2
Chinaw kyate Hiinnaw lang
1 Langmawlya tuh kawngae leinaw te seinaw hae keiccu na la chih oh,Ref 2.1-5: Kol 2.13
2 tuh-e seinaw hae kyakhe na la hiin oh zah hynh-e laephi laanpi hynh na la zui oh, khivae kya-e thungnaw a uktu, kawngae lei hae paw kya atu ryalahpaw muisaw nulang zuikute na la hiin oh.
3 Aening balyn tuh langmawlya tuh-e hae kyakhe pynsaw rynaw te thinlung rynaw kha zuite, ah pynsaw duaanaw kyakhe ah la ciakuh bua oh; mingccang hae hawte aening mah aphung thyhte thinrianaw a ccou hae paw ccaaw hae nynh ah la thua oh.
4 Thuasalama ngaethyaumsahnaw te phe beihpaw Pachia nynh aening kha myarya alepaw a sungsahnaw te oun sungsah keiccuze,
5 ah seinaw kya ah chi lya oh khe, Khri ryte pynkheihlan oun hiinsah vae—thawccinaw liate nanning tuh khum na thua vae oh—
6 Khri Jesu ryte oun thoosah zah vaawlang khua kya amaw ryte oun haungsah vae,
7 tuh-e tuh Khri Jesu liate aening ngaethya oun umsahnawpaw a thawccinaw myarya alepaw kha yn thua lanpaw she kya oun langsahpya nawlan nynh thua.
8 Pawccecize thawccinaw keiccuze zynnaw liate khum na thua vae oh, tuh-e tuh naemaw nynh na cyiku oh paw thua khyh, Pachia lasung nynh thua.
9 Ryalawnaw liate thua khyh, tukeiccuze hum nynh sanmah pooku lanpaw um khyh.
10 Pawccecize aening tuh ahoypaw ryalaw law khylan Khri Jesu kya amaw nynh oun raepaw nynh ah thua oh; tuh-e ahoypaw ryalaw hae kya ah hiin nawlan oh Pachia nynh a la paccyn ty vae.
Khri kya Ccangkheit
11 Tukeiccuze pynsaw kya kuih te vingdungawkuh hae paw nynh “vingdungawkuh lei hae paw” cite ae la ko oh paw nanning tuh langmawlya pynsaw lante Zenta hae na la thua oh paw kha liathui oh.
12 Tuh ccyh lyaze nanning tuh Khri leite na la um oh paw, Israel ccazing kya umbua leite ramccang hae na thua oh paw, byakinpyakupaw byakinnaw te asekuh leipaw mikhia hae na la thua oh paw te ngaehoinaw hoi leite Pachia leite laephi kya na la um oh paw kha liathui oh.
13 Thuasalama langmawlya kou na la sawkuh oh paw nanning kha atu tuh Khri chiise liate Khri Jesu kya naesaku na thua vae oh.
14 Pawccecize aning tuh aening daenaw nynh thua; minphuin phuin ning kha amaw a pynsaw kyakhe phuin kheit lang rae zah aening laku arihkhawpaw rhawkunaw lungrua kha pong a tingsah vae.
15 Aning nynh ccangpyakunaw hae kya a umpaw kawbya hae te phungzae hae kha roh zah, minphuin phuin ning kha amaw kya minphuin thawpaw phuin kheit lang rae zah daenaw kha a umsah.Ref 2.15: Kol 2.14
16 Aning nynh vaelantung liate minphuin phuin ning kha pyn pynkheit lang sueluate Pachia te bua ccawsakuthui hae zah rhawkunaw kha a maemih.Ref 2.16: Kol 1.20
17 Khri tuh yn thua zah asawnaw na um oh paw nanning te anaenaw a um hae paw kyakhe daenaw thehoypaw kha a ho.
18 Pawccecize aening minphuin phuin ning tuh Khri liate Muisaw ccangkheit kyakhe Paaw kalan thua khonaw ah hoi oh.Ref 2.17: Isa 57.19
19 Tukeiccuze atu nanning tuh mikhia hae te minphuin ccang hae na thua vae khyh oh, mithyaa hae ryte khuaccaaw hae na thuakheih oh zah Pachia innbyn kya-e hae nynh na thua vae oh.
20 Nanning tuh locceihtu hae te profeh hae nynh a bing hae paw aleihpaw vawlan sakthinpaw na thua oh zah, Khri Jesu tuh apaki lang e abyapi huapaw lung nynh thua.
21 Amaw kya sakpaw inn tuh abalyn mawte rekuhmamia lan sak thua zah Bawipaw kya athyaapaw beikinn lang a lethung.
22 Nanning kha mah Muisaw liate Pachia a umnaw hmin lang amaw kya pynkheihlan sak na thua oh.