ESTHER
Esther
Esther ccauh kya a umpaw acyihkuhpaw hae hynh Persia siapharan nynh khuaccihsaw a umthyanaw inn kya acyihkuhpaw konglang nynh thua. Abyapi lante Judah nopinung a rawhoypaw, a min Esther cikuhnung kong nynh thua. Esther tuh myarya a rawhoy zah a pyn a pyaku liate a ccungccaw hae kha rhaw hae nynh maemihkunaw kyate a khum hae. E ccauh nynh Purim cikuhpaw Judah hae poi athotakawnaw te asuilan kha a ccaesah.
1
Siapharan Ahasuerus nynh Vashti A Dee
1 Ahasuerus she lya, India ram kyate Ethiopia ram cia, za kheit ram kuin lae sari a uktu Ahasuerus she lyakhe e hynh acyihkuh.Ref 1.1: Ezra 4.6
2 Siapharan Ahasuerus tuh khualungrua koihkuhpaw Susa khua umpaw a siapharan tungkhung kya haung zah,
3 ram a uknaw kum thumnaw kum khe a kuihkaw e bawi hae te ryalahtu hae balyn hanlan loohdangnaw poi a tua. Persia te Media rhawkaw hae, ram cciakhaetu hae te uktu bawi hae tuh oun thua hae,
4 a peenaw kya-e sisua patae, a lesaenaw te a huhan a phu-enaw kha khaw cia, nin za kheit sung tarya lungkhu a muihsah hae.
5 E nin hae he athang te, Susa khuapi kya um hae paw adih ale balyn hanlan siapharan nynh siapharan inn khokhu voidu lungkhu khe nin sari lungkhu loohdangnaw poi a tuapya hae.
6 Ngun kuihpu atahkuhpaw lung rawpaw tung hae kyakhe sephaphuhpaw boei arui te a raw hae paw zokhawpaw boei arawpaw te apiazong hae a um hae. Aphaekuhpaw lung azong phuinccing, lung sepaw, lung rawpaw, lung manpaw te lung hinpaw vawlan khe sui tungkhung te ngun tungkhung hae a um hae.
7 Siapharan tuh patae a hoipaw athua thyhawte sui banang aphuinphuin te misutui patae kha a nia hae.
8 Misutui kha kheeku leite a nia hae; pawccecize mimaw lungry thyhte a cyi nawlan hae, siapharan nynh siapharan inn e ryalahtu balyn kha kaw a pya hae.
9 Tuhpiaze, Siapharannung Vashti nynh Siapharan Ahasuerus inn kyakhe nopi hae hanlan loohdangnaw poi a tuapya hae.
10 Nin sarinaw nin khe siapharan tuh misutui nynh a lungpawsah zah, amaw a do-oihtu tinriapaw ccungccaw hae lu sari Mehuman, Biztha, Harbona, Bigtha, Abagtha, Zethar te Karkas kha kawpya hae zah,
11 Siapharannung Vashti a puithyanaw kha ccungccaw hae te bawi hae dosah khylan siapharan bawilukhung khungkute siapharan malang yn pou sah, a cipya hae.
12 Thuasalama tinriapaw ccungccaw hae nynh siapharan kawpyapaw a hopya hae paw kha Siapharannung Vashti nynh phe ei zah pou khyh. E keiccuze siapharan tuh a thinria zah a thin-unaw tuh a lungkhu kya maee lang arua.
13 Tetuh siapharan nynh phungbya a nyh hae paw mihaw hae kha tuanaw ngia hae zah (pawccecize siapharan nynh phungbya te phunglang a nyhthya hae paw balyn kha tuhcite tuanaw leih a ngia hae,
14 tuh-e hae tuh siapharan he a zui hae paw Persia te Media bawi hae lu sari, siapharan mitmae a muihmae hae paw te a peenaw kya alehua hae paw Karshena, Shethar, Admatha, Tarshish, Meres, Marsena te Memukan nynh thua hae):
15 “Tinriapaw ccungccaw hae nynh siapharan kawbya a hopya hae paw kha Siapharannung Vashti nynh a cyi khyh keiccuze aphung thyhte a tungvaw pawtemou cyi lan,” cite a hopya hae.
16 Tetuh Memukan nynh siapharan te bawi hae malang khe, “Siapharannung Vashti nynh siapharan tungvaw kyalya sei khyh, Siapharan Ahasuerus ram pynpi kya a umpaw bawi balyn te ccungccaw balyn tungvaw kya mah a sei.
17 Pawccecize siapharannung nynh e a cyipaw hynh nopi balyn nynh a thae cih hae zah, ‘Siapharan Ahasuerus nynh Siapharannung Vashti kha amaw malang pou lan kawpya zah pou khyh,’ cite a ho cih hae zah mih vawpaw hae kha pawlangria vae lan khyh hae.
18 Atunin ccaccei maw hin, siapharannung a cyisahnaw a thae hae paw Persia te Media ram e bawi hae zu hae nynh siapharan kuihkaw e bawi hae kha a rawse cih hae zah, theihryanaw te thinrianaw tuh thang kho vae lan khyh!
19 Siapharan nynh na ry zetuh, Vashti hynh Siapharan Ahasuerus malang pou boi nan vae sah, cite namaw kyate kawtho lah, rulae kho athua khyh nawlan Persia te Media phungbya hae kya zei thua sah; te siapharan nynh Vashti laeze ahoy huapaw ccangpaw nopi kha siapharannung lang hoikuh sah.
20 Te siapharan nynh myarya kopaw a ram pynpi kya thaesahnaw he a rae te, nopi balyn nynh mih vawpaw hae kha a lesaepaw thuasah, a nyaapaw thuasah phe lokuh lang sawtuanaw a pya cih hae,” a ci.
21 Tuh-e tuanaw pyapaw bya tuh siapharan te bawi hae nynh mih lungrythua zah, Memukan nynh a hopaw bya thyhte siapharan nynh a cyi;
22 pise miakaw tuh a innbyn kya kawhoitu athua cih, cite siapharan nynh a ram pynpi kalan, ram takyh kalan khe mimaw ccaw raveihte, minphuin takyh kalan khe mimaw bya raveihte ccaw a ky hae.