32
Sui Vaetuataw
(Deu 9.6-29)
1 Moses tuh mua vawlan te rungbung leite khaw cia aro vae cipaw kha ccungccaw hae nynh he a nyh hae tuh, Aaron pe khe oun sueluakuh hae zah, “Kae malang a cceih cih paw pachia hae kha kaening hanlan oun raepah; Izip ram kyate oun poukhaepaw Moses hynh pawte acyiku vae cipaw kae nyh khyh,” a cipya hae.Ref 32.1: Loc 7.40
2 Aaron nynh minmin kha, “Nae zu hae, nae ccapaw hae te nae ccanung hae nynh a huingkuh hae paw sui nakuahuing hae kha oun khah oh lah kamaw kalan oun cciakhae oh,” a cipya hae.
3 Tukeiccuze ccungccaw balyn nynh mih nakua kya-e sui nakuahuing hae kha khahku hae zah Aaron kalan a cciakhae hae.
4 Aaron nynh minmin kya-e sui kha lah zah a tuisah koute raenawpaw khate vaetuataw zohtuh ccangkheit kha a rae;Ref 32.4: 1Si 12.28; Loc 7.41 te minmin nynh, “Pou Israel, e pachia hae tuh nang kha Izip ram kyate ae poukhaepaw na pachia hae nynh thua!” a ci hae.
5 Aaron nynh tuh-e a cyisahnaw hae kha he a muih tuh, tuh-e zohtuh malang khe silawhang ccangkheit kha a rae; te Aaron nynh, “Awkhualan tuh Bawipaw hanlan poitua nin athua cih,” a cipya hae.
6 Minmin nynh awkhualan nin kya tuh awkhua takaw te tho hae zah maee-u te pyanaw kha rae hae zah ccawkunaw silawnawpaw hae kha a thuakhae hae; te ccungccaw hae tuh ae khylan te nia khylan a haung hae, te hoysah khylan a thokuh hae.Ref 32.6: 1Ko 10.7
7 Bawipaw nynh Moses kha, “Arangte la cceihbung! Izip ram kyate na poukhae hae paw na ccungccaw hae tuh a ccouseikuh vae hae;
8 zui lan kaw ka pya hae paw laanpi kyate arangte a maeleihkuh vae hae; vaetuataw kha raekute beik hae zah tuh-e kalan khe si a lawku hae, te ‘Pou Israel, e pachia hae tuh nang kha Izip ram kyate ae poukhaepaw na pachia hae nynh thua!’ cite a hoku hae,” a cipya.
9 Bawipaw nynh Moses kha, “E ccungccaw hae tuh mih lungkhungpaw ccungccaw hae nynh thua hae cipaw ka ny vae hae.
10 Ka thinrianaw tuh maee lang rua zah minmin kha phe ka maemih ccaw hae, ka makhaete yn umsah; te nang kha minphuin lepaw lang kae rae cih,” a cipya.
11 Thuasalama Moses nynh Bawipaw a Pachia kha, “Pou Bawipaw , alepaw na huhan te thuasah, athawsaepaw na kuih te thuasah, Izip ram kyate na cciakhae hae paw na ccungccaw hae tungvaw kya pawcce na thinrianaw tuh maee lang a rua?Ref 32.11-14: Nam 14.13-19
12 ‘Israel hae kha mua hae kya chia khylan te laephipi kyate maemih khylan Bawipaw nynh a cciakhae hae paw tuh ahoy leipaw paccynnaw nynh thua,’ cite Izip hae nynh pawcce a ho cih hae? Na thin myarya rianaw kyate ngaesiku tua; na lungpaleihkuh lah na ccungccaw hae tungvaw ronaw kha thuasah nan.
13 ‘Na ciihan tuh vaawlui e awsi hae zeih ka pungzae sah cih, bya kae kinpyakupaw e ram balyn hynh na ciihan hae kalan ka pya cih hae zah minmin nynh rho lang zungzae a ccou cih hae,’ cite namaw ccaccei nynh thya na lawpahku hae zah na hopya hae paw na ryalahtu hae, Abraham, Isak te Israel kha liathui hae,” cite ngia zah a hopya.Ref 32.13: Gen 22.16-17, 17.8
14 Te Bawipaw nynh a ccungccaw hae tungvaw a paccynpaw ronaw thuasah lanpaw kyate a lung a paleihku.
15 Oute Moses nynh nulang malang san ning maw te azeikuhpaw byakin lungphe phe ning kha ccyngte maeleihkuh zah mua kyate a cceihbung vae.
16 Tuh-e lungphe hae tuh Pachia nynh a raepaw thua zah lungphe hae vawlan azeikuhpaw ccaw mah Pachia nynh a zeipaw nynh thua.
17 Ccungccaw hae nynh a siarua hae paw kha Joshua nynh he a thae tuh, Moses kha, “Ryahmin kya rhawtukkunaw roi athan,” a cipya.
18 Thuasalama Moses nynh,
“Tuh-e roi tuh rhaw
a tae hae paw roi thua khyh,
a shung hae paw roi mah thua khyh;
ka thaepaw roi tuh
hlawsah hae paw roi nynh thua,” a ci.
19 Moses nynh ryahmin pe a thua takaw te, vaetuataw zohtuh te a law hae paw kha he a muih tuh a thinrianaw kha maee lang a rua, te lungphe hae kha a kuih kyate vua zah mua leihpaw khe phe a koi hae.
20 A raeku hae paw vaetuataw kha lah zah maee te a u, maeeloi lang phe tang lan palae tui sah zah maeeloi kha tui vawlan a phing koute Israel hae kha a niasah hae.
21 Moses nynh Aaron kha, “E ccungccaw hae nynh na tungvaw kya paw cyih hae zahte mou, nang nynh myarya alepaw seinaw hynh mih tungvaw na thuakhae?” a cipya.
22 Aaron nynh, “Ka bawipaw, na thinrianaw kha maee lang rua nan sah; e ccungccaw hae mih tuanaw tuh hoyleinaw kya nynh a um cipaw phe na ny.
23 Minmin nynh, ‘Kae malang a cceih lanpaw pachia hae kha oun raepah; Izip ram kyate oun cciakhaepaw Moses tungvaw paw nynh acyihkuh cipaw kae nyh khyh,’ yn cipya hae.
24 Kae nynh minmin kha, ‘Sui a hoipaw humhung zemah khahkuh oh!’ cite ka hopya hae; tukeiccuze minmin nynh sui kha yn pya hae, tuh-e sui tuh maee lungkhu lang ka phung zah, e vaetuataw lang yn tang,” a cipya.
25 Aaron nynh ccungccaw hae kha mih rhawpaw hae malang khe mih rythyte a um sah hae keiccuze mih rythyte a um hae paw kha Moses nynh he a muih tuh,
26 Moses nynh ryahmin thuakaw kya thadyn zah, “Hummou Bawipaw kalan a pan? Ka kalan oun cceih oh!” a ci. Te Levi phin hae balyn tuh Moses pe khe a sueluakuh hae.
27 Moses nynh Levi minphuin hae kyakhe, “Israel Pachia Bawipaw nynh hynhte a ho, ‘Nae thaloi raveih kha lawkuh oh! Thuakaw ccangkheit koute ccangkheit, ryahmin a nulang a malang phe lekuh lan cceih oh lah nanning lu kheit cci nynh nae unopaw, nae bangpaw, te nae innpaw kha theih oh,’ a ci,” cite a hopya hae.
28 Moses nynh kaw a pya hae thyhte Levi phin hae nynh theih hae zah tuh-e nin khe ccungccaw thung thum loukaw a chih hae.
29 Moses nynh, “Bawipaw ryalaw hanlan atunin naemaw te naemaw kha phe na thyaasahku vae oh, nanning lu kheit cci nynh nae ccapaw hae te nae uno hae kha na chia oh, tukeiccuze atunin naemaw te naemaw kha hythuanaw na thuakhaeku vae oh,” a cipya hae.
30 Awkhualan khe Moses nynh ccungccaw hae kha, “Myarya lepaw seinaw kha phe na rae vae oh. Thuasalama Bawipaw kalan ka la cceihthung cih zah nae seinaw hanlan seingaethyanaw kha poh ka rae kho vema,” a cipya hae.
31 Te Moses nynh Bawipaw kalan bua cceih zah, “Pou Bawipaw , e ccungccaw hae nynh myarya lepaw seinaw kha phe a rae vae hae; sui pachia hae kha mimaw hanlan phe a raeku vae hae.
32 Thuasalama mih seinaw kha beih ngaethya hae; na ngaethya kho khyh hae zetuh na zeipaw ccauh kyate ka min kha the ccavae,” a cipya.Ref 32.32: Sam 69.28; Bya 3.5
33 Bawipaw nynh Moses kha, “Ka tungvaw a seipaw humhung zemah ka ccauh kyate a min kha ka the cih.
34 Atu la cceih lah kae hopyapaw hmin kalan khe ccungccaw hae kha la cciakhae hae; ka vaw ccungccaw hae nynh na malang khe a cceih cih hae. Tuhzemah detahnaw nin yn thua vae zetuh mih seinaw hanlan de ka tah cih hae,” a ci.
35 Oute minmin nynh Aaron kha vaetuataw a raesah keiccu hae ze, Bawipaw nynh minmin kha shethya a sawnua hae.