6
Nae Phupaw Duekuh Oh
1 Uteno hae, lukhakheit nynh seinaw a raeseipaw kha na muih oh ze, Muisaw ccungccaw hae nanning nynh nebaleihpaw thinlung te tuh-e ccungccaw tuh a umtynaw kya bua umsah oh; naemaw mah tuhounaw kya na ccaw khyh nawlan oh la raeringkuh oh.
2 Lu kheit te lu kheit nae phupaw aripaw kha duekuh oh lah, tuhcite Khri kawbya kha na ccingsah cih oh.
3 Pawccecize ccungccaw lu kheit nynh pawsang athua leite thanccingpaw maman lante a tuaku lanze, amaw te amaw a lingkuhpaw nynh thua.
4 Ccungccaw miakaw nynh a ryalaw kha sihseikuh sah; tetuh ming hae ryalaw kya thua leite, amaw ryalaw kyakhe lungpawnaw a hoi cih.
5 Pawccecize ccungccaw miakaw nynh amaw a phupaw kha a phu cih.
6 Pachia bya a ccangkuhpaw nynh a ccangpatupaw kha ahoypaw uccaw balyn neethungbua sah.
7 Lingsakuh nan oh; Pachia tuh pawlangria leite um kho thua khyh; pawccecize na tupaw thyhte na rue cih.
8 Na pynsaw hanlan ccacii na tu ze pynsaw kya-e ronaw kha na rue cih; thuasalama Muisaw hanlan ccacii na tu ze Muisaw kya-e zungzae hiinnaw kha na rue cih.
9 Tukeiccuze ahoypaw ryalawnaw kya thawbang lungthang nan oh sih; pawccecize tuhte ah lungthang khyh zetuh rue ccyh yn zaw te ah rue cih oh.
10 Tukeiccuze ccyhhoypaw ah mue takyh oh te, ccungccaw balyn hanlan ahoypaw rya kha lawpah oh sih lah, abyapi lante zyntu innbyn hae hanlan ahoypaw rya kha lawpah oh sih.
11 Kamaw ka kuih te nae kalan kae zeipaw hynhcih alepaw ccaw hynh la dotua oh!
12 Vingdungawku lan ae nangse oh paw ccungccaw hae tuh pynsaw kya dohoy lante langku ry hae zah, Khri vaelantung hanlan tuaasahkunaw a teing ry khyh hae keiccu nynh thua.
13 Pawccecize vingdungawkuh hae paw mimaw mah Kawbya kha zui khyh hae, nanning nae pynsaw liate pooku a ry hae keiccuze nanning kha vingdungawkuh hae sah ci ae ry oh.
14 Ah Bawipaw Jesu Khri kya-e vaelantung kya laelan pawpaw kya mah ka pooku lanpaw um nan vae sah; tuh-e vaelantung liate laephi tuh kae ka hanlan vaelantung kya khiade thua vae zah, kae mah laephi hanlan khiade ka thua vae.
15 Pawccecize Khri Jesu kya tuh vingdungawkunaw thuasah, vingdungawku leinaw thuasah pawsang thane khyh, rae thawpaw thuanaw kha nynh athane.
16 Hynh-e phung thyhte a zuipaw ccungccaw hae balyn tungvaw kya thuasah, Pachia kya-e Israel hae tungvaw kya thuasah, daenaw te ngaethyaumsahnaw tuh la um vae sah.
17 Atu te vae tuh, hum nynh sanmah vawsaw yn pya nan vae sah; pawccecize Jesu vaemaw adaelaepaw kha ka pyn kya ka phubia vae.
18 Uteno hae, ah Bawipaw Jesu Khri thawccinaw tuh nae thinlung kya la um vae sah. Amen.