6
Ccaaw hae te Nungpaaw hae
1 Imua hae, Bawipaw kya nae nung nae paaw hae bya kha ngae oh, pawccecize tuh-e tuh ahmepaw nynh thua.Ref 6.1: Kol 3.20
2 “Na nung te na paaw kha sawtua”—hynh-e hynh byakinpyakupaw te asekuhpaw masaty kawbya nynh thua,Ref 6.2-3: Exo 20.12; Deu 5.16
3 tuh-e byakinpyakunaw tuh, “tuhteze nynh hiinhoy te na um cih zah laephi vawlan na hiinshe sae cih,” acikuh.
4 Paaw hae, nae ccaaw hae kha thinriasah nan oh, thuasalama Bawipaw kya-e ccangpyanaw te thuiheinaw khate minmin kha cciakhae thung oh.Ref 6.4: Kol 3.21
See hae te Bawizuaa hae
5 See hae, Khri kaw na ngae oh hawte, rawri thyngkute, thinlung thanccingte pynsaw lante nae bawi hae kaw kha ngae oh.Ref 6.5-8: Kol 3.22-25
6 Ccungccaw lungrythuasah khylan, muihnaw kya kyalya kawngaepaw thua leite, Khri see hae hawte Pachia rynaw kha thinlung ccaccing te cyih oh,
7 ccungccaw hae hanlan thua leite, Bawipaw hanlan ryalawpyapaw hawte, ahoypaw thinlung khate ryalah oh.
8 See athua zemah, a luepaw athua zemah, lukhakheit nynh ahoypaw kha a cyi ze, Bawipaw kyate atekuhpaw lasung kha a mue cih cipaw nyh oh.
9 Bawi hae, nae see hae tungvaw kya tuhawte cyihbua oh. Minmin kha huraw nan oh, pawccecize nanning te minmin nynh vaawlang khua kya alokuhpaw Bawi na hoi oh zah, aning tuh hum sanmah maedo khyh cipaw nyh oh.Ref 6.9: Deu 10.17; Kol 3.25, 4.1
Pachia kya-e Rhawtuk-uccaw
10 Nyathyakou ka uno hae, Bawipaw kya te a thungnaw thawzung kyakhe nae thawsae sah.
11 Satan lingnaw kha na dou kho nawlan oh Pachia kya-e rhawtuk-uccaw kha abalyn mawte lawkuh oh.
12 Pawccecize aening tuh chii te saw a hoipaw rhaw te ah doukuh khyh oh, thuasalama uktu hae, kawhoitu hae, hynh-e she mohnaw kya-e laephi uktu hae, vaawlang umpaw ahoy leipaw muisaw hae ryte nynh ah douku oh.
13 Tukeiccuze Pachia kya-e rhawtuk-uccaw kha abalyn mawte lawkuh oh, tuhteze nynh nin hoy leipaw kya na dou kho cih oh zah pawpaw balyn thangsah te tynkaring lan na thadyn kho cih oh.
14 Tukeiccuze byaccing athuapaw taeccia khate nae tae kha cciaku te, dingnaw athuapaw bykhaw kha khawkuh oh,Ref 6.14: Isa 11.5, 59.17
15 daenaw athuapaw thehoypaw kha phy khylan paccynkunaw kha ccukoh lang kohkuh oh,
16 tuh-e hae balyn laelan, zynnaw athuapaw khawriaphua kha ccyngkuh oh lah, tuh-e tuhte raerangsaro kya-e maee lang ruapaw thee hae balyn kha na the kho cih oh.
17 Khumnaw athuapaw sivawlukhung te Pachia bya athuapaw Muisaw thaloi kha ccyngkuh oh.Ref 6.17: Isa 59.17
18 Sawsangnaw te ngianaw phuin balyn khate Muisaw kya sawsang zungzae oh. Mithyaa hae balyn hanlan ngia oh lah, lungthang leite zuaku biate raeringkute um oh.
19 Thehoypaw kya-e byakhupaw kha rawhoyte ka nysah nawlan hae, bya ka ho vae ze ka ho lanpaw thehoypaw kha yn pya nawlan kae ka hanlan mah sawsang oh.
20 Kae tuh tuh-e thehoypaw hanlan sivawrui te a khii hae paw locceihtu nynh ka thua; tukeiccuze ho lan ka ccan thyhte rawhoyte ka ho kho nawlan saw yn sangpah oh.
Nyathya Beihlangnaw
21 Ka tungvaw acyihkuhpaw te ka cyipaw kha na ny nawlan oh, Taikhikas nynh pawpaw balyn kha marya ae la hopah cih oh; aning tuh sungsahpaw uno thua zah Bawipaw kya a lungzipaw ryalahtu nynh thua.Ref 6.21: Loc 20.4; 2 Tim 4.12Ref 6.21-22: Kol 4.7-8
22 Kae tungvaw acyihkuhpaw te nae thinlung kha ngaengansah khylan eenaw te kae nynh amaw kha nae kalan kae saw.
23 Paaw Pachia te Bawipaw Jesu Khri kyate daenaw, zynnaw te sungsakunaw tuh uno hae kyakhe la um sah.
24 Ah Bawipaw Jesu Khri kha tynkaring lan a sungsah hae paw balyn kya thawccinaw tuh la um sah. Amen.