16
Vaawlang te Vamyng
Israel zapi balyn tuh Elim kyate a cceih hae; minmin nynh Izip ram kyate he a pou hae te, sawpaw sah ningnawp\xr 16.1 sawpaw sah ningnaw: cipaw hynh April saw angaelung kyate May saw angaelung cia loukaw nynh thua. \x*, nin haw lae pangawnaw nin khe Elim te Sinai mua laku umpaw Sin laesia ram khe a thua hae. Laesia ram kyakhe Israel zapi balyn nynh Moses te Aaron kha ccohnuakuh hae zah, Bawipaw kuih te Izip ram kya kae chi ze ahoyhua. Izip ram kya tuh saw thungnawpaw ang pe khe kae haung zah looh phe byn lan kae ae; pawccecize hynhzeih zapi balyn hynh haedang te chia khylan laesia ram lang nae cciakhae,” a ci hae. Oute Bawipaw nynh Moses kha, “Nanning hanlan vaawlang te sanlou kha khuaa lang ka raw sah cih, ccungccaw hae nynh nin takyh a pounua cih hae zah tuh-e nin hanlan phe zaw lan a khuinkuh cih hae. Minmin nynh ka ccangpya hae paw kha a zui hae tou, zui khyh hae tou cipaw tuhcite ka syntawtua cih hae.Ref 16.4: Joh 6.31 Nin taruhnaw nin khe tuh ccangpaw nin hae kya a khuingku hae paw laeze leit ning alunghua lante a khuing cih hae zah a paccyn cih hae,” a cipya. Tukeiccuze Moses te Aaron nynh Israel hae balyn kha, “Zete ccyh khe nanning kha Izip ram kyate ae poukhae oh paw tuh Bawipaw nynh thua cipaw kha nae nyh cih oh, Bawipaw rawsete na ccohku oh paw kha phe a thae vae keiccuze awkhua ccyh kya Bawipaw phu-enaw kha nae muih cih oh. Kaening tungvaw rawsete ccohnuaku lan ciate kaening tuh pawmou kae thua?” a cipya hae. Te Moses nynh, “Zete ccyh kya na ae lan oh paw saw kha Bawipaw nynh ae pya oh zah awkhua ccyh kya sanlou phe na byn lan oh, ae pya oh paw kha nae muih cih oh, pawccecize Bawipaw tungvaw rawsete na ccohkuh oh paw kha phe a thae vae. Kaening tuh pawmou kae thua? Na ccohkuh oh paw tuh kaening nae rawse oh paw thua khyh, Bawipaw kha na rawse oh paw nynh thua,” a ci. Oute Moses nynh Aaron kha, “Israel zapi balyn kyakhe, ‘Bawipaw kalan oun naekuh oh, pawccecize na ccohku oh paw kha phe a thae vae,’ cite hopah hae,” a cipya. 10 Te Aaron nynh Israel zapi balyn kha a hopya lya hae khe, minmin nynh laesia ram lang do hae zah Bawipaw phu-enaw tuh maeking kya a langkupaw kha a muih hae. 11 Bawipaw nynh Moses kha, 12 “Israel hae nynh a ccohku hae paw kha phe ka thae vae; tukeiccuze ‘Zete khuanin ccaw dyn khe saw kha na ae cih oh zah awkhua ccyh kya sanlou kha phe byn lan na ae cih oh; oute kae tuh Bawipaw nae Pachia nynh ka thua cipaw kha nae nyh cih oh,’ cite hopah hae,” a cipya. 13 Zete ccyh khe vamyng hae nynh oun kaethung hae zah ryahmin kya phe a beih hae; awkhua ccyh kyakhe ryahmin pepan kya dangtui accah. 14 Dangtui nynh he akhuhthung tuh laesia ram laephi vawlan khe pahsadya lante aphepaw vuiraw kha a um hae, laephi vawlan khe vuiraw alungkuhpaw hawte a um hae. 15 Israel hae nynh tuh-e tuh he a muih hae tuh, pawmou athua cipaw nyh khyh hae zah lu kheit te lu kheit kha, “E hynh pawmou athua?” cite a hoku hae.Ref 16.15: 1Ko 10.3 Moses nynh minmin kha, “Bawipaw nynh ae lan ae pya oh paw sanlou nynh thua. 16 ‘Nae bu kya umpaw ccungccaw balyn hanlan milu thyhte, lu kheit ze omer ccangkheit ciate na khuinkuh cih oh,’ cite Bawipaw nynh kaw yn pya,” a cipya hae. 17 Israel hae nynh tuhcite a cyi hae, ccungccaw abang nynh alunghua khuing hae zah abang nynh azyahua a khuing hae. 18 Thuasalama omer ccangkheit te he a tou hae tuh, alunghua a khuing hae paw tuh patae hoilae khyh hae zah azyahua a khuing hae paw mah zyahua lae khyh hae; lu kheit cci hanlan aho zeihte a khuingku hae.Ref 16.18: 2Ko 8.15 19 Te Moses nynh, “Humhung nynh mah awkhua cia na laesah lan khyh oh,” a cipya hae. 20 Thuasalama abang nynh Moses bya kha ngae leite awkhua cia a nung hae keiccuze zanpaw lan tang zah phe aroh. Moses tuh minmin tungvaw a thinria. 21 Mimaw raveih hanlan aho zeihte awkhua takyh a khuingku hae; khuanin he so tuh phe a tui. 22 Nin taruhnaw nin khe looh tuh leit ning alung lante lu kheit ze omer ccangning cci a khuingku hae. Zapi kya-e piccan balyn nynh oun cceih hae zah Moses kha he hopah hae tuh, 23 Moses nynh minmin kha, “ ‘Awkhualan tuh daebabi lan haeung nin, Bawipaw hanlan athyaapaw sabbath nynh thua; na ry oh paw sanlou kha ruakuh oh lah, na ry oh paw ang kha hyngkuh oh; alaepaw balyn kha ccy oh lah awkhua cia nung oh,’ cite Bawipaw nynh kaw oun pya,” a cipya hae.Ref 16.23: Exo 20.8-11 24 Moses nynh kawpya hae thyhte awkhua cia ccy hae zah thuh khyh, alungkhu kya zanpaw mah kae khyh. 25 Moses nynh, “Atunin khah-e kha ae oh, pawccecize atunin tuh Bawipaw hanlan sabbath nynh thua; atunin khah-e kha ramkaw kya na muih lan khyh oh. 26 Nin taruh lungkhu khah-e kha na khuing cih oh; thuasalama nin sarinaw nin, lonawnin kya pawpaw mah um lan khyh,” a ci. 27 Nin sarinaw nin khe ccungccaw abang nynh khuing khylan pou hae zah pawpaw mah muih khyh hae. 28 Bawipaw nynh Moses kha, “Hohseciamou ka kawbya te ka ccangpyanaw kha zui ry leite na eiung cih oh? 29 Ngaetua oh! Bawipaw nynh sabbath kha ae pya vae oh, tukeiccuze nin taruhnaw nin kya looh kha nin ning hanlan ae pya oh; nae umnaw raveih khe na um cih oh; nin sarinaw nin kya nae umnaw kyate na pou lan khyh oh,” a cipya hae. 30 Tukeiccuze ccungccaw hae tuh nin sarinaw nin khe a haeung hae. 31 Israel hae nynh tuh-e looh kha mannaq\xr 16.31 Manna: cipaw tuh Hebru bya te “pawmou athua?” cite hopaw roi te alokuh. \x* cite min a phu hae; manna tuh koriander amung te lokuh zah araw, khoilutui te raepaw sanlou hawte athua.Ref 16.31: Nam 11.7-8 32 Moses nynh minmin kha, “ ‘Izip ram kyate kae poukhae lya oh ze, laesia ram kya kae dang oh paw looh kha nae she takyh kya-e ccaawno hae nynh a muih ccaw hae cite omer ccangkheit kha ccy oh,’ cite Bawipaw nynh kaw oun pya,” a cipya hae. 33 Moses nynh Aaron kha, “Daw-ang ccangkheit lah lah, a lungkhu khe manna kha omer ccangkheit khate sangtua, nae she takyh kya ccy a thua nawlan, khah-e daw-ang kha Bawipaw malang nungtua,” a cipya.Ref 16.33: Heb 9.4 34 Bawipaw nynh Moses kha kawpya thyhte khyndadyh lan a um ccaw cite Aaron nynh tuh-e manna kha byakin thingkua malang khe a nung. 35 Israel hae nynh ccungccaw umnaw ram kya a thua mawlaezung hae, kum sung pali lungkhu manna kha a ae hae; Kanaan ram ramri a thua mawlaezung hae tuh, manna kha a ae hae.Ref 16.35: Jos 5.12 36 Omer ccangkheit tuh ephah pumhaw pumkheit nynh thua.