29
Izip Rawsenaw Bya
Kum hawnaw, sawpaw sah hawnaw, nin haw lae ning nin khe, Bawipaw bya tuh ka kya yn thua zah:Ref 29.1—32.32: Isa 19.1-25; Jer 46.2-26 Ccungccapaw, Izip siapharan Faro kha na mae hawinua lah, amaw te Izip ram pynpi kha profehbya honua tua; Bawipaw PACHIA nynh hynhte a ho:
Pou Izip siapharan Faro,
a vawpi hae ngaelung khe
a kuih a ccu tharae zo zah,
“Nal vawpi tuh ka kya-e nynh thua;
e vawpi hynh kamaw hanlan ka raeku,”
cite a hopaw nakaa-hupi,
nang kha kae rawse.
Ngasabaw khate na khaw kha
kae baw cih zah,
na vawpi hae kya-e ngasaw hae kha
na kaleih kya ka besakuh cih hae.
Na vawpi hae kyate
nang kha ccaring kae sue cih zah,
na vawpi hae kya-e
ngasaw balyn tuh
na kaleih kya a bekuh cih hae.
Nang te na vawpi hae kya-e
ngasaw balyn kha
ramkaw langkhe kae vua cih oh;
nang tuh ramkaw khe na chih cih,
nang kha ae khuing lan khyh hae zah
ae uh lan khyh hae.
Nang kha laephi kya-e sarangpaw hae te
khivae kya-e pavaw hae hanlan
looh lang ka pya vae hae.
Tetuh Izip ram um hae paw balyn nynh
kae tuh Bawipaw
ka thuapaw kha a nyh cih hae,Ref 29.6: Isa 36.6
pawccecize nang tuh Israel hae hanlan
phaeku hoitang nynh na thua;
mih kuih te ae kyng vae hae ze,
nang tuh na khya zah,
mih raw balyn kha
thoh na pae hae;
na kya a ngeiku vae hae ze,
nang tuh na khya zah,
mih kuih mih ccu balyn kha
na tynsah khyh hae.
Tukeiccuze Bawipaw PACHIA nynh a hopaw tuh: Na kalan thaloi ka thuasah cih zah, ccungccaw te sarangpaw hae kha ka bae cih hae; Izip ram tuh ccungccaw adae cih zah alakawpaw lang a tang cih. Tetuh minmin nynh kae tuh Bawipaw ka thuapaw kha a nyh cih hae.
Nang nynh, “Nal vawpi tuh ka kya-e nynh thua, ka raekupaw nynh thua,” na ci keiccuze 10 nang te na vawpi hae kha kae rawse oh, Izip ram kha Migdol kyate Sai-en cia, Ethiopia ramri phe thua lan, alakawpaw te ccungccaw phe adaepaw lang ka rae cih. 11 Ccungccaw te sarangpaw nynh tuin ram kya po cceih lan khyh hae; kum sung pali lungkhu pawpaw nynh mah umnah lan khyh. 12 Ccungccaw phe adaepaw ram hae laku khe Izip ram kha ccungccaw adaepaw lang ka rae cih; Izip khuapi hae tuh arohpaw khuapi hae laku khe kum sung pali lungkhu arohpaw lang a tang cih hae. Izip hae kha minphuin hae kyakhe phiariphiarae ka nung cih hae zah, ram hae kyakhe ka phiasakuh cih hae.
13 Tuhzemah Bawipaw PACHIA nynh hynhte a ho: Kum sung pali accing te, Izip hae kha phiariphiarae a umnaw hae minphuin hae kyate ka suelua cih hae; 14 Izip hae kha ka kikhae cih hae zah, mih thokeinaw ram, Pathros ram langkhe ka kisah cih hae; tuin kyakhe ram nyaapaw lang a tang cih hae. 15 Ram hae laku kya Izip tuh anyaa huaccepaw ram lang a tang cih zah, minphuin hae luki papin sang vae lan khyh; minmin tuh minphuin ccangpaw hae kha papin bua a uk leipaw ditarawpaw lang ka rae cih hae. 16 Izip hae tuh Israel hae nynh doliakupaw lang papin tangthui vae lan khyh hae; bawmnaw mue khylan Izip hae kalan a la maeku hae paw mih hoyleinaw kha Israel hae nynh a tuathui cih hae. Tetuh minmin nynh kae tuh Bawipaw PACHIA ka thuapaw kha a nyh cih hae.
Babilon nynh Izip A Thiing Cih
17 Kum kuin lae sarinaw, sawpaw sah kheitnaw, masaty nin khe Bawipaw bya tuh ka kya yn thua zah: 18 Ccungccapaw, Babilon Siapharan Nebukhadnezzar nynh a rhawkaw hae tuh Tair kha thawte rhaw a tuksah hae; rhawkaw miakaw tuh mih lu-o zah, mih raw pong kuakuh; tuhzemah aning te a rhawkaw hae tuh Tair dounaw mee kha Tair kyate paw sanmah mue khyh hae. 19 Tukeiccuze Bawipaw PACHIA nynh hynhte a ho: Izip ram kha Babilon Siapharan Nebukhadnezzar ka pya cih; aning nynh Izip sisua kha luadete a lawkuh cih zah a phukuh cih; tuh-e tuh a rhawkaw hae mih ryalaw mee lang a tang cih. 20 Thawte rya a lawnaw mee lang Izip ram kha aning ka pya vae, pawccecize minmin nynh ka hanlan rya a law hae, cite Bawipaw PACHIA nynh a ci.
21 Tuin nin khe Israel hae hanlan aki ka saesah cih zah, nang kha minmin laku kya byahonaw kaw kae pya cih. Tetuh minmin nynh kae tuh Bawipaw ka thuapaw kha a nyh cih hae.