6
Darias nynh Kawthonaw
1 Tetuh Siapharan Darias nynh kawtho zah, Babilon khua kya ccauh hae a nungnaw hae ccaw ccakhungnaw khaan kyakhe a ccung hae.
2 Media ram khuapi athuapaw Ekabatana khua khe ccakue kha muih hae zah, a lungkhu khe hynhte a la zei hae: “Bya ccynawpaw ccaw ccangkheit.
3 Ram a uknaw masaty kum khe, Siapharan Sairas nynh kaw ccangkheit a tho: Jerusalem khua umpaw Pachia inn te asekuh lante, silawnaw a la raenaw hae te maee-ute silawnaw a la thuakhaenaw hae hmin, inn kha sakthui thua sah; inn ahangpaw tuh dong sung taruh athua cih zah akopaw tuh dong sung taruh athua cih,
4 a-awkuhpaw lung pipi hae tang thum te thing a-awkuhpaw tang kheit a um cih; amee tuh siapharan phua kha pya athua cih.
5 Tuhpiaze, Nebukhadnezzar nynh Jerusalem beikinn lungkhu a umpaw kha lah zah Babilon lang a cciakhaepaw Pachia inn e sui te ngun angphe hae kha Jerusalem kya umpaw beikinn kalan kikhae athua cih zah amaw hmin raveih kya nungthui athua cih; Pachia inn lungkhu kya na nung cih oh,” cite a la um.
6 “Tukeiccuze Vaw Khuraw lang ram a uktu Tattenai, Shethar-bozenai te nae ban hae athua hae paw Vaw Khuraw lang ram e bawi hae, nanning tuh beikinn kalan la naekuh nan oh;
7 e Pachia inn rya hynh la khee nan oh; Judah uktu te Judah piccan hae nynh e Pachia inn hynh amaw hmin kya sakthui hae sah.
8 Tuhpiaze e Pachia inn sakthuinaw hanlan Judah piccan hae elang na cyipya lan oh paw kong hynh kaw ka tho: e ccungccaw hae hynh amee kha phe ccing lan, accyh aro lei lante Vaw Khuraw lang ram nynh ngunto a pyapaw siapharan phua kya-e kha na pya cih oh.
9-10 Minmin nynh vaawlang Pachia kalan amynkhuhpaw silawnaw rae hae zah siapharan te a ccaaw hae hiinnaw hanlan saw a sang ccaw hae, vaawlang Pachia kalan maee-ute silawnaw rae nawlan ahopaw miakaw tangnua nopaw, tuutepaw te tuu thuasah, chanvuih, loi, misutui te chitui thuasah Jerusalem e ranpibawi hae nynh aho a ci hae thyhte nin takyh apaekuh lei lan na pya cih oh.
11 Tuhlae lanze e kawthopaw hynh lukhakheit nynh a ei lanze, a inn kya-e thingccaw ccangkheit kha law athua cih zah, tuh-e thingccaw adung khate amaw kha thuing athua cih.
12 E kawthopaw hynh ei lan te Jerusalem kya umpaw e Pachia inn kha ro lan a kuih a hangpaw miakaw siapharan thuasah, minphuin thuasah Jerusalem kya a min a tynsahpaw Pachia nynh roh vae sah. Kae, Darias nynh kaw ka tho; hynh-e inn tuh pekite sak thua sah,” a ci.
Beikinn Lynnaw te Apnaw
13 Tetuh Siapharan Darias nynh a ky hae paw bya thyhte, Vaw Khuraw lang ram a uktu Tattenai, Shethar-bozenai te mih ban hae nynh pekite a cyi hae.
14 Profeh Haggai te Iddo ccapaw Zekhariah nynh profehbya a ho hae liate, Judah piccan hae nynh sak hae zah mih rya a cceihthya. Israel Pachia kawpyapaw te Persia siapharan Sairas, Darias te Artazaksis kawthonaw liate minmin nynh inn sakpaw kha a lyn hae;Ref 6.14: Hag 1.1; Zek 1.1
15 Siapharan Darias nynh ram a uknaw kum taruhnaw, sawpaw sah thumnaw Adar saw nin thum nin khe e inn tuh a lyn hae.
16 Israel ccungccaw hae, ranpibawi hae, Levi phin hae te tuhlaepaw seetangnaw kyate a ki hae paw nynh e Pachia inn apnaw poi hynh lungpawte a tua hae.
17 E Pachia inn apnaw poi kya tangnuapaw sa kheit, tuutepaw za ning te tuutaw za pali khate silawnaw a rae hae, te Israel phin haw lae ning a um thyhte, Israel balyn hanlan miaatepaw sa haw lae ning te seithyaanaw silawnaw kha a rae hae.
18 Moses ccauh kya azeiku thyhte, Jerusalem khua kya Pachia ryalaw khylan ranpibawi hae kha mimaw phu raveihte, Levi phin hae kha aphuphute a nung hae.
Kawtaw Poi Tuanaw
19 Masaty sawpaw, nin haw lae pali nin khe seetangnaw kyate a ki hae paw nynh kawtaw poi kha a tua hae.Ref 6.19: Exo 12.1-20
20 Ranpibawi hae te Levi phin hae nynh thyaasakuh hae zah mih balyn mawte a thyaa hae. Tukeiccuze seetangnaw kyate a ki hae paw balyn hanlan, mih ban hae ranpibawi hae hanlan te mimaw hanlan kawtaw poi tuutaw kha a chia hae.
21 Seetangnaw kyate a ki hae paw Israel ccungccaw hae nynh thuasah, Bawipaw , Israel Pachia kha beik khylan minmin kya mungkuh bua hae zah ram lungkhu e ccangpaw minphuin hae kya-e nungsikunaw kyate a phiakuh hae paw balyn nynh thuasah a ae hae.
22 Ransi phing leipaw sanlou poi kha nin sari lungkhu lungpawte a tua hae; pawccecize Bawipaw nynh mih lungpawsah hae; Pachia, Israel Pachia inn rya kha Assiria siapharan nynh a bawm nawlan a thinlung kha minmin kalan a mae vae.