3
Kawbya khyhze Zynnaw
Pou Galati mingaee hae! Hum nynh mou nanning kha phe ae mua oh? Vaelantung kya a khiade hae paw Jesu Khri kha nae malang khe ccaerarih lan langsahpya athua vae khaw! Hynh-e kyalya hynh nynh nae kyate ny ka ry: Kawbya cyisahnaw liate tou Muisaw kha na mue oh? Tuhkhyhze na zyn oh zah na thaenaw oh liate tou na mue oh? Myaryamaw na ngaee oh tou? Muisaw te ryalaw na tho oh zah, atu pynsaw tetou na thangsah cih oh? Vawsawnaw patae na tung oh paw kha accakaepaw lang tou pong a tang? Accakaepaw lang tou atanghan cih? Pachia nynh Muisaw ae pya oh zah nae kya ngaeangnaw a raepaw kha nanning nynh Kawbya na zui keiccu oh tou? Tuhkhyhze thehoypaw na thae oh zah na zyn keiccu oh tou?
Tuhawte, “Abraham nynh Pachia kha zyn zah tuh-e a zynnaw tuh dingnaw lang a riapya,” cite Ccathyaa kya a um.Ref 3.6: Gen 15.6; Rom 4.3 Tukeiccuze zynnaw a hoi hae paw tuh Abraham ccaaw hae nynh thua hae cipaw nyh oh.Ref 3.7: Rom 4.16 Pachia nynh Zenta hae kha zynnaw liate thyaaccousah cih hae cite Ccathyaa nynh muihty zah Abraham kyakhe, “Nang na liate Zenta hae balyn tuh hythua a ccou cih hae,” cite thehoypaw kha a hopya ty vae.Ref 3.8: Gen 12.3 Tukeiccuze zynnaw a hoi hae paw tuh a zynpaw Abraham ryte hythua a ccoukheih hae.
10 Pawccecize Kawbya cyisahnaw a doliakuhpaw balyn tuh thyalawnaw zakaw nynh a um hae; pawccecize, “Kawbya ccauh kya azeikuhpaw abalynte a zui leipaw miakaw tuh thyalaw thua sah,” cite azeikuh.Ref 3.10: Deu 27.26 (LXX) 11 Atu tuh Pachia malang Kawbya liate hum sanmah thyaaccoupaw um khyh cipaw tuh ccaerarih lan alangkuh. Pawccecize, “Adingpaw ccungccaw tuh zynnaw liate a hiin cih,” acikuh.Ref 3.11: Hab 2.4 12 Kawbya tuh zynnaw te sekuh khyh; thuasalama Ccathyaa nynh, “Kawbya hae a zuipaw ccungccaw tuh Kawbya hae liate a hiin cih,” a ci.Ref 3.12: Lev 18.5 13 Pawccecize, “Thing kya sae athuapaw ccungccaw miakaw tuh thyalawnaw a ccoupaw nynh thua,” cite azeikuh hawte, Khri tuh aening hanlan thyalawnaw a ccoupaw thua zah, aening kha Kawbya kya-e thyalawnaw kyate oun shawkhaw vae,Ref 3.13: Deu 21.23 14 tuhte oun shawkhawpaw tuh Abraham nynh a ccoupaw hythuanaw kha Jesu Khri liate Zenta hae hanlan athua bua nawlan te aening nynh zynnaw liate byakinpyakupaw Muisaw kha ah mue nawlan oh nynh thua.
Abaraham kha Byakinpyakunaw
15 Uteno hae, nin takyh ah tung oh paw kya-e kha tousenaw lang kae hopya oh: Ccungccaw nynh raepaw byakinnaw kha heize tynsah athua koute hum nynh sanmah roh vae khyh, bia mah biachih vae khyh. 16 Byakinpyakunaw hae kha Abraham te a ciihan hanlan raepaw nynh thua; “Ciihan hae hanlan,” cite pataepaw elang ho khyh; “Na ciihan hanlan,” cite lu kheit elang nynh a ho, tuh-e paw tuh Khri nynh thua.Ref 3.16: Gen 12.7 17 Ka ho rypaw tuh hynhte nynh thua: Pachia nynh Khri kya phe a tynsah vae paw byakinnaw kha kum za pali sung thum koute a umpaw Kawbya nynh roh kho vae khyh; byakinpyakunaw kha Kawbya nynh accakaepaw lang tangsah kho khyh.Ref 3.17: Exo 12.40 18 Pawccecize rho tuh Kawbya liate athua lanze, byakinpyakunaw liate thua vae khyh, thuasalama byakinpyakupaw liate nynh Pachia nynh Abraham kha rho a pya.Ref 3.18: Rom 4.14
Kawbya Eenaw
19 Tuhteze pawkeiccumou Kawbya tuh yn thua? Kawbya tuh cyiseinaw cipaw hynh pawmou athua cipaw langsaku nawlan thua zah, Pachia nynh bya a kinkupaw Abraham ciihan yn langkuh cia atyn lante pyapaw nynh thua. Kawbya tuh vaaw hae nynh ccungccaw kya pyapaw thua zah vaaw hae te ccungccaw laku kya hopiatu lu kheit a um. 20 Ccungccaw phu kheit laeze alung ze rou nynh hopiatu aho, thuasalama Pachia tuh ccangkheit nynh thua.
21 Tuhteze Kawbya nynh Pachia kya-e byakinpyakunaw kha a rawse tou? Rawse khyh! Pawccecize hiinnaw a pya khopaw Kawbya kha pya a la thua lanze, dingnaw tuh tuh-e Kawbya liate mue athua ccaccing vae cih. 22 Thuasalama a zynpaw ccungccaw hae nynh Jesu Khri zyn liate byakinpyakupaw kha a ccou nawlan hae, Ccathyaa nynh pawpaw balyn kha seinaw huhan zakaw kya pong a khong.
23 Zynnaw yn thua maw tuh aening hynh Kawbya nynh thongccahpaw hawte oun khong zah, zynnaw a langkuh cia phang oun khawsung. 24 Tukeiccuze aening tuh zynnaw liate thyaaccoupaw ah thua nawlan oh, Kawbya tuh Khri yn thua cia aening oun ccangpahtu nynh thua. 25 Thuasalama atu tuh zynnaw phe yn thua vae zah aening tuh oun ccangpatupaw zakaw kya ah um vae khyh oh, 26 pawccecize nanning balyn tuh zynnaw liate Khri Jesu kya Pachia ccaaw hae nynh na thua oh. 27 Pawccecize Khri kya baptisma a in vae hae paw nanning balyn tuh Khri kha boeining hawte phe na lawkuh vae oh. 28 Khri kya Judah paw te Grikpaw ci um vae khyh, see te a luepaw ci um vae khyh, pise te nopi ci um vae khyh; pawccecize nanning balyn tuh Khri Jesu kya ccangkheitpaw nynh na thua vae oh. 29 Nanning tuh Khri kya-e na thua oh ze, Abraham ciihan nynh na thua vae oh, te byakinpyakupaw thyhte rhoccoutu hae nynh na thua vae oh.Ref 3.29: Rom 4.13