EZRA
Ezra
Ezra ccauh tuh Sherianaw ccauh te po piakuhpaw thua zah Babilon kyate Judah hae abang a kinaw hae kong te Jerusalem kya ccungccaw hae khuasahthui hae zah Pachia bua a beiknaw hae kong kha a ho. Tuh-e konglang tuh akawlan thyhte a ho: (1) Persia siapharan Sairas kawpyanaw liate Judah hae kya-e masaty aphu tuh a ki hae; (2) Beikinn kha sakthui hae zah Pachia kalan a ap hae, te Jerusalem kya Pachia beiknaw kha bua a tho hae; (3) kum patae aro koute Ezra cciakhaenaw te Judah hae ccangpaw phu tuh Babilon kyate Jerusalem lang ki hae zah Israel hae muisaw rho kha a zosah khyh nawlan hae Ezra nynh thawte bawm hae zah a ccangpya hae. Ezra tuh Pachia Kawbya myarya a thyapaw nynh thua.
1
Sairas nynh Judah hae Kisahnaw
(2She 36.22-23)
1 Jeremiah nynh a hopaw Bawipaw bya kha ccingsah khylan, Persia siapharan Sairas nynh siapharan lang a tangnaw masaty kum khe, Bawipaw nynh Persia siapharan Sairas thinlung kha a tuhou keiccuze aning nynh kaw a thopaw ccaw kha a peenaw balyn kalan thaesah hae zah:Ref 1.1: Jer 25.11, 29.10
2 “Persia siapharan Sairas nynh hynhte a ho: Bawipaw , vaawlang Pachia nynh laephi peenaw balyn kha yn pya vae zah, Judah ram Jerusalem khua kya amaw hanlan inn sakpya lan kae kha yn naw.Ref 1.2: Isa 44.28
3 Nanning laku kya Pachia ccungccaw athua hae paw miakaw—minmin kyakhe mih Pachia tuh um vae sah! Judah ram umpaw Jerusalem khua langkhe cceihthung hae sah lah, Bawipaw , Israel Pachia inn kha sak hae sah—aning tuh Jerusalem kya umpaw Pachia nynh thua;
4 a hiinhy hae paw balyn tuh, pawpaw kya a um hae zemah, mih umnaw e ccungccaw hae nynh Jerusalem khua umpaw Pachia inn elang lungthote silawnawpaw apiaze sui, ngun, uccaw te sahiin hae kha bawm hae sah,” a ci.
5 Tetuh Judah phin te Benjamin phin puizia hae kya-e lu hae, ranpibawi hae te Levi phin hae—Pachia nynh mih thinlung kya a tuhou hae paw miakaw tuh Jerusalem khua umpaw Bawipaw inn kha sakthui khylan a cceihthung hae.
6 Mih innpaw hae balyn nynh lungthote a hlu hae paw balyn apiaze, ngun angphe hae, sui, uccaw hae, sahiin hae te amee rupaw lasung hae khate a bawm hae.
7 Nebukhadnezzar nynh Jerusalem kyate la phu zah a pachia hae inn kya a la nungpaw Bawipaw inn e angphe hae kha siapharan Sairas nynh a poukhae.
8 Tuh-e uccaw hae tuh Persia siapharan Sairas nynh sisuakhaan a ngawtu Mithredath kha a thuaasah, te Judah bawi Sheshbazzar kha riapah zah a pya.
9 Uccaw ccazing tuh: sui pakekhupaw sung thum, ngun pakekhupaw thong kheit, tangpaw ccangkuin lae takua;
10 sui pakekhupaw sung thum, ccangpaw ngun pakekhupaw za pali ccanghaw, ccangpaw angphe hae thong kheit;
11 sui te ngun angphe abalyn tuh thong pangaw za pali acih. Kyng hae zah a cciakhae hae paw kha Babilonia kyate Jerusalem lang he a cciakhae hae te, e uccaw hae balyn hynh Sheshbazzar nynh a cciakhae thung.