2
Hoysahnaw hynh Accakaepaw
Kamaw te kamaw kha, “Rangtua, hoysahnaw kha ka cyibua tua cih; namaw te namaw kha na lungtuasaku tua,” ka ciku. Thuasalama hynh-e hynh mah accakaepaw nynh thua. Nuinpaw hynh ngaeenaw nynh thua. Hoysahnaw hynh pawmou a ccungkia? Ccungccaw nynh vaawlui zakaw kya sosoh a hiin lyahin, ccungccaw hanlan ahoypaw cyi lanpaw kha ka muih kho mawlaezung, ka thinlung nynh hawnaw a ry keiccuze, ka pyn kha misutui te pawtemou lungtuasah lan cipaw te ngaeenaw kya pawtemou ciaku lan cipaw kha ka ccungku. Myarya lepaw ryalaw kha ka law; inn hae kha ka sakkuh zah misu khokhu hae kha ka raeku;Ref 2.4-8: 1Si 10.23-27; 2Sh 9.22-27 Haetapaw khokhu te thingku ccounaw khokhu hae kha ka raekuh zah, tuin kyakhe thingthae ku aphuinphuin kha ka ccouku. Alethungpaw thingku hae aponaw loram kha tui bu nawlan cite tuili hae kha ka raeku. Seenung te seepaw hae kha ka rekuh hae zah, ka inn kya a puipaw see hae kha mah ka hoi hae; kae ka mawze Jerusalem a la umpaw lukhakheit nynh a hoipaw laeze alung lante, vaetua phu hae te tuuphu hae kha mah patae ka hoi.Ref 2.7: 1Si 4.23 Siapharan hae te ka ukpaw ram hae kya-e sui te ngun te sisua hae kha ka sueluaku hae; hlawsahthya hae paw nopi pise ka hoi hae, ccungccaw nynh rythyapaw zu patae ka hoi.Ref 2.8: 1Si 10.10, 14-22
Tuhcite kae ka mawze Jerusalem a la umpaw balyn laeze, a hoirum huapaw lang ka tang; ka hawnaw mah ka kya atyn.Ref 2.9: 1Sh 29.25 10 Ka mit nynh a rypaw miakaw kha ka mue; ka thinlung nynh a rypaw hoysahnaw miakaw kha ka sungkuh khyh, reihkute rya ka lawpaw balyn kya thinlung hoysahnaw ka mue zah, tuh-e tuh reihkute rya ka law mee lasung nynh thua. 11 Tetuh ka kuih nynh a la cyipaw te reihkute rya ka la lawpaw balyn kha ka tuatua zah, abalyn mawte accakaepaw te khisan nulang deekupaw nynh thua, vaawlui zakaw kya mue lanpaw pawpaw mah um khyh.
12 Tetuh hawnaw, lungkyh leinaw te ngaeenaw kha ka tuathui; siapharan nynh amaw maw e siapharan laeze pawmou a cyi kho? Amaw maw e siapharan nynh a la cyi vae paw rou kha nynh a cyi kho. 13 Awnaw tuh mohnaw laeze ahoyhua hawte, hawnaw tuh ngaeenaw laeze ahoyhua.
14 A hawpaw tuh a lu kya mit a hoi,
thuasalama a ngaeepaw tuh
mohnaw kya a cceih.
Tuhzemah mih lu ning mawte phe lokuhpaw kha a tung kalang hae cipaw ka ny. 15 “A ngaeepaw tungvaw acyihkuhpaw kha kae ka tungvaw mah yn cyihkuh cih; tukeiccuze myarya ka hawpaw hynh pawmou athane?” cite kamaw te kamaw ka ciku. Te hynh-e hynh mah accakaepaw nynh thua, ka ciku. 16 A hawpaw kha thuasah, a ngaeepaw kha thuasah zungzae syntaw kho thua khyh, malang ccyh kya tuh abalyn mawte ning athua cih. A ngaeepaw hawte a hawpaw mah a chih. 17 Tukeiccuze hiinnaw hynh ka hua, pawccecize vaawlui zakaw kya cyipaw miakaw hynh kae ka hanlan ngaethya lan umpaw nynh thua, abalyn mawte accakaepaw thua zah khisan nulang deekupaw nynh thua.
18 Khuanin kaw kya reihkute rya ka la lawpaw balyn hynh ka hua, e hae hynh ka nukhu e ccungccaw hanlan ka cciatawsya hahe cih, 19 tuh-e ccungccaw tuh a haw lanpaw te a ngaee lanpaw kha hummou a nyh? Pawpawte athua zemah khuanin kaw kya reihkute rya ka lawpaw te ka hawnaw ka mangpaw balyn tungvaw kya aning tuh bawi a la thua cih. E hynh zemah accakaepaw nynh thua. 20 Tukeiccuze khuanin kaw kya reihkute rya ka la lawpaw balyn te asekuh lante ngaehoinaw um leite ka lungthawthang, 21 pawccecize vaekhakheit tuh hawnaw, nynaw te thyanaw khate reihkute rya a lahtupaw nynh, tuh-e hanlan reihkute rya a lah leipaw mingccangpaw kha abalyn mawte a cciatawpah hahe cih. E hynh zemah accakaepaw te myarya hoyleinaw nynh thua. 22 Ccungccaw nynh khuanin kaw kya reihkute rya a lawpaw te a thawthuapaw balyn kyate pawmou a mue? 23 Pawccecize tuh-e ccungccapaw a ccyh balyn tuh ngaethyanaw te phe beih zah, a ryalaw tuh lungriathaenaw nynh thua; khuazi ccyh heize a lungdae khyh. E hynh mah accakaepaw nynh thua.Ref 2.23: Job 5.7, 14.1
24 Ccungccaw hanlan tuh ae te nia, te reihkute ryalawpaw kya lungpawnaw muepaw laeze ahoy huapaw um vae khyh. E hynh zemah Pachia kuih kyate nynh yn thua cipaw ka ny;Ref 2.24: Pht 3.13, 5.18, 9.7; Luk 12.19; 1Ko 15.32 25 pawccecize Pachia kyate holeite hummou ae kho zah, hummou a lungtua kho? 26 Pachia lungry a tungpaw kha Pachia nynh hawnaw, nynaw te lungpawnaw a pya; thuasalama misei kha tuh ccakhungpaw te pumpaw ryalaw kha a lawsah hae; tuh-e tuh Pachia lungry a tungtupaw kyalya pya lanpaw nynh thua. E hynh zemah accakaepaw thua zah, khisan nulang deekupaw nynh thua.Ref 2.26: Job 32.8; Ptb 2.6