GENESIS
Genesis
Genesis (Zenesis) cipaw asuilan tuh “Athonaw” cipaw nynh thua. E ccauh nynh vaaw te lae raenaw, ccungccaw thokeinaw, laephi vawlan seinaw te teingnaw athonaw kong te Pachia nynh ccungccaw a ccuepenaw kong kha a ho. Genesis hynh phuin ning lang phia kho athua:
1. Byaria 1-11 lungkhu kya laephi raenaw kong te masaty ccungccaw phungpaw a um. E kyahin Adam te Evi kong, Kain te Abel kong, Noah te tuipayn kong te Babilon Innhangpaw kong a um.
2. Byaria 12-50 lungkhu kya masaty Israel hae mih minpaaw hae thokeinaw phungpaw a um. Masaty tuh Abraham thua zah aning tuh Pachia a zynnaw te a doliakunaw kya a minthaanpaw nynh thua. Abraham koute a ccapaw Isak kong, a mintaw Jakob (Israel cite mah ko athuapaw) kong, Israel phin haw lae ning hae mih paaw hae athua hae paw Jakob ccapaw hae lu haw lae ning kong kha a um. Jakob ccapaw hae laku e Josef kong kha abyapi lan um zah, Jakob te ccangpaw a ccapaw hae kha mih innbyn hae ryte Izip ram lang a cciakhae hae paw kong kha a um (byaria 12-50).
E ccauh nynh ccungccaw hae kong kha ho salamah a paccyn huaccepaw tuh Pachia nynh rya a lawpaw kong kha nynh thua. Pachia nynh atyn-are a raenaw kong kyate tho zah, Pachia nynh a ccungccaw hae kha zungzae a oihsah cih hae cipaw byakinpyakunaw khate athang. E ccauh athonaw te athangnaw cia abyapi huapaw tuh Pachia nynh thua; hoyleinaw a raetu hae kha byapia hae zah de a tahnaw hae kong, a ccungccaw hae kha cciakhae hae zah a bawmnaw hae kong te mih phungpaw a raenaw zia kha a langsah. Minphuin phuin kheit zynnaw phungpaw te tuh-e zynnaw tuh a hiinthya nawlan bawm khylan hynh-e ccauh rynpaw hynh zei athua.
1
Raenaw Kong
Athotakaw kya Pachia nynh vaaw te lae kha a rae, laephi tuh muinsan a hoi leipaw accakaepaw nynh thua, akhupaw rilipi kha mohnaw nynh phang a bong, te Pachia muisawnote1.2 Pachia kyate khisan, cite khyhze athawsaepaw khisan cite mah leihku kho athua. tuh tui luki khe a pae. Oute Pachia nynh, “Awnaw um sah,” ci zah awnaw tuh a um.Ref 1.3: 2Ko 4.6 Pachia nynh awnaw tuh ahoy cite a muih; te awnaw kha mohnaw kyate a phia. Pachia nynh awnaw kha Khuadae, mohnaw kha Khuazi cite min a phu. Zete thang zah awkhua yn thua—tuh-e tuh nin kheitnaw nin nynh thua.
Te Pachia nynh, “Tui angaelung khe myarya kopaw adawkuhpaw ccangkheit um sah, tuh-e nynh tui te tui kha phia hae sah,” a ci. Te Pachia nynh myarya kopaw adawkuhpaw kha rae zah, tuh-e luki umpaw tui te tuh-e kaw lang umpaw tui kha a phia hae thyhte a um vae.Ref 1.6-8: 2Pe 3.5 Te Pachia nynh myarya kopaw adawkuhpaw tuh Vaawlui cite min a phu. Zete thang zah awkhua yn thua—tuh-e tuh nin ningnaw nin nynh thua.
Pachia nynh, “Vaawlui zakaw umpaw tui hynh san kheit kya pynkheihlan sueluakuh sah, aroupaw laelung kha langkuh sah,” cite kaw a pya thyhte acyihkuh vae. 10 Pachia nynh aroupaw laelung kha Laephi cite minphu zah, pynkheihlan sueluakuhpaw tui kha Rili cite min a phu. Te Pachia nynh tuh-e tuh ahoy cite a muih. 11 Oute Pachia nynh, “Laephi vawlan hin thingku-ruaku aphuinphuin po sah: acii-amung umpaw aku hae, te laephi vawlan athae lungkhu amung umpaw thingku aphuinphuin po sah,” cite kaw a pya thyhte a cyihkuh vae. 12 Tetuh laephi nynh thingku-ruaku aphuinphuin kha a posah vae: acii-amung umpaw aku phuin miakaw, te athae lungkhu amung umpaw thingku phuin miakaw kya-e thingku hae tuh a po vae hae. Pachia nynh tuh-e tuh ahoy cite a muih. 13 Zete thang zah awkhua yn thua—tuh-e tuh nin thumnaw nin nynh thua.
14 Te Pachia nynh, “Khuazi te khuadae kha phia khylan adawkuhpaw vaawlui kya awnaw um sah; tuh-e awnaw tuh muihsahnaw hae, nin hae, kum hae te kumvaelori kha khya khylan thua sah. 15 Laephi vawlan awnaw pya khylan adawkuhpaw vaawlui kya awnaw um sah,” cite kaw a pya thyhte a cyihkuh vae. 16 Te Pachia nynh myarya lepaw awnaw ccangning kha a rae, khuadae uktu lang khuanin kha rae zah, khuazi uktu lang sawpaw kha a rae, te awsi hae kha mah a rae. 17 Pachia nynh laephi vawlan awnaw pya khylan, 18 khuadae te khuazi kha uk khylan, te awnaw te mohnaw kha phia khylan tuh-e a aw hae paw kha adawkuhpaw vaawlui kyakhe a nung. Te Pachia nynh tuh-e tuh ahoy cite a muih. 19 Zete thang zah awkhua yn thua—tuh-e tuh nin palinaw nin nynh thua.
20 Te Pachia nynh, “Tui kya ahiinpaw ahysuepaw aphuinphuin kha tui nynh pousah sah, te pavaw hae nynh laephi luki adawkuhpaw vaawlui khe zou bungthung hae sah,” a ci. 21 Tuhcite rili lungkhu umpaw myarya lepaw ngasawpi hae te tui kya piathya zah ahiinpaw ahysuepaw aphuinphuin, te azouthyapaw pavaw aphuinphuin kha Pachia nynh a rae. Te Pachia nynh tuh-e tuh ahoy cite a muih. 22 Pachia nynh minmin kha, “Pungzae oh, lungthung oh lah rili tui kya phe beih oh, pavaw hae nynh laephi vawlan lungthung hae sah,” cite hythua a pya hae. 23 Zete thang zah awkhua yn thua—tuh-e tuh nin pangawnaw nin nynh thua.
24 Te Pachia nynh, “Laephi nynh ahiinpaw ahysuepaw aphuinphuin: sahiin aphuinphuin te loramsaw aphuinphuin te avawpaw aphuinphuin kha pousah sah,” cite kaw a pya thyhte a cyihkuh vae. 25 Pachia nynh laephi vawlan umpaw loramsaw aphuinphuin, te sahiin aphuinphuin, te laephi vawlan avawpaw atyn-are kha a rae. Te Pachia nynh tuh-e tuh ahoy cite a muih.
26 Oute Pachia nynh, “Ahmaw muinsan hawte, ahmaw oun lo lante ccungccaw kha rae oh sih; minmin nynh tui kya-e ngasaw hae thuasah, vaawlang e pavaw hae thuasah, sahiin hae thuasah, laephi kya-e loramsaw balyn thuasah, te laephi vawlan avawpaw miakaw thuasah uk hae sah,” cite kaw a pya.Ref 1.26: 1Ko 11.7
27 Tuhcite Pachia nynh, ccungccawnote1.27 ccungccaw cipaw hynh Hebru bya te adam a ci hae. kha
amaw muinsan alo lante a rae,
minmin kha Pachia muinsan alo lante a rae hae;
aning nynh pise te nopi kha a rae hae.
28 Pachia nynh minmin kha, “Pungzae oh lah lungthung oh, laephi kha phe beih oh lah laephi kha uk oh; te tui kya-e ngasaw hae, vaawlang e pavaw hae te laephi vawlan hiin zah apiathyapaw miakaw kha uk oh,” cite hythua a pya hae. 29 Pachia nynh, “Laephi vawlan balyn umpaw acii-amung hoipaw aku miakaw te athae lungkhu amung umpaw thingku miakaw kha kae pya vae oh; nanning nynh tuh-e hae tuh na ae cih oh. 30 Te laephi kya-e ramsaw miakaw, vaawlang e pavaw miakaw, laephi vawlan avawpaw atyn-are, hiinnaw hy a hoipaw atyn-are hanlan hinlalyhpaw aku miakaw kha ae lan ka pya vae hae,” cite kaw a pya thyhte acyihkuh vae. 31 Pachia nynh a raepaw atyn-are kha myarya ahoy ccaccing cite a muih. Te zete thang zah awkhua yn thua—tuh-e tuh nin taruhnaw nin nynh thua.