24
Isak Zudynaw
Abraham tuh taw vae zah a kum myarya tang vae; Bawipaw nynh Abraham kha atyn-are kya hythua a pya. Abraham nynh a inn kyaze a kum tang huapaw, a hoipaw balyn kha a uktupaw a seepaw kyakhe, “Ka umnaw Kanaan ccungccaw hae mih ccanung hae hynh ka ccapaw zu lang na dypya khyh nawlan, te ka ram, ka uno hae kalan na cceih cih zah ka ccapaw Isak hanlan zu na dypya nawlan, na kuih kha ka phae kaw nung lah vaaw te lae Pachia, Bawipaw min te bya kae kinsakuh cih,” a cipya. A seepaw nynh Abraham kha, “Nopinung nynh e ram kalan kamaw kha zui ry leite a um lanze na ccapaw kha nae thuanaw ram lang ka kikhae cih tou?” a cipya. Abraham nynh a seepaw kha, “Tuh-e ram lang ka ccapaw kha na kikhae khyh nawlan raeringkuh. Ka paaw inn kyate thuasah, ka puinaw ram kyate thuasah yn cciakhae zah, ‘E ram hynh na ciihan kha ka pya cih,’ cite bya yn kinpakuhpaw, vaawlui Pachia, Bawipaw nynh a vaawccungccaw kha na malang a saw cih zah nang nynh ka ccapaw hanlan tuh-e ram kya-e zu kha na dypah cih. Thuasalama nopinung nynh nang kha ae zui ry khyh ze nang tuh hynh-e ka byakin kyate na lue cih; ka ccapaw kha tuh-e ram lang na kikhae lan khyh,” a cipya. Tukeiccuze a seepaw nynh a kuih kha a bawipaw Abraham phae kaw nung zah tuh-e kong lante bya a kinku.
10 Oute tuh-e seepaw nynh a bawipaw kalauh sa haw kha cciakhae zah a bawipaw kya-e ahoypaw lasung aphuinphuin kha phu zah Mesopotamianote1.27 Mesopotamia hynh Aram-naharaim a ci hae. ram Nahor khua lang a thokuh vae. 11 Tuh-e seepaw nynh khua atolang e tuisung pe khe kalauh hae kha a ryasah hae; tuh-e ccyh tuh zetesang, nopi hae nynh tui the lan a ccia ccyh hae nynh thua. 12 Te seepaw nynh sawsang zah, “Pou Bawipaw , ka bawipaw Abraham Pachia, atunin ka laan ka sui yn uasahpah lah ka bawipaw Abraham kya apaleihkuh leipaw na lungzinaw kha tynsah tua. 13 Kae tuh hynh-e tuisung pe khe ka thadyn zah khuaccaaw hae mih ccanung hae tuh tui the lan oun cceih vae hae. 14 Liaccanung kyakhe, ‘Thawccinawte tui ka nia ccaw, na tui-re kha beih yn pyatua,’ cite ka ho zah, ‘Neih ccaleih, na kalauh hae kha mah tui kae niasahpah cih hae,’ cite a hopaw liaccaw tuh na seepaw Isak hanlan na popaw thuasah. Tuhte athua zetuh ka bawipaw kya apaleihkuh leipaw na lungzinaw kha na tynsah vae cipaw ka nyh cih,” a ci.
15 A sawsangnaw athang mawkhe Rebekah tuh a tui-re kha a raw vawlan yn khangkuh zah yn thua vae. Rebekah tuh Bethuel ccanung thua zah Bethuel tuh Abraham neitaw Nahor zu Milkah a ccapaw nynh thua. 16 Tuh-e liaccanung tuh myarya do ry um zah pise nynh a ikhae loh leipaw liaccady nynh thua. Aning nynh tuisung lang cceihbung zah a tui-re kya tui a the koute a cceihthung. 17 Oute seepaw nynh liaccanung kha tungku khylan ccuenua zah, “Thawccinawte na tui-ung kya-e tui beihtaraw kae niatua,” a cipya. 18 Aning nynh, “Ka bawipaw, neih ccaleih,” cih zah a tui-re kha a kuih kya nya kangmaw zah seepaw kha a niasah. 19 Seepaw kha tui he a pya koute liaccanung nynh, “Na kalauh hae hanlan mah tui phe a byn lan hae, ka la thepah ung cih hae,” a cipya. 20 Te tui-re kya-e tui kha tui nianawpaw banang lungkhu lang arangte ccae zah tui the khylan tuisung lang bua ccue zah kalauh hae balyn hanlan tui a thepya hae. 21 Bawipaw nynh ka khuaccongnaw kya laansui-uanaw yn pya tou, yn pya khyh tou cipaw ny nawlan pisepaw nynh liaccanung kha yccae leite phang a do.
22 Kalauh hae tui he neih kou hae te, pisepaw nynh naduh kya huingkupaw sui ngawmuh aripaw te kia haw aripaw suikhawccan ccangning kha poh thuaa zah, 23 “Hum ccanung mou na thua? Yn hopya tua. Khuazi kae rya nawlan na paaw inn kya akhaan a um tou?” cite a khia. 24 Liaccanung nynh, “Kae tuh Nahor zu Milkah ccapaw Bethuel a ccanung nynh ka thua,” a cipya. 25 Te “Aroupaw loohku hae, ae lanpaw patae te khuazi ryanaw lanpaw hmin mah kae hoi,” a cipya. 26 Pisepaw nynh a lu bakhung zah Bawipaw kha beik zah, 27 “Ka bawipaw hanlan atynpaw a sungsahnaw te a lungzinaw kha a zosah leipaw, ka bawipaw Abraham Pachia, Bawipaw tuh thehoyte um sah. Ka bawipaw a uno hae inn lang cceihpaw laanpi kya Bawipaw nynh yn cciakhae,” a ci.
28 Oute liaccanung nynh ccue zah a nung inn kyakhe e konglang balyn kha a hopya hae. 29 Rebekah nynh Laban cikuhpaw rae lu kheit a hoi; Laban nynh pisepaw umnaw tuisung lang a ccue. 30 Laban nynh a ccianung naduh kya a huingkupaw te a kuih kya-e khawccan hae kha muih zah, “Pisepaw nynh tuhte nynh yn hopya,” cite a ccianung Rebekah nynh a hopaw kha he a thae tuh, tuisung kya kalauh hae pe a thadynpaw pisepaw kalan a cceih. 31 Laban nynh, “Pou Bawipaw nynh hythua a pyapaw, kae inn lang yn cceih; pawcce atolang phang na thadyn? Inn te kalauh hae hanlan hmin kha phe ka paccyn kou vae,” a cipya. 32 Tukeiccuze pisepaw tuh inn lungkhu lang a tee; te Laban nynh kalauh hae mih uccaw kha khahpah hae zah, aroupaw loohku hae te ae lanpaw kha a pya hae, te pisepaw te a umkheih hae paw ccungccaw hae nynh mih ccu a singku nawlan hae paw tui kha a pya hae. 33 Oute pisepaw a malang khe ae lanpaw looh kha a nungpya. Thuasalama pisepaw nynh, “Ho lan ka hoipaw kha ka ho maw tuh ka ae lan khyh,” a ci. Laban nynh, “Hotua,” a cipya.
34 Tukeiccuze pisepaw nynh, “Kae hynh Abraham seepaw nynh ka thua. 35 Bawipaw nynh ka bawipaw kha hythua patae pya zah a hoirumpaw lang a tang vae; Bawipaw nynh tuuphu, vaetua phu, sui, phua, seepaw hae te seenung hae, kalauh hae te lann hae kha a pya. 36 Te ka bawipaw zu Sarah nynh he a taw vae khe, ka bawipaw hanlan ccapaw lu kheit a saahpya; te a hoipaw balyn kha a ccapaw pong a pya vae. 37 Ka bawipaw nynh bya yn kinsakuh zah hynhte yn hopya: ‘Ka umnaw ram e Kanaan ccungccaw hae mih ccanung hae kha ka ccapaw zu lang na dypah lan khyh; 38 ka paaw inn lang te ka uno hae kalan na cceih cih zah ka ccapaw hanlan zu na dypah cih,’ cite yn tawsya. 39 Kae nynh ka bawipaw kha, ‘Nopinung nynh kamaw kha zui leite yn um kho,’ ka cipah zah, 40 ka bawipaw nynh, ‘Bawipaw malang a cceihpaw nynh ka thua; tuh-e Bawipaw nynh a vaawccungccaw kha nang te cciakheih lan ae sawpah cih zah na laansui kha ae uasahpah cih. Ka ccapaw hanlan ka uno hae kya-e, ka paaw innbyn kya-e zu kha na dypah cih. 41 Oute ka uno hae kya na thua zetuh bya kae kinsakupaw kyate na lue cih; minmin nynh nopinung kha ae pya khyh hae zemah bya kae kinsakupaw kyate na lue cih,’ yn cipya.
42 “Atunin tuisung kya ka thua lyaze saw ka sang zah, ‘Ka bawipaw Abraham Pachia, Bawipaw , ka khuaccongnaw hynh ka laansui nae uasahpya zetuh, 43 tuisung pe ka thadyn lya, tui the lan yn cceihpaw liaccanung kyakhe, “Thawccinawte na tui-re kya-e tui beihtaraw kha nia lan yn pyatua,” cite ka hopah cih zah, 44 aning nynh kamaw kha, “Neih ccaleih, na kalauh hae hanlan kha mah tui ka la the cih,” cite yn khungpaw liaccanung tuh ka bawipaw ccapaw hanlan Bawipaw nynh a paccynpaw nopi thuasah,’ ka ci.
45 “Ka thinlung kya ka sawsangnaw athang mawkhe Rebekah tuh a tui-re kha a raw vawlan yn khangkuh zah yn thua vae; te tuisung lang cceihbung zah tui a the. Kae nynh amaw kha, ‘Thawccinawte tui beih yn niasah,’ ka cipya. 46 Aning nynh a tui-re kha a raw kyate nya kangmaw zah, ‘Neih ccaleih, na kalauh hae kha mah tui kae niasahpah cih hae,’ a ci. Tukeiccuze ka neih zah, aning nynh kalauh hae kha mah a niasah hae. 47 Oute, ‘Hum ccanung mou na thua?’ cite ka khia zah aning nynh, ‘Milkah nynh Nahor a saahpyapaw, Nahor ccapaw Bethuel ccanung nynh ka thua,’ a ci. Tukeiccuze naduhnakahuing kha a naduh kya ka huingsah zah khawccan hae kha a kuih kya ka nawsaku. 48 Te ka lu kha ka bakhung zah, ka bawipaw a unopaw ccanung kha ka bawipaw a ccapaw zu lang dy khylan ahmepaw laanpi yn cciakhaepaw, ka bawipaw Abraham Pachia, Bawipaw kha ka beik zah the ka hoysah. 49 Tukeiccuze atu, nanning nynh ka bawipaw kha thanccingte thaw na ccih cih oh tou, na ccih lan khyh oh tou cipaw yn hopah oh, tuhteze nynh kae nynh ranglang laanpi khyhze voilang laanpi ka zuithya cih,” a cipya hae.
50 Oute Laban te Bethuel nynh, “E uccaw hynh Bawipaw kyate yn thuapaw thua zah kaening nynh athya ahoy kha kae hopah kho khyh. 51 Dotua, Rebekah tuh na malang phang um, amaw kha ko lah cceih oh, Bawipaw nynh a ho vae thyhte Rebekah tuh na bawipaw a ccapaw zu lang tangsah,” a cipya hae.
52 Abraham seepaw nynh mih bya kha he a thae tuh, laephi kya bakhung zah Bawipaw kha a beik. 53 Te seepaw nynh phua, sui te boeining hae kha thuaa zah Rebekah kha a pya; a nung te a raeepaw kha mah amee rupaw lasung a pya hae. 54 Oute seepaw te a umkheih hae paw pise hae tuh ae hae, neih hae zah khuazi tuh tuin kya a rya hae. Awkhua he a tho hae tuh seepaw nynh, “Ka bawipaw kalan kae la ki ccavae,” a cipya hae. 55 A nung te a raeepaw nynh, “Liaccanung tuh kaemaw kya azyahua nin haw loukaw sohsoh umbua hin sah; tukoute a cceih cih,” a ci hae. 56 Thuasalama seepaw nynh, “Accyh yn rosah nan vae oh, Bawipaw nynh ka khuaccongnaw kha laansui phe yn uasahpya vae; ka bawipaw kalan beih yn kisah ccavae oh,” a cipya hae. 57 Minmin nynh, “Liaccanung kha kae ko cih zah kae khia cih,” a ci hae. 58 Te minmin nynh Rebekah kha ko hae zah, “E ccungccapaw kya na cceihbua cih tou?” cite khia hae zah, aning nynh, “Ka cceihbua cih,” a ci. 59 Tukeiccuze mih ccianung Rebekah te Rebekah a do-oihtu kha Abraham seepaw te a ccungccaw hae kyakhe a cciasah bua hae. 60 Te minmin nynh Rebekah kha hythuapya hae zah,
“Kae ccianung, nang tuh
ccungccaw athong patae nung lang
la tang vae ii;
na ciihan hae nynh
mih rhaw hae khua kha
la tae vae hae sah,” a ci hae.
61 Te Rebekah te a see liaccaw hae nynh kalauh hae kha ccikuh hae zah seepaw kha a zui vae hae; tukeiccuze seepaw nynh Rebekah kha ko zah a cceih vae hae.
62 Negeb kya khuasahpaw Isak tuh Beer-lahai-roinote24.62 Beer-lahai-roi cipaw tuh Oun muihtu Ahiinpaw Pachia tuisung cipaw nynh thua. kyate yn thua. 63 Zetesang khe Isak nynh ramkaw lang a cceih; te ngaw he a do tuh kalauh hae oun cceih hae paw kha a muih. 64 Te Rebekah nynh dothung zah Isak kha he a muih tuh kalauh tungvaw te arangte rung zah, 65 seepaw kyakhe, “Aening te tungku khylan ramkaw kya yn cceihpaw pisepaw khuh hummou?” cite a khia. Seepaw nynh, “Ka bawipaw nynh thua,” cite a khung. Tukeiccuze Rebekah nynh mae kya bongkupaw boei kha lah zah a bongku. 66 Te seepaw nynh a la cyipaw atyn-are kha Isak kya a hopya. 67 Oute Isak nynh Rebekah kha a nung Sarah bu lungkhu lang a teekhae. Aning nynh Rebekah kha ko zah a zu lang a tang vae; Isak nynh Rebekah kha a sungsah. Tukeiccuze Isak tuh a nungchih koute Rebekah liate lungtangnaw a mue.