2
Moses Puinaw
(Heb 11.23)
1 Levi phin kya-e pisepaw lu kheit tuh Levi phin nopinung lu kheit te zuvaw lang a tang hae.
2 Nopinung nynh ccaawpoi zah ccapise lu kheit a saah; aning tuh a pynrua hoypaw ccaaw nynh thua cipaw a nung nynh he a muih tuh, imua kha sawpaw sah thum cia a thuruh.Ref 2.2: Loc 7.20; Heb 11.23
3 He a thuruh kho vae khyh tuh, phaekute a sah hae paw abawng kha lah zah thingphi kha athuh. Te abawng lungkhu khe imua kha sang zah vawkhu pe lonua ahang hae paw laku khe a nung.
4 A unung tuh a neitawpaw tungvaw pawmah yn cyihkuh cipaw muih khylan asawnaw khate a ngawbia.
5 Faro siapharan ccanung tuh vawkhu lang tuisingku lan yn cceihbung zah a seenung hae ryte vawkhu kin khe a cceih hae. Faro ccanung nynh abawng kha lonua ahang hae paw laku khe muih zah a seenung kha tuh-e abawng law lan a naw.
6 Faro ccanung nynh abawng kha he a hung tuh, imua kha a muih. Imua nynh he a rah tuh, ngaethyaumsah zah, “E imua hynh Hebru hae ccaaw lukhakheit nynh a thua cih,” a ci.
7 Oute imuapaw a unung nynh Faro ccanung kyakhe, “Imua hynh namaw hanlan kua khylan do-oihtu Hebru nopi lu kheit kha kae kopah cih tou?” a cipya.
8 Faro ccanung nynh, “Ou, la ko,” a cipya. Tukeiccuze nopinung taraw nynh cceih zah imua a nung maw kha a kopya.
9 Faro ccanung nynh imua a nung kha, “E imua hynh cciakhae lah kamaw hanlan yn kuapah, nae kuapya mee kha kae pya cih,” a cipya. Tukeiccuze nopinung nynh imua kha cciakhae zah a kuapya.
10 Imua he a le tuh, nopinung nynh imua kha Faro ccanung kalan cciakhae zah aning nynh a ccapaw lang a lawku. Aning nynh imua kha Mosesnote2.10 Moses: cipaw roi hynh Hebru bya te “poh thuaa” cite hopaw roi te nynh aloku. cite min a phu, “Pawccecize tui kyate atolang ka lawkupaw nynh thua,” a ci.Ref 2.10: Loc 7.21
Moses Midian Ram lang A Ccue
(Heb 11.24-25)
11 Moses nynh he yn le tuh, a minphuin hae kalan cceih zah nangsekute ryalah hae paw kha a muih hae. Izip paw lu kheit nynh Moses a minphuin a thuapaw Hebru paw lu kheitpaw a buapaw kha Moses nynh a muih.Ref 2.11: Heb 11.24Ref 2.11-14: Loc 7.23-28
12 Moses nynh a pepan ngawdo zah lu kheit sanmah he a muih khyh tuh, Izip paw kha theih zah laesia kya a thuruh.
13 Awkhualan khe Moses nynh he toikuh tuh, Hebru hae lu ning a ziakuh hae paw kha a muih; te aseipaw lukheitpaw kha, “Pawcce na banpaw Hebru paw kha na zia?” a cipya.
14 Tuh-e paw nynh, “Hung nynh mou nang kha kaening laku uktu lang te byapiatu lang ae nung? Izip paw na chia hawte kae hynh chia lan tou nae ry?” a cipya. Oute Moses nynh rih zah, “Ka cyipaw kha phe yn ny vae hae hynhsa,” cite a tuaku.
15 Faro nynh tuh-e kong kha he a thae tuh, Moses kha chia lan a ccung.Ref 2.15: Loc 7.29; Heb 11.27
Thuasalama Moses tuh Faro kyate phe a ccue. Aning nynh Midian ram kya um zah tuisung pe khe a haung.
16 Midian ranpibawi tuh ccanung lu sari a hoi. Minmin nynh mih paaw kya-e tuu hae te miaa hae kha sahiin nynh tui nianaw kua kyakhe tui the lan zah tui niasah lan cite oun cceih hae.
17 Thuasalama tuurin hae abang oun thua hae zah minmin kha a dee hae. Moses nynh yn thokuh zah tuh-e nopi hae kha pankhaw hae zah mih tuu hae te mih miaa hae kha tui a niasahpya hae.
18 Minmin nynh mih paaw Reuel kalan he a ki hae tuh, mih paaw nynh, “Pawcce atunin taloi nae thua oh?” a ci.
19 Minmin nynh, “Izip paw lu kheit nynh kaening kha tuurin hae kyate oun khum; kaening hanlan tui oun thepah zah kae sahiin hae kha tui a niasah hae,” a cipya hae.
20 Aning nynh a ccanung hae kha, “Tuh-e paw tuh teimou um? Pawcce nae cciataw oh? Looh ae lan amaw kha la ko oh,” a ci.
21 Moses nynh Reuel kya umbua lan a nawccaw, te Reuel nynh a ccanung Zipporah kha Moses zu lang a pya.
22 Zipporah nynh ccapaw lu kheit saah zah Moses nynh Gershom cite min a phu; pawccecize Moses nynh, “Kae tuh ramccang kya a umpaw mikhiapaw nynh ka thua,” a ci.
23 Ccyh hynhsepi aro koute Izip siapharan tuh a chih vae. Israel hae tuh seetangnaw zakaw kya hawkhaekuh hae zah a sia hae. Seetangnaw keiccuze bawmnaw ngiakute a siaruanaw hae tuh Pachia kya phe a thua.
24 Pachia nynh a hawkhaenaw hae roi kha thae zah Abraham, Isak te Jakob kya a la raepaw a byakinnaw kha a liathui.Ref 2.24: Gen 15.13-14
25 Tukeiccuze Pachia nynh Israel hae kha do hae zah minmin konglang kha a tua.