26
Gerar te Beersheba kya Isak
Abraham she lya-e langmaw ccakannaw a pui apiaze tuh-e ram kya ccangpaw ccakannaw a pui. Tukeiccuze Isak tuh Filistin hae mih Siapharan Abimelek umnaw Gerar khua lang a cceih. Bawipaw nynh Isak kya langkuh zah, “Izip ram lang cceihbung nan; kae muihsah cih paw ram kya khuasah tua. E ram kya ramccang ccungccaw hawte umtua, nang kha kae umkhae cih zah hythua kae pya cih; pawccecize e ram balyn hynh namaw te na ciihan hae kae pya cih oh zah na paaw Abraham kya ka kinkupaw byakinnaw kha ka ccingsah cih.Ref 26.3-4: Gen 22.16-18 Na ciihan tuh vaawlui e riatae lei awsi zeih kae pungzaesah cih zah, e ram balyn hynh ka pya cih hae; te laephi vaw e minphuin balyn tuh na ciihan liate hythuanaw a ccou cih hae, pawccecize Abraham nynh ka bya kha ngae zah ka kawbya hae balyn kha a zui,” a ci.
Tukeiccuze Isak nynh Gerar kyakhe khua a sah. Tuh-e ram kya umpaw ccungccaw hae nynh a zu kong kha he khia hae ze, Isak nynh, “Aning tuh ka ccianung nynh thua,” a ci; pawccecize “Ka zu,” cite ho lan a rih, “Rebekah tuh a puithyapaw thua zah tuin ram e ccungccaw hae nynh Rebekah keiccuze kamaw kha yn theihsei cih hae,” cite a tuaku.Ref 26.7: Gen 12.13, 20.2 Isak nynh tuin kya khaw a um tuh, a zu Rebekah te a balokuh hae paw kha Filistin hae Siapharan Abimelek nynh thanlan-aw kyate do zah a muih. Tukeiccuze Abimelek nynh Isak kha ko zah, “Rebekah tuh na zu khaw athua! Pawcce, ‘Aning tuh ka ccianung nynh thua,’ na ci?” cite a khia. Isak nynh, “Aning keiccuze ka chihsei cih cite ka tua keiccu nynh thua,” a cipya. 10 Abimelek nynh, “Pawcce kae tungvaw hynhte na cyi? Lukhakheit nynh na zu kha zoikadeih lan a ikhaesei ze kae tungvaw hoyleinaw kha na thuakhae cih,” a ci. 11 Tukeiccuze Abimelek nynh ccungccaw balyn kha raeringnaw pya hae zah, “Humhung zemah e ccungccapaw hynh thuasah, a zu hynh thuasah a typaw tuh chia athua cih,” a ci.
12 Isak nynh tuh-e ram kya ccacii ccou zah tuh-e kum kya aleit za kheit a rue. Bawipaw nynh amaw kha hythuapya zah, 13 Isak tuh a hoirum; aning nynh houhouh hoirum zah myarya a hoirumpaw lang a tang. 14 Aning nynh tuuphu hae, vaetua phu hae te see patae a hoi keiccuze Filistin hae nynh a tungvaw eiungnaw a hoi hae. 15 (A paaw Abraham she lyaze a paaw see hae nynh a la thae hae paw tuisung balyn kha Filistin hae nynh laephi phe beih lan a thei hae.) 16 Te Abimelek nynh Isak kha, “Kaemaw kyate cceih ccavae; nang tuh kaening laeze eih na lesaehua vae,” a cipya.
17 Tukeiccuze Isak nynh tuin kyate pou zah Gerar vahue kyakhe khua a sah. 18 A paaw Abraham she lyaze la thae hae zah, Abraham he a chih te Filistin hae nynh laephi a la thei hae paw tuisung hae kha Isak nynh bua a thae; tuh-e tuisung hae kha a paaw nynh min a la phu hawte Isak nynh min a phu hae. 19 Isak see hae nynh vahue kya he a thae hae tuh tuidy ccangkheit a muih hae, 20 Gerar khua e sahiin rintu hae nynh Isak sahiin rintu hae te pekuh hae zah, “Tui hynh kae tui nynh thua,” a ci hae. Tuhte minmin nynh amaw te a luakuh hae keiccuze Isak nynh tuh-e tuisung tuh Esek cite min a phu. 21 Oute Isak see hae nynh ccangpaw tuisung bua thae hae zah, tuh-e tuisung mah bua a luakuh hae keiccuze Isak nynh Sitnah cite min a phu. 22 Aning nynh tuin kyate nuekuh zah ccangpaw tuisung kha a thae, tuh-e tuisung tuh luakuh vae khyh hae, tukeiccuze tuh-e tuisung tuh Rehoboth cite min a phu, te aning nynh, “Bawipaw nynh aening hanlan umnaw hmin kha atu yn pya vae zah, e ram kya ah pungthung vae cih oh,” a ci.
23 Isak tuh tuin kyate Beersheba lang a cceihthung. 24 Te tuh-e khuazi ccaccei khe Bawipaw nynh Isak kya langkuh zah, “Kae tuh na paaw Abraham Pachia nynh ka thua; rih nan, pawccecize nang kha kae umkhae zah, ka seepaw Abraham liate hythua kae pya cih zah na ciihan kha patae kae pungzaesah cih,” a cipya. 25 Tukeiccuze Isak nynh tuin kya silawhang ccangkheit rae zah Bawipaw min kha a ko, te a bu kha tuin kya sak zah a see hae nynh tuisung ccangkheit a thae hae.
Isak te Abimelek Byakinkunaw
26 Oute Abimelek tuh tuanaw pyatu Ahuzzath, a rhawbawipaw Fikol ryte Gerar khua kyate Isak kalan a cceih hae.Ref 26.26: Gen 21.22 27 Isak nynh minmin kha, “Nanning tuh kamaw kha nae hua oh zah nae kyate nae dee oh paw khaw na thua oh, pawccemou ka kalan nae ccia oh?” a ci hae. 28 Minmin nynh, “Bawipaw nynh nang kha ae umkhae cipaw ccaerarih lan kae muih vae; tukeiccuze nang te kaening laku thyalawkute byakinnaw rae oh sih, 29 tuhteze nynh na tungvaw ahoy leipaw rae leite hoyte daenaw te kae cciasah hawte kaening tungvaw kya ahoy leipaw na rae lan khyh. Nang tuh Bawipaw nynh hythua a pyapaw nynh na thua,” a cipya hae. 30 Tukeiccuze Isak nynh poi tuapah hae zah ae hae zah a neih hae. 31 Minmin nynh awkhua takaw te tho hae zah lu kheit te lu kheit thyalawkute byakinnaw kha a rae hae; te Isak nynh minmin kha dohaw hae zah daenaw te a cceih vae hae. 32 Tuh-e nin khe Isak see hae nynh oun thua hae zah tuisung a thae hae paw kong kha Isak kyakhe, “Kaening nynh tui kae muih vae,” cite a hopya hae. 33 Aning nynh tuh-e tuisung kha Shibah cite min a phu; tukeiccuze tuh-e khua min tuh atunin cia Beersheba cite a ko hae. 34 Esau nynh kum sung pali he acih tuh Hit ccungccaw Beeri ccanung Judith te Hit ccungccapaw Elon ccanung Basemath kha zu lang a dy hae; 35 tuh-e nopi hae nynh Isak te Rebekah kha mih lungvawsaw sah hae.