28
Ranpibawi hanlan Boeining
(Exo 39.1-7)
Oute na upaw Aaron kha a ccaaw hae Nadab te Abihu, Eleazar te Ithamar ryte ranpibawi lante kamaw kha ryalawpya khylan Israel hae laku kyate na kalan ko hae. Na upaw Aaron nynh a phu-epaw ccaankunaw hanlan athyaapaw boeining hae kha na raepah cih. Te Aaron nynh ka ranpibawi lang a tang ccaw cite amaw kha thyaasah khylan, Aaron boeining kha raethyanawpaw thyahawnaw ka pya hae paw balyn kalan khe tuh-e boeining rae lan na hopah cih hae. Minmin nynh a rae lan hae paw boeining hae tuh: by kya bekuhpaw bybe ccangkheit, ranpibawi angki zung kheit, angkiccua zung kheit, akaw-angki zung kheit, pungde zung kheit te taeccia ccangkheit nynh thua hae. Na upaw Aaron te a ccapaw hae nynh kamaw hanlan ranpibawi rya kha oun lawpya nawlan hae cite a raetu hae nynh e athyaapaw boeining hae kha a rae vae hae ze, sui, te meizong, sephaphuhpaw, asepaw te nebaleihpaw boei kha a mang cih hae.
Ranpibawi Angki
Minmin nynh ranpibawi angki kha meizong, sephaphuhpaw, asepaw tuuming te nebaleihpaw boei khate kou hoy lan a rae cih hae zah sui te a ccaan cih hae. Raw kya bawkunawpaw arui ccangning a um cih zah, tuh-e boeining kyatuin pynkheihlan kyngku khylan malang te nulang tuh akyngkuh cih hae. Ranpibawi boeining hae kya-e ccaanpaw byccia kha mah tuh-e boeining hawte sui te thuasah, meizong, sephaphuhpaw, asepaw tuuming te akuakuhpaw nebaleihpaw boei ahoypaw te thuasah rae athua cih. Oniks lung ccangning kha na lah cih zah lung hae vawlan khe Israel ccapaw hae mih min kha, 10 lung ccangkheit kyakhe lu taruh min, ccangpaw lung ccangkheit kyakhe tuhlaepaw lu taruh min kha atawccaw tahyhte na zei cih hae. 11 Sui laee thya hae paw nynh tazeih a rae hae hawte, Israel ccapaw hae mih min kha lung ccangning kyakhe na zei cih hae zah sui ang kya na nung cih hae. 12 Israel ccapaw hae kha ning khyh nawlan cite tuh-e lung ccangning kha athyaapaw angki araw kya bawkunawpaw arui kyakhe na huide cih hae; te Aaron nynh tuh-e min hae kha Bawipaw malang a raw vawlan khe liathui nawlan a vawkuh cih. 13 Sui ang kha sui te na rae cih hae, 14 te liarue hawte ruekuhpaw arui ccangning kha sui ccipaw te na rae cih; tuh-e aruekuhpaw sui rui hae kha sui ang kyakhe na khiide cih hae.
Bybe
(Exo 39.8-21)
15 Byapianaw bybe kha kou hoy lan na rae cih; tuh-e bybe kha sui te thuasah, meizong, sephaphuhpaw, asepaw tuuming te thuasah, nebaleihpaw boei te thuasah ranpibawi angki hawkhate na rae cih. 16 Tuh-e bybe asaepaw te akopaw tuh alokuh cih zah, thyh ning lan bipaw a thua cih, khaw kheit asae cih zah khaw kheit ako cih. 17 Bybe kyakhe aphutepaw lung kha ring pali lante na bede cih; masaty aring kya tuh rubi, topaz te karnet a thua cih hae; 18 ring ningnaw kya tuh emeral, safaiar te daimon a thua cih hae; 19 ring thumnaw kya tuh jasin, agate te amethist a thua cih hae, 20 te ring palinaw kya tuh beril, oniks te jasper a thua cih hae; tuh-e hae tuh sui ang kyakhe nung athua cih hae. 21 Israel ccapaw hae min azeikuhpaw lung ccanghaw lae ning a um cih; tuh-e hae tuh minphuin phuin haw lae ning hanlan lung ccangkheit kyaze min minkheit ccite zeipaw a thua cih zah tazeih hawte a thua cih hae. 22 Te liarue hawte ruepaw sui rui kha sui ccipaw te bybe hanlan na rae cih; 23 te sui bawtary ccangning kha bybe hanlan na rae cih zah bybe apaki san ning kyakhe na tyngde cih hae. 24 sui rui ccangning kha bybe apaki kya umpaw sui bawtary ccangning kyakhe na khii cih hae; 25 sui rui ccangning a dung hae kha sui ang ccangning kyakhe na khii cih hae zah ranpibawi angki araw kya bawkunawpaw arui malang khe na tyngde cih. 26 Sui bawtary ccangning kha na rae cih zah, ranpibawi angki alia lang umpaw bybe alia lang e apaki san ning kyakhe na tyngde cih. 27 Sui bawtary ccangning kha na rae cih zah ranpibawi angki araw kya bawkunawpaw ccangning malang alia lang kyakhe na tyngde cih, tuh-e tuh ranpibawi angki kya-e ccaanpaw byccia avawlan khe tyngde athua cih. 28 Bybe kya-e sui bawtary ccangning kha ranpibawi angki kya-e sui bawtary hae kyakhe meizong arui te khiide a thua cih, tuhcite bybe tuh byccia avawlan khe a um cih zah bybe tuh ranpibawi angki kyate phoukuh vae lan khyh. 29 Te Bawipaw nynh Israel hae kha zungzae a ning khyh nawlan hae cite, Aaron nynh hminthyaa lungkhu lang he a ccia vae ze, byapianaw bybe kya umpaw Israel ccapaw hae mih min kha a thinlung vawlan khe a um cih. 30 Byapianaw bybe vawlan khe Urim te Thummim kha na nung cih hae, tuh-e hae tuh Aaron nynh Bawipaw malang he a tee vae ze, a thinlung vawlan khe a um cih hae; tuhcite Aaron nynh Israel hae hanlan byapianawpaw kha a thinlung vawlan Bawipaw malang zungzae a phukuh cih.Ref 28.30: Nam 27.21; Deu 33.8; Ezr 2.63; Neh 7.65
Ccangpaw Ranpibawi Boeining hae
(Exo 39.22-31)
31 Ranpibawi angki avawlan te bongpaw uccaw kha abalynte meizong khate na rae cih. 32 Tuh-e angki angaelung khe lu hoihku nawlan a ua san kheit a um cih, tuh-e a ua tuh seikuh nan sah cite po voilu lan kuapaw boei te angkile a nging hawkhate mia a thua cih. 33 Tuh-e uccaw alia langkhe meizong, sephaphuhpaw, asepaw te raepaw ccalee thae kha thuasah, sui khinling hae kha thuasah po voilu lan na nung cih hae. 34 Tuh-e uccaw alia langkhe sui khinling kha ccalee thae te po voilu lan ataeleihkuh lante na sae cih. 35 Aaron nynh silawpaw rya a law vae ze, tuh-e uccaw tuh a lawkuh cih zah hminthyaa lungkhu lang Bawipaw malang a tee vae ze thuasah, a pou vae ze thuasah khinling roi tuh thae a thua cih, tuh-e tuh Aaron a chi khyh nawlan nynh thua.
36 Sui ccipaw te aphepaw ccangkheit kha na rae cih zah, avawlan khe “Bawipaw hanlan Athyaapaw,” cite tazeih khiapaw hawte na zei cih. 37 Tuh-e tuh meizong arui te pungde a malang khe na heede cih. 38 Aaron nynh tuh-e pungde tuh a terui kya a khungkuh cih zah Israel hae nynh athyaapaw ahlu lante a pya hae paw athyaapaw pyanaw kya umpaw seinaw ccangkhakheit kha Aaron nynh a cciakhae cih; minmin nynh Bawipaw malang maehoynaw a mue ccaw hae cite tuh-e pungde tuh Aaron terui kya zungzae a um cih.
39 Angki kha ahoypaw law te na kua cih, te pungde kha mah ahoypaw law te na kua cih zah, taeccia kha phynbang te kou puithya lan na ccaan cih.
40 Aaron ccapaw hae mih phu-e nawlan te a puithya nawlan hae, angki, taeccia te pungde kha na raepah cih hae; 41 Tuh-e uccaw hae tuh na upaw Aaron te a ccapaw hae kha na lawsakuh cih hae, te ranpibawi lante kamaw kha ryalawpya khylan minmin kha chitui na thuh cih hae, ordain na pya cih hae zah na thyaasah cih hae. 42 Maethya lan umpaw mih ngesaw kha a khaw ccaw cite minmin elang cce kyate phae kyacia athuapaw ccuhoih dynpaw kha na raepah cih hae; 43 Aaron te a ccapaw hae nynh tungkunaw bu lungkhu lang a ccia hae ze thuasah, hminthyaa kya silawpaw rya kha law khylan silawhang pe lang a thua hae ze thuasah tuh-e ccuhoih dynpaw kha a lawkuh cih hae; tuhkhyhze tuh minmin nynh seinaw kha mih tungvaw a cciakhaesei cih hae zah a chihsei cih hae. Hynh-e hynh Aaron te a ciihan hae hanlan zungzae tynpaw phungzae a thua cih.