1 Bezalel, Oholiab te beikinnthyaa saknaw kya ryalaw ccangkhakheit kha pawte cyi lan cipaw Bawipaw nynh cyithyanaw te nythyanaw a pya hae paw miakaw nynh Bawipaw kawpyapaw balyn thyhte a lah cih hae.

2 Bezalel, Oholiab te Bawipaw nynh cyithyanaw pya hae zah ryalaw khylan ccia lan a thinlung kya lungthonaw a hoipaw miakaw kha Moses nynh a ko hae; 3 beikinnthyaa kya ryalaw nawlan cite Israel hae nynh lungthote oun ccyng hae paw ahlu balyn kha minmin nynh Moses kyate a mue hae. Lungthote a pya hae paw ahlu kha Moses kalan awkhua takyh palei a thuakhae ung hae, 4 beikinnthyaa kya ryalaw aphuinphuin lah hae paw acyihthya hae paw balyn tuh rya a lawnaw hae kyate bebe oun cceih hae zah, 5 Moses kyakhe, “Bawipaw nynh cyi lan kaw yn pyapaw rya kha law nawlan cite ccungccaw hae nynh oun ccyng hae paw tuh azaw laelan alunghua vae,” a cipya hae. 6 Tukeiccuze Moses nynh, “Pise nynh mah, nopi nynh mah beikinnthyaa hanlan pawpaw ahlu mah hlu nan vae oh,” cite kawpya hae zah ryahmin lang balyn a hosahpya hae. Tukeiccuze ccungccaw hae kha ahlu pya lan a khee hae; 7 pawccecize minmin nynh ahlu kha ryalaw balyn law nawlan azaw laelan a la pya vae hae.

8 Ryalahtu hae lakuze ryalaw apuakuh hae paw nynh beikbu kha zokhawpaw boei zung haw te a rae hae; tuh-e boei hae tuh nebaleihpaw laaw asiapaw, meizong, sephaphuhpaw, asepaw khate a kua hae paw thua zah tuh-e boei hae kyakhe cherubim kha kou puithya lan a soi hae. 9 Tuh-e zokhawpaw boei zung kheit cci tuh dong kuin lae tarya sae zah dong pali ako; tuh-e boei hae tuh asaepaw te akopaw phe lokuh hae.

10 Tuh-e boei zung pangaw tuh pynkheihlan piade hae zah ccangpaw zung pangaw kha mah pynkheihlan a piade hae. 11 Masaty a huidepaw boei hae kyaze atelangkou umpaw boei dung kyakhe meizong bawtary hae kha a rae hae; tuhawte ccangningnaw a huidepaw boei kyaze atelangkou umpaw boei dung kyakhe bawtary hae kha a rae hae; 12 masaty e boei zung kheit kyakhe bawtary sung pangaw a rae, te a huidepaw boei ccangningnaw kyaze atelangkou umpaw boei dung kyakhe bawtary sung pangaw kha a rae; bawtary hae kha ccangkheit te ccangkheit a hawiliasakuh hae. 13 Te bawnawpaw sung pangaw kha sui te rae hae zah, tuh-e te zokhawpaw boei hae kha a piade hae; tukeiccuze beikbu tuh bu kheit lang a tang vae.

14 Moses nynh beikbu avawlan te bong lanpaw kha miaa ming te boei zung haw lae kheit a rae. 15 Tuh-e boei zung kheit cci tuh dong sung thum sae zah dong pali ako; tuh-e boei zung haw lae kheit tuh asaepaw te akopaw a lokuh hae. 16 Zung pangaw kha pynkheihlan piade zah zung taruh kha pynkheihlan a piade. 17 Pynkheihlan a huidepaw kyaze atolang kou umpaw boei dung kyakhe bawtary sung pangaw kha a rae, te ccangpaw a huidepaw boei a dung kyakhe bawtary sung pangaw kha a rae. 18 Ahuidekuhpaw boei hae kha pynkheihlan piade nawlan bawnawpaw sung pangaw kha sohin te a rae, tuhteze nynh bu kheit lang a tang kho cih. 19 Te bu bong lanpaw anangkuhpaw tuutepaw phua kha thuasah, bu avawlankou kya bong lanpaw kha ahoypaw saving kha thuasah a rae. 20 Oute eri thing te a thadynpaw pang hae kha beikbu hanlan a rae. 21 Pang phe kheit cci tuh dong haw sae zah dong kheit khoi a ko. 22 Pang hae tuh pynkheihlan piade nawlan pang phe kheit cci kyatuin ruhpaw pangreih ccangning cci a um; beikbu kya-e pang hae balyn hanlan tuhcite a rae. 23 Beikbu hanlan pang hae kha rae zah alia lang hanlan pang phe haw kha a rae; 24 Ngun te raepaw ccusy sung pali kha pang phe kuin akaw khe a rae, tuh-e tuh pang phe kheit kya umpaw pangreih ccangning hanlan ccusy ccangning cci nynh thua. 25 Beikbu palung lang kyakhe pang phe kuin hanlan 26 ngun te raepaw ccusy sung pali kha, pang phe kheit akaw khe ccusy ccangning cci a um lante a rae. 27 Beikbu a nulang, niccaw langsang khe pang phe taruh kha a rae. 28 Beikbu a nulang umpaw apaki hae hanlan pang phe ning kha a rae. 29 Tuh-e pang hae aleihpaw kya tuh lahsahku hae zah a dung lang umpaw masaty e bawtary kyakhe a besahku hae; aning nynh apaki san ning hanlan pang phe ning kha tuhcite a rae. 30 Ou tuhte pang phe tarya kya tuh, pang phe kheit cci kyaze ccusy ccangning ccite, ngun te raepaw ccusy haw lae taruh a um.

31 Te beikbu voikheit lang umpaw pang hae hanlan eri pangccaw ccaw pangaw kha a rae, 32 te beikbu kyaze ccangpaw voikheit lang umpaw pang hae hanlan pangccaw ccaw pangaw kha rae zah beikbu anulang, niccaw lang umpaw pang hae hanlan pangccaw ccaw pangaw kha a rae. 33 Voikheit lang kyate voikheit lang kyacia pang hae angankunaw kya hue lanpaw angaelung accaw kha a rae. 34 Pang hae kha sui te a thei hae, te pangccaw hae ruhnaw lanpaw bawtary hae kha mah sui te a rae, tuh-e pangccaw hae kha sui te a thei hae.

35 Zokhawpaw boei kha meizong, sephaphuhpaw te asepaw law asiapaw te kuakuhpaw boei ahoypaw khate rae zah tuh-e boei kyatuin cherubim azuh kha kou puithya lan a soi. 36 Tuh-e boei zo nawlan eri thingtung tung pali kha rae zah sui te a thei hae; tuh-e tung hae kyatuin bawnawpaw hae kha sui te a rae, te tung hae hanlan ngun te raepaw ccusy ccangpali kha mah a rae. 37 Buu thuakaw kya zokhaw lanpaw kha meizong, sephaphuhpaw, asepaw, nebaleihpaw laaw asiapaw te akuakuhpaw khate zokhawpaw boei kha rae zah, phynbang te kou puithya lan a ccaan; 38 te tuh-e boei hanlan tuh bawnawpaw a umpaw thingtung tung pangaw kha a rae. Tung adung lang te aleihpaw lang kha sui te a thei hae, thuasalama tung accusy ccangpangaw kha tuh sohin te a thei.