1 Te meizong, sephaphuhpaw, asepaw law, nebaleihpaw laaw te kuakuhpaw boei zung hawkhate beikbu kha na sak cih, tuh-e boei hae kyakhe cherubim azuh hae kha na soi cih. 2 boei zung kheit tuh dong kuin lae tarya asae cih zah dong pali ako cih; boei hae balyn tuh asaepaw te akopaw alokuh cih hae. 3 boei zung pangaw kha po piakuh lan huide athua cih zah ccangpaw zung pangaw kha mah tuhcih maminte huide athua cih. 4 masaty ahuidekuhpaw boei adung apaki kyakhe meizong bawtary hae kha na rae cih; tuhawte ccangningnaw ahuidekuhpaw boei apaki kyakhe bawtary hae kha na sae cih. 5 Masaty ahuidekuhpaw boei kyakhe bawtary sung pangaw na rae cih zah, ccangningnaw ahuidekuhpaw boei adung kyakhe mah bawtary sung pangaw na rae cih; tuh-e bawtary hae tuh ccangkheit te ccangkheit a hawiliakuh cih hae. 6 Bawnawpaw sung pangaw kha sui te na rae cih zah, tuh-e bawnawpaw te ahuidekuhpaw boei hae kha zung kheit te zung kheit na tungsakuh cih hae, tetuh beikbu tuh bu kheit lang a tang vae cih.

7 Beikbu avawlan daw lanpaw kha miaa ming te akuakuhpaw boei zung haw lae kheit na rae cih. 8 Boei zung kheit cci tuh dong sung thum asae cih zah, dong pali ako cih; boei zung haw lae kheit tuh asaepaw te akopaw phe alokuh cih hae. 9 Boei zung pangaw hae kha na huide cih hae zah, zung taruh hae kha mah na huide cih hae, te zung taruhnaw boei kha beikbu malang avawlan khe thyh ning lang na bi cih. 10 Ahuidekuhpaw boei dung atolang khe bawtary sung pangaw kha na sae cih, tuhawte ccangningnaw boei dung kya mah sung pangaw na sae cih.

11 Boei hae tuh zung kheit lang a tang nawlan, bawnawpaw sohin sung pangaw na rae cih zah, bawtary kyakhe na baw cih. 12 Athualaepaw boei angankuh tuh beikbu nulang khe asaekuh cih. 13 Voikheit voikheit lang athualaepaw boei dong kheit cci tuh beikbu kha bong khylan asaekuh cih. 14 Tuh-e bu bong lanpaw kha anangkuhpaw tuutepaw phua te atolang te bong lanpaw saphua kha na rae cih. 15 Beikbu hanlan eri thing khate athadynpaw pang hae kha na rae cih. 16 Pang phe kheit cci tuh dong haw asae cih zah, dong kheit khoi ako cih. 17 Pang hae kha pynkheihlan tary nawlan pang phe kheit cci kyakhe tarynawpaw pangreih ccangning cci a um cih; tuh-e pangreih hae kha beikbu kya-e pang hae balyn elang na rae cih. 18 Beikbu hanlan pang hae kha na rae cih zah alia lang hanlan pang kha phe kuin na rae cih; 19 te pang phe kuin aleihpaw hanlan ngunphua ccusy sung pali kha na rae cih, pang phe kheit cci kya umpaw pangreih ccangning cci hanlan ngunphua ccusy ccangning cci kha na rae cih; 20 te beikbu palung lang hanlan pang phe kuin kha na rae cih, 21 pang phe kheit ze ngunphua ccusy ccangning ccite sung pali na rae cih. 22 beikbu a nulang, niccaw lang hanlan pang phe taruh kha na rae cih. 23 beikbu a nulang e apaki hae hanlan pang phe ning kha na rae cih; 24 tuh-e pang hae aleihpaw lang tuh alahkuh cih hae, thuasalama adung lang tuh masaty bawtary kya atarykuh cih hae; apaki e pang hae tuh parouhte alokuh cih hae zah, apaki san ning lang a tang cih hae. 25 Tukeiccuze pang phe kheit kyaze ngunphua ccusy ccangning cci a um cih zah, pang phe tarya kya tuh ngunphua ccusy haw lae taruh a um cih.

26 Beikbu voikheit lang e pang hae kha ruh nawlan eri thingccaw ccaw pangaw kha na rae cih, 27 te ccangpaw voikheit lang e pang hae kha ruh nawlan pangccaw ccaw pangaw kha na rae cih zah beikbu anulang niccaw lang e pang hae hanlan pangccaw ccaw pangaw kha na rae cih. 28 Pang angaelung kya ahuekuhpaw, angaelung e pangccaw tuh voikheit lang dung te voikheit lang dung cia phe adia cih. 29 Pang hae kha sui te na thei cih, pangccaw hae ruhnawpaw sui bawtary kha na rae cih; te pangccaw hae kha sui te na thei cih hae. 30 Mua vawlan kae muihsahpaw accinccang thyhte beikbu kha na sak cih.

31 Apiazon, sephaphuhpaw, asepaw law, nebaleihpaw laaw te kuakuhpaw zokhawpaw boei kha na rae cih; tuh-e boei tuh kou hoy lan soikuhpaw cherubim azuh khate ccaan athua cih. 32 Tuh-e boei kha sui te atheikuhpaw eri tungpi ccangpali vawlan khe na zo cih, tuh-e tungpi hae kyakhe sui te raepaw bawnawpaw hae te ngunphua te raepaw ccusy ccangpali vawlan abingkuhpaw tung hae a um cih. 33 Boei bawnawpaw hae zakaw khe boei kha na zo cih, te byakin thingkua kha azokuhpaw boei alungkhu lang na teekhae cih; te boei nynh hminthyaa te hminthyaa huapaw kha a riadaw cih.Ref 26.33: Heb 6.19, 9.3-5 34 Hmin thyaa huaccepaw kya umpaw byakin thingkua kha ahu na hu cih. 35 Ccaboi kha azokuhpaw boei atolang khe na nung cih zah, maeekhuatung kha beikbu alia lang, ccaboi te arawsekunaw khe na nung cih; te ccaboi kha palung langkhe na nung cih. 36 Apiazon, sephaphuhpaw, asepaw law, nebaleihpaw boei khate phynbang te kou puithya lan ccaan athuapaw zokhawpaw boei kha bu thuakaw lang na rae cih. 37 Tuh-e boei hanlan eri thing te raepaw tung ccangpangaw kha na rae cih zah sui te na thei cih; tuh-e tung hae nynh sui te raepaw bawnawpaw hae kha a hoi cih hae, te tuh-e tung hae hanlan sohin ccusy ccangpangaw kha na rae cih.