35
Jakob Bethel lang Bua A Ki
1 Pachia nynh Jakob kha, “Thokuh, Bethel lang cceihthung lah, tuin kya khuasah. Na upaw Esau kyate na ccue lyaze namaw kya a langkuhpaw Pachia hanlan silawhang ccangkheit kha tuin kya rae,” a cipya.Ref 35.1: Gen 28.11-17
2 Tukeiccuze Jakob nynh a innbyn te amaw kya a um hae paw balyn kha, “Nae kya umpaw ramccang pachia hae kha vua oh, te naemaw te naemaw kha thyaasakuh oh lah nae uccaw kha liakuh oh;
3 rang oh, Bethel lang cceih oh sih, ka vawsaw ccyh lya yn bawmtupaw te ka ccianaw takyh kya yn umkhaepaw Pachia hanlan silawhang ccangkheit kha tuin kya ka rae cih,” a cipya hae.
4 Tukeiccuze minmin nynh a hoi hae paw ramccang pachia hae te mih nakua kya umpaw nakuahuing hae kha Jakob kalan a pya hae; te Jakob nynh khah-e hae kha Shekhem pe umpaw phaesi ku kaw khe a thuruh.
5 Minmin nynh a ccia lya hae khe Pachia kyate ri lan umpaw kha mih pepan e khua hae kyakhe a ccaw keiccuze humhung nynh mah Jakob ccaaw hae kha deehui vae khyh hae.
6 Jakob tuh amaw kya umpaw ccungccaw hae ryte Kanaan ram umpaw Luz khua a thua hae, (Luz tuh Bethel nynh thua),
7 te tuin kyakhe silawhang ccangkheit kha rae zah tuh-e hmin tuh El-bethelnote35.7 El-bethel cipaw tuh Bethel Pachia cipaw nynh thua. cite min a phu, pawccecize a upaw kyate a ccue lyaze Pachia nynh a langpyakunaw hmin nynh thua.
8 Te Rebekah kha a do-oihtu Deborah tuh chih zah Bethel akawlan umpaw phaesi ku kaw khe a uu hae. Tukeiccuze tuh-e thingku tuh Allon-bacuthnote35.8 Allon-bacuth cipaw tuh Rawnaw phaesi ku cipaw nynh thua. cite min a phu hae.
9 Jakob nynh Mesopotamia kyate bua a thua tuh Pachia nynh amaw kya bua langkuh zah hythua a pya.
10 Pachia nynh Jakob kha, “Na min tuh Jakob nynh thua; atu te Jakob cite ko na thua vae lan khyh, thuasalama na min tuh Israel a cikuh vae cih,” a cipya. Tukeiccuze Israel cite ko athua vae.Ref 35.10: Gen 32.28
11 Pachia nynh amaw kha, “Kae tuh Athunghuapaw Pachia nynh ka thua: na pungzae cih zah na lungthung cih; minphuin phuin kheit te minphuin patae kha namaw kyate oun langkuh cih hae, te siapharan hae kha namaw kyate oun pou cih hae.Ref 35.11-12: Gen 17.4-8
12 Abraham te Isak ka pya hae paw ram kha nang kae pya cih, tuh-e ram tuh namaw koute na ciihan hae kha ka pya cih hae,” a cipya.
13 Oute Pachia tuh Jakob te bya a hokunaw hae hmin kyate vaawlang a kae vae.
14 Jakob nynh Pachia te bya a la hokunaw hae hmin kyakhe lungbing ccangkheit bing zah a vawlan khe niapaw silawnawpaw kha bu zah chitui kha mah a bu.Ref 35.14-15: Gen 28.18-19
15 Jakob nynh Pachia te bya a hokunaw hae hmin kha Bethel cite min a phu.
Rachel A Chih
16 Tukoute Bethel kyate cceih hae zah Efrath khua te tabeih asawnaw kyakhe he a thua hae tuh Rachel tuh a ccaaw pui zaw zah neitangia ccinaw kha myarya a teing.
17 Tuhte neitangia a cci lyakhe neitaw puisanung nynh Rachel kha, “Rih nan, pawccecize atu ccangpaw ccapaw na hoi vae cih,” a cipya.
18 Rachel nynh a hy athang dyn khe ccapaw kha Ben-oninote35.18 Ben-oni cipaw tuh ka ngaethyanaw ccapaw cipaw nynh thua. cite min a phu; thuasalama a paaw nynh Benjaminnote35.18 Benjamin cipaw tuh ranglang kuih ccapaw tuhkhyhze alia lang ccapaw cipaw nynh thua. cite min a phu.
19 Rachel tuh chih zah Efrath lang ccianaw laanpi kya a uu hae (Efrath tuh Bethlehem nynh thua),
20 te Jakob nynh a shawku kyakhe lungbing ccangkheit a bing; tuh-e tuh Rachel shawku kya-e lungbing nynh thua, tuh-e tuh atunin cia tuin kya a um.
21 Israel nynh cceih zah Eder innhangpaw arawlang khe a bu kha a sak.
Jakob Ccapaw hae
(1Sh 2.1-2)
22 Israel nynh tuin ram kya a um lyakhe Reuben nynh a paaw lovaenung Bilhah kha a ikhae; te Israel nynh tuh-e tuh a thae.Ref 35.22: Gen 49.4 Jakob ccapaw hae tuh lu haw lae ning acih hae.
23 Leah ccapaw hae tuh: Reuben (Jakob a ccatawccaw), Simeon, Levi, Judah, Isakhar te Zebulun nynh thua hae.
24 Rachel ccapaw hae tuh: Josef te Benjamin nynh thua hae.
25 Rachel seenung Bilhah ccapaw hae tuh: Dan te Naftali nynh thua hae.
26 Leah seenung Zilpah ccapaw hae tuh: Gad te Asher nynh thua hae. E hae tuh Mesopotamia ram kya a pui hae paw Jakob ccapaw hae nynh thua hae.
Isak Chinaw
27 Jakob tuh Mamre kya umpaw a paaw Isak kya a thua, Mamre tuh Abraham te Isak nynh ramccang ccungccaw hae hawte a la umnaw hae nynh thua, (Mamre tuh Kiriath-arba cite mah cikuh zah Hebron cite mah a cikuh).Ref 35.27: Gen 13.18
28 Isak tuh kum za kheit sung tarya acih vae.
29 Te Isak tuh a kum tang vae zah he a taw vae te a chih, te a ccungccaw hae kalan a sueluabua hae; a ccaaw hae Esau te Jakob nynh amaw kha a uu hae.