GALATI HAE
KALAN PAUL CCAKY
Galatians
Jesu Khri thehoy bya tuh Judah hae athua lei hae paw kalan ho athua tetuh ahmepaw Khriccaaw thuanaw elang ccungccaw nynh Moses Kawbya zui ho tou, ho khyh tou cipaw byakhianaw apou. Paul nynh ho khyh cite a ei hae, thanccingte Khri kya ah hiinnaw hanlan tuh zynnaw te thua zah, tuh-e liate ah balynte Pachia te oun ccawsaku. Thuasalama Asia Pee Rom nynh a ukpaw Galati khriccaawbuu hae kya-e hae nynh Paul tuh dou hae zah Pachia te ccawkunaw elang tuh ccungccaw nynh Moses Kawbya tuh zui hahe aho a ci hae.
Galati hae kalan Paul Ccaky hynh ccangpyaseinaw kyate cciakhaeseinaw a zui hae paw kha ahmepaw zynnaw kalan kikhaenaw elang nynh thua. Paul nynh kae tuh Khri zuitu ccaccing a cikunaw kyate a bya a tho. Paul nynh zuitu lu kheit lang ko athuanawpaw kha Pachia kyate nynh yn thua, ccungccaw kawhoinaw kyate thua khyh, te a ryalawnaw zemah Judah athua lei hae paw kalan nynh athuahua cite a ho. Khriccaaw cciakhaekunaw hynh Khri zynnaw kyate yn poupaw sungsakunaw kyate nynh oun thua cite athangnaw byaria hae kya Paul nynh a langsaku.
1
Beihlangnaw
1 Ccungccaw nynh naw liate thua leite, ccungccaw kawhoinaw liate mah thua leite, Jesu kha chinaw kyate a thoosahpaw Paaw Pachia te Jesu Khri liate saw athuapaw locceihtu kae, Paul—
2 Kamaw te kae umkheihpaw Pachia innbyn hae balyn nynh Galatia ram e khriccaawbuu hae kalan ccaw kae ky oh.
3 Ah Paaw Pachia te Bawipaw Jesu Khri kyate thawccinaw te daenaw tuh nae kya la um sah.
4 Ah Paaw Pachia rynaw thyhte ahoy leipaw atu she kyate aening kha luesah khylan Jesu nynh aening seinaw hanlan amaw te amaw kha a pyaku.
5 Pachia kya phu-enaw tuh zungzae te zungzae la um sah. Amen.
Ccangpaw Thehoypaw Um Khyh
6 Khri thawccinaw liate nanning ae kotu oh paw kha arangte na vua oh zah ccangpaw thehoypaw kalan na paleihku oh paw tuh ka ngaeangthua.
7 Ccangpaw thehoypaw um khyh; thuasalama nanning kha vawsaw ae pya oh zah Khri thehoypaw kha ahme leipaw lang a paleih rypaw ccungccaw abang a um hae.
8 Thuasalama kaening zemah thuasah, vaawlang te yn thuapaw vaawpaw zemah thuasah nae kya kae ho vae paw thehoypaw te arawsekuhpaw thehoypaw kha a ho lanze, aning tuh thyalaw thua sah!
9 Na kyngku vae oh paw thehoypaw te arawsekuh lante a hopaw tuh thyalaw thua sah cite langmawlya kae ho vae hawte, atu kae nynh bua ka ho.
10 Pawccecize atu kae tuh ccungccaw kya-e maehoynaw tou ka ccungku? Tuhkhyhze Pachia kya-e tou? Tuhkhyhze ccungccaw hae lungrythuasah lan tou ka ccungku? Pawccecize ccungccaw hae lungrythuasah lan atu cia ka ccungku lanze, kae tuh Khri ryalahtu ka thua lan khyh.
Locceihtu lang Paul A Tangnaw
11 Uteno hae, kae nynh ka hopaw thehoypaw tuh ccungccaw nynh thopaw thua khyh cipaw kae nysah ry oh;
12 pawccecize tuh-e thehoypaw tuh ccungccaw kyate ka mue khyh, ka ccangkupaw mah thua khyh, Jesu Khri kya-e byaphy liate ka muepaw nynh thua.
13 Judah hae beiknaw kya langmawlya ka hiinnaw kong kha phe na thae vae oh. Pachia khriccaawbuu kha vawsawnaw ka pya zah ro lan ka la zuakuh.Ref 1.13: Loc 8.3, 22.4-5, 26.9-11
14 Judah phung zuinaw kyaze ka minphuin hae laku kya kamaw te kae ruikheih hae paw patae laeze ka zuakuh hua zah ka minpaaw hae phungzae kha myaryamaw ka pankhae.Ref 1.14: Loc 22.3
15 Thuasalama ka pui mawze kae kha yn po zah a thawccinaw liate yn kotupaw Pachia nynh Ref 1.15-16: Loc 9.3-6, 22.6-10, 26.13-18
16 Zenta hae laku kya a Ccapaw kong kha phy khylan tuh-e a Ccapaw tuh ka kya yn langsahpyaku, te kae nynh hum sanmah tuanaw ka ngiakuh khyh.
17 Kae ka mawze locceihtu lang a la tangty hae paw kalan Jerusalem lang mah ka cceihthung khyh; Arabia ram lang nynh palou ka ccia; oute Damaskas khua lang bua ka ki.
18 Tukoute kum thum aro koute Peter te tungku khylan Jerusalem lang ka cceihthung zah, amaw te nin haw lae pangaw kae umkheih.Ref 1.18: Loc 9.26-30
19 Bawipaw a neitaw James holeite ccangpaw locceihtu hae hum sanmah ka muih khyh.
20 Nae kalan ka zeipaw hynh ka hynpaw thua khyh cipaw Pachia malang ka ho ngan.
21 Tukoute Siria ram te Silisia ram lang ka cceih.
22 Judea ram kyaze Khri kya um hae paw khriccaawbuu hae nynh kae kha yn muih loh khyh hae.
23 Ming hae nynh, “Langmawlya aening oun tuaa oun sahtupaw nynh atu tuh langmawlya ro lan a zuakupaw zynnaw kong kha a ho cciamang,” cite a ho hae paw kyalya kha minmin nynh a thae hae.
24 Kae ka keiccuze minmin nynh Pachia kha the a hoysah hae.