8
Hummou ahawpaw
ccungccaw hawte athua?
Uccaw asuilan ccaesahnaw kha
hummou a nyh?
Hawnaw nynh ccungccaw mitmae kha
awsah zah,
maesue hoyleinaw kha a rulae.
Athyaapaw byakinkunaw kha na rae vae keiccuze siapharan nynh kaw a pyapaw kha cyitua. Rih nan; siapharan a umnaw kyate cciatua, hankhakheit kha a lungry athua vae khyh ze, na nenung nan sah, pawccecize aning nynh a rypaw miakaw kha a cyi kho. Siapharan bya tuh huhan a hoi, “Pawmou na cyi?” cite hum nynh mou a hopah ngan cih. A kawpyapaw kha a zuipaw miakaw tuh vawsaw tung lan khyh, ahawpaw ccungccaw thinlung nynh tuh accyh te cyi zia kha a nyh cih. Pawccecize ccungccaw hae vawsawnaw tuh ccungccaw hae tungvaw kya myarya ri salamah, uccaw miakaw nynh amaw accyh te cyinaw zia bebe a hoi hae. Accaccingte, ccungccaw nynh pawmou yn cyihkuh cih cipaw nyh khyh, pawccecize pawte yn cyiku lanpaw kha hum nynh mou a hopah kho? Humhung nynh mah hy kha khee khylan hy a ukpaw huhan kha hoi khyh zah, chi nin a ukpaw huhan kha mah hoi khyh; tuh-e rhawtukkunaw kyate pounaw kaw um khyh, hoyleinaw a raetupaw kha hoyleinaw nynh luesah khyh. Khuanin kaw cyi athuapaw balyn hynh ka tua zah, e hae balyn hynh ka muih: Lu kheit nynh mingccangpaw kha vawsawnaw pya khylan huhan a mangnua.
10 Oute shaw kya a uu hae paw ccungccaw hoylei hae paw kha ka muih; minmin tuh hmin thyaa kya leih a tee hae paw te a pou hae paw thua hae zah, tuhcite a cyinaw hae khua kya thehoynaw a ccou hae paw nynh thua hae. E hynh mah accakaepaw nynh thua. 11 Ahoy leipaw cyisahnaw kya detahnaw palou a um khyh keiccuze ccungccaw thinlung tuh ahoy leipaw cyi lan paccynkunaw te phe abeih. 12 Misei hae nynh hoyleinaw kha avae patae a rae hae zemah mih hiinshe asae; tuhzemah Pachia raw a rih hae paw tuh amaw malang rawrite a um hae keiccuze hoynaw a ccou cih hae cipaw ka ny, 13 thuasalama ccungccaw hoy leipaw tuh Pachia malang rawrite a um khyh keiccuze hoynaw ccou lan khyh, mynlyh alopaw mih hiinshe tuh sae lan khyh.
14 Laephi vawlan acyihkuhpaw accakaepaw ccangkheit a um, ccungccaw hoylei hae paw nynh mih cyisahnaw thyhte a ing lan hae paw kha adingpaw ccungccaw hae nynh ing hae zah, adingpaw ccungccaw hae nynh mih cyisahnaw thyhte a ccou lan hae paw kha ccungccaw hoylei hae paw nynh a ccou hae. E hynh mah accakaepaw nynh thua ka ci. 15 Tukeiccuze lungtuanaw hynh ka nawccah, pawccecize khuanin kaw kya ccungccaw hanlan aete niate mawtemaw lungtuanaw laeze ahoy huapaw pawpaw mah um vae khyh; pawccecize Pachia nynh khuanin kaw kya ccungccaw a pyapaw hiinnaw ccyh kya thawte rya a law lungkhu hynh-e hynhte a hiinkhaekuh.
16 Hawnaw ny khylan te laephi vawlan a law hae paw ryalaw hae kha muih khylan he ka tua tuh, khuazi khuadae i leite ka um, 17 tetuh khuanin kaw kya acyihkuhpaw, lu kheit nynh sanmah muih kho leipaw Pachia ryalaw balyn kha ka muih. Zuakute a ccung hae zemah muih lan khyh hae; a haw hae paw nynh ny lan a tuaku hae zemah muih kho khyh hae.