5
Esther nynh A Raepaw Loohdangnaw Poi
Nin thumnaw nin khe Esther nynh amaw kya-e siapharannung boeining kha lawkuh zah siapharan inn alungkhu lang e voidu kya, siapharan khaan te ahawiliakunaw khe a thadyn. Siapharan tuh siapharan inn teenaw te ahawiliakunaw, siapharan inn lungkhu e a bawitungkhung kya a haung. Siapharan nynh voidu lungkhu a thadynpaw Siapharannung Esther kha he a muih takaw te, Esther tuh maehoynaw mue zah siapharan nynh a kuih kya umpaw sui ccoi kha a pyalang. Tetuh Esther nynh naenuakuh zah ccoi adung kha a hae. Siapharan nynh, “Siapharannung Esther, pawmou na peki? Pawmou ngia nae ry? Ka peenaw angankuh kha heize kae pya cih,” a cipya. Te Esther nynh, “Siapharan nynh na ry zetuh, siapharan elang ka paccynpaw loohdangnaw poi kalan Haman ryte atunin beih oun thua oh,” a cipya. Tetuh siapharan nynh, “Esther nynh a ry hawte kae cyipya ccaw, Haman kha arangte oun thuakhae oh,” a ci. Tukeiccuze siapharan te Haman tuh Esther nynh a paccynpaw loohdangnaw kalan a cceih hae. Misutui a nia lya hae khe siapharan nynh Esther kha, “Pawmou na ry? Kae pya cih. Pawmou ngiaku nae ry? Ka peenaw angankuh cia heize kae pya cih,” a cipya. Te Esther nynh, “Ka rypaw te kae ngiaku rypaw tuh: Siapharan malang maehoynaw ka mue zah ka rypaw te kae ngiakupaw kha siapharan nynh nae pya ry zetuh, kae paccynpah cih oh paw loohdangnaw poi kalan siapharan te Haman tuh awkhualan beih oun thua oh, te siapharan nynh na ho hawte ka rypaw kha kae hopah cih,” a cipya.
Haman nynh Mordekai Chia lan A Paccyn
Tuin nin khe Haman tuh lungtua thawmuinte a pou. Thuasalama Haman tuh Mordekai nynh siapharan sakoih kya sawtuate thadynpya leite, thyngku leite a umpaw kha he a muih tuh, Mordekai tungvaw myarya a thinria; 10 tuhzemah Haman nynh synkuh zah a inn lang a cceih. Te a ruiban hae te a zu Zeresh kha a kosah hae, 11 Haman nynh a hoirumnaw phu-enaw, ccapaw patae a saahkunaw, siapharan nynh sawtuanaw pya zah rya a kaesahnaw balyn te siapharan kuihkaw e bawi hae te ryalahtu hae luki a nungpaw kha a hopya hae. 12 Haman nynh bua hochih zah, “Siapharannung Esther nynh heize amaw a paccynpaw loohdangnaw poi kalan khe kamaw laelan humhung mah siapharan ryte teesah khyh. Awkhualan mah siapharan ryte bua oun kokheih. 13 Thuasalama siapharan sakoih kya a haungpaw Judah ccungccaw Mordekai kha ka muih lungkhu balyn tuh, e ka hopaw balyn hynh ka hanlan thanenaw um khyh,” a cipya hae. 14 Tetuh a zu Zeresh te a ruiban hae balyn nynh, “Ccungccaw saenawpaw tung dong sung pangaw ahangpaw kha rae thua sah lah, tuin kyakhe Mordekai kha sae thua sah cite awkhualan awkhua khe siapharan kha hopah; tetuh siapharan ryte lungpawte loohdangnaw poi kalan cceih oh,” a cipya hae. Haman nynh tuh-e tuanaw pyapaw bya tuh a lungrythua zah ccungccaw saenawpaw tung kha a raesah hae.