12
Judah Kyngnaw Muihsahnaw
1 Bawipaw bya tuh ka kya yn thua zah:
2 Ccungccapaw, nang tuh rhawdou a mangpaw ciihan laku kya nynh na um, minmin tuh muihnawpaw mit a hoi hae zemah a muih lei hae paw, thaenawpaw nakaring a hoi hae zemah a thae lei hae paw nynh thua hae;Ref 12.2: Isa 6.9-10; Jer 5.21; Mar 8.18
3 pawccecize minmin tuh rhawdou a mangpaw ciihan nynh thua hae. Tukeiccuze, ccungccapaw, ram kyate a dee hae paw kya-e uccaw paccynku hawte paccynkuh lah, minmin nynh a muihnaw hae khuadae ccyh khe ram kyate a dee hae paw hawte cciatua; kyng athuapaw ccungccaw hawte a muihnaw hae khe na umnaw hmin kyate ccangpaw hmin kalan na cceih cih. Minmin tuh dou a mangpaw ciihan athua hae zemah poh a thaethya kho hae.
4 Khuadae ccyh a muihnaw hae khe, a kyng hae paw nynh a phuku hae hawte, khuadae ccyh a muihnaw hae khe na phupaw kha lawku tua; te zete ccyh a muihnaw hae khe, a kyng hae paw hawte na pou cih.
5 A muihnaw hae khe pang kha poh ua lan vih lah, tuin kyate na phupaw kha poukhae.
6 Riryngmoh khe a muihnaw hae kyakhe phupaw kha na raw vawlan na khangkuh cih zah, na poukhae cih; laephi kha na muih khyh nawlan na mae kha na bongkuh cih; pawccecize Israel hae hanlan nang kha muihsahnaw lang kae rae vae, yn cipya.
7 Kaw yn pya thyhte ka cyi. A kyng hae paw kya-e phupaw hawte, ka phupaw kha khuadae khe ka paccynku, zetesang khe pang kha ka kuih te po ua lan ka vi; mih muihnaw khe phupaw kha ka raw vawlan khangkute riryngmoh khe ka poukhae.
8 Awkhualan awkhua khe Bawipaw bya tuh ka kya yn thua zah:
9 Ccungccapaw, rhawdou a mangpaw Israel ciihan nynh nang kha, “Pawmou na cyi?” cite ae khia khyh hae tou? a ci.
10 Minmin kha hynhte hopah hae, Bawipaw PACHIA nynh hynhte a ho: E hodaepaw bya tuh Jerusalem umpaw uktu bawi te tuin kya umpaw Israel phin balyn hanlan nynh thua.
11 Kae tuh nanning hanlan muihsahnaw nynh ka thua: Ka cyi hawte, minmin kha cyi athua cih hae; minmin tuh kyng athua cih hae zah, a kyng hae paw umnaw kalan a cceih cih hae.
12 Minmin kya a umpaw uktu bawi tuh riryngmoh khe a phupaw kha a raw vawlan a khangkuh cih zah, a toikuh cih; pang kha a vikuh cih zah a poukhae cih; a mit te laephi kha a muih khyh ccaw cite, a mae kha a bongkuh cih.
13 Aning kha ka miabu te ka bong cih zah, ka kaang kya a kae cih; Khaldi hae ram, Babilon khuapi kalan ka cciakhae cih, tuh-e khuapi kya a chi zemah tuh-e khuapi tuh muih lan khyh.Ref 12.13: 2Si 25.7; Jer 52.11
14 Amaw a umlu hae paw balyn, amaw a bawmtu hae te a rhawkaw hae balyn kha teitei lang balyn pong ka phia cih hae; mih nulang te thaloi khate ka zui cih hae.
15 Minmin kha minphuin ccangpaw hae laku te ram hae kalan phiariphiarae he ka nung hae te, minmin nynh kae tuh Bawipaw ka thuapaw kha yn nyh cih hae.
16 Thuasalama minmin kya-e beihtaraw kha tuh thaloi kyate thuasah, ccakannaw te shethya kyate thuasah ka luesah cih hae, tuhteze nynh minmin nynh a thuanaw hae minphuin ccangpaw hae kyakhe mih nungsikunaw balyn kha a ho cih hae; tetuh minmin nynh kae tuh Bawipaw ka thuapaw kha a nyh cih hae.
Byapianaw Ccyh Nue Leinaw
17 Bawipaw bya tuh ka kya yn thua zah:
18 Ccungccapaw, na looh kha thyngkute ae lah, na tui kha thyngku ri biate niatua;
19 te ramccungccaw hae kha hynhte hopah hae, Israel ram e Jerusalem khuaccaaw hae te asekuhte Bawipaw PACHIA nynh hynhte a ho: Minmin nynh mih looh kha rikawte a ae cih hae zah, mih tui kha lungrote a neih cih hae, pawccecize tuin kya um hae paw balyn kya-e puathonaw keiccuze mih ram lungkhu umpaw balyn tuh azo cih.
20 Ccungccaw a la umnaw khuapi hae tuh aroh cih zah, ram tuh ccungccaw kharouh adae cih; tetuh nanning nynh kae tuh Bawipaw ka thuapaw kha na nyh cih oh.
21 Bawipaw bya tuh ka kya yn thua zah:
22 Ccungccapaw, “Accyh tuh dyadya alia vae, vizin miakaw tuh accakaepaw lang nynh a tang,” cite Israel ram konglang na hopaw e phungtangbya hynh pawtemou athua?
23 Tukeiccuze minmin kyakhe, “Bawipaw PACHIA nynh hynhte a ho: E phungtangbya hynh ka thangsah vae cih zah, Israel ram kya phungtangbya lang mang vae lan khyh hae. Thuasalama accyh anae vae, vizin miakaw tuh accing cih,” cite hopah hae.
24 Israel phin kya akyh leipaw vizin um vae lan khyh, akyh leipaw profehbya mah um vae lan khyh.
25 Thuasalama kae, Bawipaw nynh ka ho lanpaw bya kha ka ho cih zah, tuh-e bya tuh accing cih. Tuh-e bya tuh a thysung vae lan khyh. Pou rhawdou a mangpaw phin, nae she kya bya ka ho cih zah ka ccingsah cih, cite Bawipaw PACHIA nynh a ho.
26 Bawipaw bya tuh ka kya yn thua zah:
27 Ccungccapaw, Israel phin hae nynh, “Aning nynh a muihpaw vizin tuh malang kum patae hanlan nynh thua; ccyh hynhsepi hanlan nynh profehbya a ho,” a ci hae.
28 Tukeiccuze minmin kha hopah hae, Bawipaw PACHIA nynh hynhte a ho: Ka bya tuh accyh nue vae lan khyh, ka hopaw bya tuh accing cih, cite Bawipaw PACHIA nynh a ci.