5
1 Khri nynh aening kha phe oun luesah vae. Tukeiccuze luenaw kyakhe tynkaring lan thadyn oh lah, seetangnaw kya-e puihnawpaw ccong kha bua puihthui nan vae oh.
2 Ngaetua oh! Kae, Paul nynh kae hopya oh paw tuh, nanning tuh vingdungawkuh hae paw na thua oh ze, Khri tuh nanning hanlan pawsang athanenaw um khyh.
3 Vingdung a awkuhpaw miakaw nynh Kawbya balyn kha marya a zui cih cite raeringnaw bua kae pya oh.
4 Kawbya liate thyaaccou a ry hae paw nanning tuh Khri kyate na phiakuh vae oh; thawccinaw kyate phe na khuliakuh vae oh.
5 Pawccecize aening tuh zynnaw liate dingnaw kya thua lan cipaw ngaehoinaw kha Muisaw liate phang ah ngaw oh.
6 Pawccecize Jesu Khri kya tuh vingdungawkunaw thuasah, vingdungawku leinaw thuasah pawsang thane khyh; sungsakunaw liate ryalahpaw zynnaw rou nynh athane.
7 Nanning tuh kou hoy lan na ccue vae oh, nanning kha byaccing zuinaw kyate hum nynh mou ae khee oh?
8 Tuhcihawpaw soihnaw tuh nanning ae kotu oh paw kyate yn thua khyh.
9 Ditaripaw ransi nynh vaedi balyn kha pong a thosah.Ref 5.9: 1Ko 5.6
10 Nanning tuh lungccang na hoi lan khyh oh cite Bawipaw liate nanning konglang zynkunaw ka hoi. Thuasalama vawsawnaw ae pya oh paw ccungccaw miakaw tuh detahnaw a ing cih.
11 Uteno hae, vingdungawkunaw hynh aho ung cite ka ho ung lanze, pawccemou tuaasahkunaw tuh palei ka ing ung? Tuhte ka la ho lanze, vaelantung te asekuhpaw cyiseinaw tuh um vae lan khyh.
12 Nanning vawsaw ae pya oh paw ccungccaw hae tuh mih tiin heize reihkuh hae sah ci ka ry!
13 Uteno hae, nanning tuh luenaw kalan ko na thua vae oh, thuasalama tuh-e nae luenaw tuh pynsaw rynaw ccyhhoypaw hanlan mang nan oh, sungsakunaw liate lu kheit te lu kheit ryalawpakuh oh.
14 Pawccecize Kawbya balyn tuh, “Na innpaw kha namaw hawkhate na sungsah cih,” cikuhpaw kawbya ccangkheit kyahin phe accing.Ref 5.14: Lev 19.18
15 Thuasalama lu kheit te lu kheit na teikuh oh zah na laangku oh ze, lu kheit te lu kheit na roku khyh nawlan oh la raeringkuh oh.
Pynsaw Ryalawnaw
16 Kae hopya oh paw tuh, Muisaw te hiin oh lah, pynsaw rynaw kyakhe nae lungryachih nan sah.
17 Pawccecize pynsaw rynaw tuh Muisaw rynaw te rawsekuh zah Muisaw rynaw mah pynsaw rynaw te arawsekuh; hynh-e hae tuh ccangkheit te ccangkheit arawsekuh hae; tukeiccuze na cyi ry oh paw kha na cyih khyh oh.Ref 5.17: Rom 7.15-23
18 Thuasalama Muisaw nynh ae cciakhae oh ze, Kawbya zakaw na um vae khyh oh.
19 Pynsaw cyisahnaw hae tuh raerae a langkuh, tuh-e hae tuh: ohhuakunaw, nungsikunaw, ohhuaku rynaw;
20 zohtuh beiknaw, naawthyanaw, huakunaw, pekunaw, eiungnaw, thinrianaw, byalungnaw, lungnging leinaw, buu phiakunaw,
21 duaanaw, ruinaw, zu-aete siaruanaw te tuhcihawpaw cyisahnaw hae nynh thua. Langmawlya raeringnaw kae pya vae oh hawte atu mah raeringnaw bua kae pya oh: tuhcihawpaw uccaw hae a cyihpaw ccungccaw hae tuh Pachia peenaw kha ccou lan khyh hae.
Muisaw Thae
22 Muisaw thae tuh sungsakunaw, lungpawnaw, daenaw, lungsaenaw, ngaethyaumsakunaw, hoynaw, lungzinaw,
23 lungnenaw te sungku khonaw nynh thua. Hynhcihawpaw te a rawsekuhpaw kawbya um khyh.
24 Khri Jesu kya-e ccungccaw hae nynh tuh pynsaw kha thuasah, pynsaw rynaw te duaanaw hae kha thuasah vaelantung kya phe a khiade vae hae.
25 Aening tuh Muisaw liate ah hiin oh athua ze, Muisaw cciakhaenaw thyhte cceih oh sih.
26 Lysakunaw, lu kheit te lu kheit thinriasakunaw, lu kheit te lu kheit eiungkunaw kha sibia oh sih.