roh cih. 31 Oun thua cih paw ccakannaw tuh myarya yn ccih cih keiccuze ram lungkhu looh a la voi boi paw kha oun nyh vae lan khyh hae. 32 Vae ning maan na sahpaw asuilan tuh, e uccaw hynh Pachia nynh phe a khyade vae paw thua zah Pachia nynh taloi yn cyih vae cih cinawpaw nynh thua. 33 Tukeiccuze nang nynh a thya a hawpaw pise lu kheit kha na po cih zah Izip ram a uktu lang na nung cih. 34 E ram kya bawi hae kha na khang cih hae zah kum sari loohvoi lungkhu Izip ram kyate a poupaw pum pangaw pum kheit kha na khoisah cih hae. 35 Minmin nynh oun thua cih paw ahoypaw kum sari kya-e looh kha ccakhung hae sah lah Faro kawhoinaw zakaw khe nung hae sah. Khuapi kya looh kha suelua hae sah lah phang ccy hae sah. 36 Tuh-e looh tuh Izip ram lungkhu yn thua cih paw ccakannaw kum sari lungkhu ae lan ram hanlan nungdaepaw athua cih zah ccakancci lungkhu ram tuh roh vae lan khyh,” a ci.
Josef tuh Uktu lang A Tang
37 Tuh-e bya nynh Faro te a ryalawpahtu balyn kha mih lung a pawsah. 38 Faro nynh a ryalawpahtu hae kha, “Pachia muisaw nynh a umkhaepaw ccangpaw lukhakheit, e ccungccapaw tahawpaw hynh ah muih kho ung cih oh tou?” a ci. 39 Tukeiccuze Faro nynh Josef kha, “E balyn hynh Pachia nynh nang kha ae muihsah vae keiccuze nang hawte a thya a hawpaw lu kheit sanmah um vae lan khyh. 40 Nang tuh ka inn uktu na thua cih zah ka ccungccaw hae nynh na bya kha a ngae cih hae; siapharan tungkhung kya ka dahungpaw kyalya hynh nynh nang laeze ka lehuanawpaw athua cih,” a ci.Ref 41.40: Loc 7.10 41 Te Faro nynh Josef kha, “Nang kha Izip ram balyn a uktu lang kae nung vae,” a cipya. 42 Faro nynh a tazeih kuihpu kha khahkuh zah Josef kuih kya a pusah; myarya hoypaw boeining kha lawsakuh zah suisi kha a oisah.Ref 41.42: Dan 5.29 43 Te siapharan nynh ccangningnaw umpaw a marangle kha ccisakuh zah minmin nynh Josef malang khate, “Nae ccukharutung oh,” cite a sia hae. Tuhcite Faro nynh Izip ram balyn kha a uksah. 44 Tuhpiaze Faro nynh Josef kha, “Kae tuh Faro siapharan nynh ka thua, Izip ram balyn kya na kaw leite humhung nynh mah a kuih a ccu hang lan khyh,” a cipya. 45 Faro nynh Josef kha Zafenath-paneah cite min a phu; te On khua e ranpibawi Potifera ccanung Asenath kha Josef zu lang a pya. Tuhcite Josef tuh Izip ram balyn kha uknaw kaw a mue. 46 Josef nynh Izip siapharan Faro kya ryalaw he a tee lya tuh kum sung thum he acih. Te Josef nynh Faro umnaw kyate pou zah Izip ram balyn kya khua a ccung. 47 Kum sari loohvoi lungkhu laephi nynh looh myarya lung lan a pousah.
48 Izip ram kya looh patae he avoi tuh Josef nynh kum sari lungkhu e looh balyn kha suelua zah khua hae kya a ccakhung; khua pepan umpaw loo hae kya-e looh hae kha khua takyh kya a ccakhung. 49 Josef nynh looh kha rili kya-e laesia hawte myarya alung lan ccakhung zah tou kho um lei lan alung keiccuze tou mah tou vae khyh.
50 Ccakanccinaw a thua mawkhe Josef nynh On khua e ranpibawi Potifera ccanung Asenath te ccapaw lu ning a saah hae. 51 Josef nynh atawccaw kha Manassehnote41.51 Manasseh cipaw hynh Hebru bya kyaze ningsah cite roi apoupaw te nynh aloku. cite min a phu, “Pawccecize Pachia nynh ka vawsawnaw balyn te ka paaw inn balyn kha phe yn ningsah vae,” a ci. 52 Ccapaw lu ningnaw kha Efraimnote41.52 Efraim cipaw hynh Hebru bya kyaze ccaaw pya cite roi apoupaw te nynh aloku. cite min a phu. “Pawccecize vawsaw ka tungnaw ram kyakhe Pachia nynh yn pungzaesah vae,” a ci.
53 Izip ram kya loohvoi kum kumsari tuh yn thang vae; 54 Josef nynh a la ho hawte ccakanccinaw kum sari tuh yn thua vae. Ram takyh kya ccakan accih, thuasalama Izip ram balyn kya tuh looh a um.Ref 41.54: Loc 7.11 55 Izip ram balyn kya ccakan he yn ccih tuh ccungccaw hae nynh looh mue khylan Faro kalan a sia hae. Faro nynh Izip hae kha, “Josef kalan cceih oh lah ae hopya oh paw kha cyih oh,” a cipya hae.Ref 41.55: Joh 2.5 56 Te ccakannaw nynh ram balyn kya pong alekuh tuh Josef nynh looh a ccakhungnawpaw ccunginn balyn kha pong hungpah hae zah Izip hae kha a zuapya hae, pawccecize Izip ram kya myarya ccakanccih. 57 Tuhpiaze laephi vawlan e ccungccaw balyn nynh looh re lan Izip ram e Josef kalan a cceih hae.