31
Bezalel te Oholiab
(Exo 35.30—36.1)
1 Bawipaw nynh Moses kha hynhte a hopya:
2 Dotua, Judah phin a thuapaw Hur ccapaw Uri a ccapaw Bezalel kha a min te ka ko vae:
3 Amaw kha kuih te raethyanaw aphuinphuin kyaze cyi khonaw, thyanaw te nynaw kha Pachia muisaw te ka biasah vae,
4 Pungsan aphuinphuin soithyanaw, sui, phua te sohin laee thyanaw,
5 lungrua hanlan lung awthyanaw, thingphe te aphuinphuin raethyanaw, kuih te aphuinphuin raethyanaw a hoi.
6 Tuhpiaze amaw ryte Dan phin a thuapaw Ahisamak ccapaw Oholiab kha ka khang vae; kaw kae pyapaw balyn kha minmin nynh a cyi kho nawlan hae, cyithyanaw balyn kha ka pya vae hae:
7 tungkunaw bu, byakin thingkua, tuh-e thingkua vawlan umpaw ahu, bu kya-e uccaw balyn,
8 ccaboi te a uccaw hae, athyaapaw maeekhuatung te a uccaw hae balyn, zimuin unawpaw silawhang,
9 maee-ute silawnawpaw silawhang te a uccaw hae, pakepi te a ccu,
10 Kou hoy lang akuakuhpaw boeining, ranpibawi rya a lawnaw hae paw, ranpibawi Aaron kya-e athyaapaw boeining te a ccapaw hae boeining,
11 thuhkupaw chitui te hminthyaa hanlan amynthuapaw zimuin kha a rae cih hae, a cipya. Nang kha kaw kae pya thyhte minmin nynh a cyih cih hae.
Sabbath Kawbya
12 Bawipaw nynh Moses kha hynhte a hopya:
13 Namaw ccaccei nynh Israel hae kha hynhte na hopah cih hae: Bawipaw nynh, “Ka sabbath nin hae kha na nawsah cih oh, pawccecize sabbath nin tuh nae she balyn kya kae te nanning laku kya-e muihsahnaw thua zah, kae, Bawipaw nynh nanning kha kae thyaasah oh cipaw na ny nawlan oh, kae pya oh paw nynh thua.
14 Nanning elang sabbath nin tuh athyaapaw athua keiccuze na nawsah cih oh; sabbath nin kha a thusahpaw miakaw tuh chia a thua cih; sabbath nin kya ryalaw a lahpaw tuh a minphuin laku te vua a thua cih.
15 Nin taruh lungkhu ryalaw na lah cih oh, thuasalama nin sarinaw nin tuh athyaapaw haeung nin, sabbath nin thua zah Bawipaw hanlan athyaapaw nynh thua; sabbath nin kya ryalahpaw humhung zemah chia a thua cih.Ref 31.15: Exo 20.8-11, 23.12, 34.21, 35.2; Lev 23.3; Deu 5.12-14
16 Tukeiccuze Israel hae nynh sabbath nin kha a nawsah cih hae, mih she balyn kya zungzae tynpaw byakinnaw lante a nawsah cih hae.
17 Sabbath nin tuh kae te Israel hae laku zungzae hanlan muihsahnaw nynh thua, pawccecize Bawipaw nynh nin taruh lungkhu vaaw te laephi kha a rae, te nin sarinaw nin khe haeung zah a thaw a thuasahku,” a ci.Ref 31.17: Exo 20.11
Byakin Lungphe Phe Ning
18 Pachia nynh Moses kha Sinai Mua vawlan khe bya he a hopah koute, byakinnaw lungphe phe ning, Pachia kuihdung te a zeipaw lungphe hae kha Moses kalan a pya.