29
Ranpibawi hae Ordain Pyanaw
(Lev 8.1-36)
Aaron te a ccapaw hae nynh ranpibawi lante kamaw kha rya oun lawpya ccaw hae cite, minmin kha na thyaasah vae hae ze, mih tungvaw khe hynhcite na cyih cih. Ccaenaw um leipaw tangnuapaw anopaw sa kheit te tuutepaw anopaw sa ning kha na lah cih, te ransi phing leipaw sanlou, ransi phing leite chitui te raepaw sanlou aphepaw te ransi phing leite chitui thuhpaw sanlou apahpaw kha na lah cih. Tuh-e hae tuh ahoy huapaw chanvuih akhui te na rae cih. Tuh-e sanlou hae tuh sua ccangkheit kya na sang cih zah tangnuapaw te tuutepaw sa ning kha nae pya cih. Aaron te a ccapaw hae kha tungkunaw bu thuakaw kalan nae cciakhae cih hae zah tui na sing cih hae. Oute ranpibawi boeining hae kha na lah cih zah ranpibawi angki kya-e angkiccua, ranpibawi angki te bybe kha na lawsakuh cih zah, ranpibawi angki kya-e ccaanpaw bytaeccia kha na cciasakuh cih; te a lu kyakhe pungde kha na khungsakuh cih zah athyaapaw sui aphepaw kha pungde vawlan khe na bede cih. Thuhkupaw chitui kha na lah cih, te a lu vawlan na bu cih zah amaw kha na thuh cih. Oute a ccapaw hae kha na ko cih hae zah angki na kisakuh cih hae, taeccia kha na cciasakuh cih hae zah lukhung kha na khungsakuh cih hae; zungzae tynpaw phungzae liate ranpibawi thuanaw tuh minmin kya-e athua cih. Tuhcite Aaron te a ccapaw hae kha ranpibawi lang ordain na pya cih hae.
10 Tangnuapaw kha tungkunaw bu malang na cciakhae cih. Aaron te a ccapaw hae nynh mih kuih kha tangnuapaw a lu vawlan khe a khang cih hae, 11 te tangnuapaw kha tungkunaw bu thuakaw kya Bawipaw malang khe na theih cih, 12 tuh-e tangnuapaw chii abang kha na lah cih zah silawhang a ki hae kyakhe na kuihdung te na noi cih, te alaepaw chii balyn kha silawhang aleihpaw khe na bu cih. 13 Aring hae abongpaw atho balyn, athin kya athualaepaw te akin ccangning te akin vawlan e atho kha na lah cih zah silawhang vawlan maee te na u cih. 14 Thuasalama asaw, aphua te aringkua hae kha ryahmin atolang khe maee te na u cih; e tuh seishawnaw silawpaw nynh thua.
15 Oute tuutepaw sa kheit kha na lah cih zah Aaron te a ccapaw hae nynh mih kuih kha tuutepaw a lu vawlan a khang cih hae, 16 te tuh-e tuutepaw kha na theih cih, a chii kha na lah cih zah silawhang kha po voilu lan na thei cih. 17 Oute tuutepaw saw kha pong na tya cih, aringkua hae te a ccu hae kha na sing cih hae zah na tya hae paw ryte a lu ryte na nungkheih cih hae, 18 te tuutepaw apyn balyn kha silawhang vawlan khe maee te na u cih. E tuh Bawipaw kalan maee-ute silawnaw nynh thua; e tuh lungry a tungpaw mynkhuhpaw, Bawipaw kalan maee te silawnaw nynh thua.Ref 29.18: Efe 5.2; Fil 4.18
19 Ccangpaw tuutepaw kha na lah cih; Aaron te a ccapaw hae nynh mih kuih kha tuh-e tuutepaw a lu vawlan khe a khang cih hae, 20 te tuh-e tuutepaw kha na theih cih, a chii abang kha na lah cih zah Aaron te a ccapaw hae mih ranglang nakua kha thuasah, mih ranglang kuihpi te mih ranglang ccupi kha thuasah na noi cih hae, te alaepaw chii khate silawhang kha po voilu lan na thei cih. 21 Oute silawhang vawlan umpaw chii abang te thuhkupaw chitui abang kha na lah cih zah Aaron te a boeining kya thuasah, a ccapaw hae te mih boeining kya thuasah, na thei cih hae; tetuh Aaron te a boeining thuasah, a ccapaw hae te mih boeining thuasah athyaa vae cih.
22 Tuutepaw atho, atho athualaepaw, aringkua hae abongpaw atho, athin kya athualaepaw, akin ccangning te akin hae vawlan umpaw atho te a ranglang phae kha na lah cih hae, (pawccecize e tuutepaw tuh ordain pya nawlan mangpaw nynh thua), 23 Bawipaw malang umpaw ransi phing leipaw sanlou abawng lungkhu e sanlou phe kheit, chitui te raepaw sanlou phe kheit, te sanlou apahpaw phe kheit kha na lah cih; 24 te tuh-e hae balyn kha Aaron kuih kya te a ccapaw hae kuih kya na nung cih zah Bawipaw malang khe hangthung-hebiate silawnaw lante na hang cih hae. 25 Tukoute mih kuih kyate tuh-e hae tuh na lah cih zah Bawipaw malang mynkhuhpaw a thua nawlan, silawhang vawlan maee-ute silawnawpaw vawlan khe maee te na u cih; tuh-e tuh Bawipaw malang maee te silawnaw nynh thua.
26 Aaron kha ordain pya nawlan mangpaw tuutepaw aby kha na lah cih zah Bawipaw malang hangthung-hebiate silawnaw lante na hangthung cih; tuh-e tuutepaw aby tuh na ccou lanpaw a thua cih. 27 Aaron te a ccapaw hae kha ordain pya nawlan mangpaw tuutepaw kya-e hangthung-hebiate silawnaw lante hangthung athua hae paw aphae te aby kha na thyaasah cih. 28 Tuh-e aby te aphae tuh Aaron te a ccapaw hae hanlan Israel hae kyate hlupaw zungzae tynpaw phungzae athua cih, pawccecize tuh-e tuh pyapaw thua zah Israel hae nynh ccawkunaw silawnaw kya-e si a lawnaw hae paw kyate Bawipaw kalan a pya hae paw pyapaw athua cih.
29 Aaron kya-e athyaapaw boeining kha amaw koute a ccapaw hae kalan pyasya athua cih hae; tuh-e boeining a lawkuh hae paw minmin kha chitui thuh a thua cih hae zah ranpibawi lang khang a thua cih hae. 30 Aaron ccelang ranpibawi lang atangpaw a ccapaw nynh hminthyaa kya ryalaw khylan tungkunaw bu lungkhu lang he a tee vae ze, tuh-e boeining kha nin sari lungkhu a lawkuh cih.
31 Ranpibawi lang ordain pyanaw hanlan mangpaw tuutepaw kha na lah cih zah, a saw kha hminthyaa kyakhe na thung cih; 32 te Aaron te a ccapaw hae nynh tuutepaw saw te abawng lungkhu umpaw sanlou kha tungkunaw bu thuakaw pe khe a ae cih hae. 33 Minmin kha ranpibawi lang ordain pya khylan te thyaasah khylan, seingaethyanaw hanlan mangpaw looh kha minmin nynh a ae cih hae, thuasalama tuh-e looh tuh athyaa keiccuze minmin rou nynh a ae cih hae. 34 Ordain pyanaw elang mangpaw saw thuasah, sanlou thuasah awkhua cia alae zetuh minmin nynh maee te a u cih hae; tuh-e tuh athyaa keiccuze ae thua lan khyh.
35 Kaw kae pya thyhte Aaron te a ccapaw hae tungvaw na cyih cih; minmin tungvaw ordain pyapaw ranpibawi ryalaw kha nin sari lungkhu po na lah cih. 36 Seingaethyanaw hanlan tangnuapaw sa kheit khate seithyaanaw silawnaw kha nin takyh na rae cih. Tuhcite silawhang elang seithyaanaw silawnaw kha mah na rae cih, silawhang elang seingaethyanaw he na rae vae ze, khah-e kha thyaasah khylan chitui na thuh cih. 37 Nin sari lungkhu silawhang elang seingaethyanaw kha na rae cih zah na thyaasah cih, te silawhang tuh athyaa huaccepaw lan a tang cih; tuh-e silawhang te atungkuhpaw miakaw tuh athyaapaw lang a tang vae cih.
Nin Takyh Silawnaw hae
(Nam 28.1-8)
38 Beikhang vawlan si na law lanpaw tuh: kum kheit acihpaw tuutaw sa ning khate nin takyh zungzae si na law cih. 39 Awkhua ccyh kya tuutaw sa kheit khate si na law cih zah zete ccyh kya ccangpaw sa kheit khate si na law cih; 40 te masaty e tuutaw kha oliv chitui hin kheit kya-e pum pali pum kheit te apykuhpaw, vaekhui ahoypaw tounawpaw kaw kheit kya-e pumhaw pumkheit ryte thuasah, te niapaw silawnaw hanlan misutui hin kheit kya-e pum pali pum kheit ryte thuasah si na law cih. 41 Te zete ccyh kya na pya lanpaw ccangpaw tuutaw kha awkhua ccyh kya na pyapaw hawte ccathaete silawnaw te niapawte silawnaw kha na pyabia cih, tuh-e tuh Bawipaw kalan maee-ute silawnaw mynkhuhpaw nynh thua. 42 E tyty raepaw maee-ute silawnaw hynh Bawipaw malang, tungkunaw bu thuakaw kyakhe nae she takyh kya zungzae na rae cih oh, tuh-e hmin tuh nanning kha kae tungkuh oh zah bya kae hopyanaw oh hmin athua cih. 43 Tuin kyakhe Israel hae kha ka tungkuh cih hae zah, ka phu-enaw liate tuh-e hmin tuh thyaasah athua cih; 44 tungkunaw bu te silawhang kha ka thyaasah cih; kamaw hanlan ranpibawi lante ryalawpya khylan Aaron te a ccapaw hae kha mah ka thyaasah cih hae. 45 Israel hae laku khe ka um cih zah mih Pachia ka thua cih. 46 Kae tuh minmin laku um khylan Izip ram kyate a poukhae hae paw mih Bawipaw Pachia nynh ka thua cipaw kha oun nyh cih hae; kae tuh mih Bawipaw Pachia nynh ka thua.