5
Sawtuanaw, Zakawsangsakunaw te Lungryachinaw
1 Pachia inn lang na ccia vae ze, na laanccia kha la raeringkuh; mingaee hae nynh silawnaw raepaw laeze bya ngaeku khylan naekute ccia tuh ahoyhua; pawccecize mingaee hae nynh ahoy leipaw rae kha pawtemou sibia lan cipaw nyh khyh hae.
2 Byaho lan rangsakuh nan; Pachia malang byaho lan na thinlung te rangsakuh nan, pawccecize Pachia tuh vaawram um zah, nang tuh lae vawlan nynh na um; tukeiccuze na bya zya sah.
3 Lungriathaenaw alung ze maan alung, te a ngaeepaw tuh bya patae a ho.
4 Pachia kalan byakinkunaw na rae ze, ccingsah lanpaw na thysung nan sah; pawccecize a ngaeepaw tungvaw lungtuanaw hoi khyh. Bya na kinkupaw kha ccingsah tua.Ref 5.4: Sam 66.13-14
5 Bya na kinkuh zah, ccingsah leite na umpaw laeze bya na kinku khyhpaw kha ahoyhua.
6 Na bya nynh seinaw kalan ae cciakhae nan sah, “Ka cyiseipaw nynh thua,” cite locceihtu malang ho nan; pawccemou Pachia nynh na bya kha a thinria zah na cyipaw ryalaw kha ryakhae a ro lanpaw tuh?
7 Maan patae sah te bya patae ho tuh accakaepaw nynh thua; Pachia raw kha la rih.
8 Ram ramkhakheit kya ryachi hae tungvaw tuaasahkunaw um zah, byading te ahmepaw a um khyhpaw kha na muih lanze na ngaeangthua nan sah; pawccecize ahangpaw bawi kha ccangpaw ahang huapaw bawi nynh a thungkhaw; te minmin laeze ahang huapaw bawi lu kheit a um ung.
9 Laephi kyate a poupaw tuh ccungccaw balyn hanlan nynh thua; siapharan nynh mah loo kha a doliakuh.
10 Phua a rypaw ccungccaw tuh phua te a lungryachikhaekuh lan khyh; sisua a rypaw tuh a muepaw khate a lungryachikhaekuh lan khyh. E hynh mah accakaepaw nynh thua.
11 Hoipaw uccaw alung ze, a aepaw ccungccaw mah alung; uccaw a hoitu tuh a uccaw kha a mit te a muih laelan, ccangpaw pawmou a mue?
12 Ryalahpaw tuh beihtaraw a ae zemah, patae a ae zemah hoyte a ih; thuasalama mihoipaw tuh a sisua pataepi kha nynh amaw kha isah kho khyh.
13 Khuanin kaw kya ngaethya lan umpaw hoyleinaw ka muihpaw tuh: a hoitu nynh amaw vawsaw nawlan a hoirumnaw kha a ccyku,
14 tuh-e hoirumnaw tuh ahoy leipaw ryalaw keiccuze phe azo; aning nynh ccaaw a saah zemah, a ccaaw hae hanlan a kuih kya pawpaw mah um khyh.
15 A nung vue kyate a sasete yn pui hawte, a sasete bua a ki cih; thawte rya a la lawpaw hanlan a kuih te pawpaw mah ccyngkuh lan khyh.Ref 5.15: Job 1.21; Sam 49.17; 1Ti 6.7
16 E hynh mah myarya thahpaw hoyleinaw nynh thua: yn thua lya hawte a cceih cih; khivae hanlan thawte rya a law hae paw kyate pawmou a mue cih hae?
17 A she lungkhu balyn mohnaw kyakhe looh ae zah, lungriathaenaw, ccinaw te thinrianaw te a um.
18 Ahoy cite ka muihpaw tuh: khuanin kaw kya Pachia nynh aening oun pyapaw hiinnaw ccyh syntaraw kyahin ae te nia, te ah ryalaw kyate muepaw kyakhe lungtuakhaeku hynh nynh thua; pawccecize tuh-e tuh aening hanpaw nynh thua.
19 Pachia nynh ccungccaw miakaw kha sisua te hoirumnaw a pya, ccungccaw tuh tuh-e hae kyakhe a lungtuakhaekuh zah amaw hanpaw kha ccoute a ryalaw kya lungtuanaw a mue—tuh-e tuh Pachia lasung nynh thua.
20 Pachia nynh a thinlung kya lungtuanaw a pya keiccuze nulang e a hiinnaw ccyh kha liathui vae lan khyh.