10
1 Achihpaw myn hae nynh
zimuin a raetu kya-e
mynkhuhpaw kha a thuhsah;
tuhawte adihpaw ngaeenaw tuh
hawnaw te sawtuanaw laeze arihua.
2 Ahawpaw ccungccaw thinlung tuh
amaw a ranglang kuih kyakhe a um,
thuasalama a ngaeepaw thinlung tuh
amaw a voilang kuih kya nynh a um.
3 Mingaee tuh laanpi
a ccia lyakhe heize tuanaw hoi khyh,
mingaee athuanawpaw kha
ccungccaw miakaw kya a langsaku.
4 Uktu bawi nynh na tungvaw a thinria ze,
na ryalaw kha poutaw nan,
pawccecize daebabi lan zya um liate
cyiseinaw alepaw kha ngaethya kho athua.
5 Khuanin kaw ka muihpaw hoyleinaw ccangkheit a um, tuh-e tuh uktu bawi cyiseinaw liate yn poupaw nynh thua:
6 mingaee hae tuh ahangnaw hmin kya um hae zah, mihoi hae tuh anenaw hmin kya a haung hae.
7 See hae nynh marang ccikuh hae zah, bawi hae nynh see hae hawte mih ccu te a ccia hae paw kha ka muih vae.
8 Hunghua a karouhpaw tuh
tuh-e hunghua lungkhu lang a ccah cih;
koihpaw lungrua a khyhpaw tuh
hupaw nynh a tuh cih.Ref 10.8: Sam 7.15; Ptb 26.27
9 Lung a khyhpaw tuh
tuh-e lung keiccuze vaemaw a mue cih.
Thingtung a buapaw tuh
tuh-e thingtung keiccuze
vaemaw a mue cih.
10 Hae tuh he angoih te
taaw leite um lanze,
thawzung patae thua aho;
hawnaw nynh ccungccaw kha
laansui-uanaw a pya.
11 Hupaw nynh oun tuh mawkhe
hupaw kha naawty khyh zetuh,
hupaw naawthyatu tuh thane vae khyh.
12 Mihawpaw bya nynh amaw kha
maehoynaw a muesah,
thuasalama mingaee munglae nynh tuh
amaw kha a ro.
13 Mih byaho tuh ngaeenaw te
tho zah ahoy leipaw
ngaeenaw khate athang.
14 Mingaee tuh apaekuh lei lan
bya a ho.
Yn cyihkuh cih paw kha
hum nynh san nyh khyh,
malang pawte yn cyiku lanpaw kha
hummou a ho kho?
15 Mingaee ryalaw nynh
amaw toulou kha myarya a bangsah,
pawccecize khua lang
a cceihpaw laanpi sanmah
16 Ram uktu siapharan tuh
zawthaw taraw thua zah,
ram kya-e bawi hae tuh
awkhua takaw khe poi a tua hae,
tuh-e ram tuh ngaethya lan
umpaw ram nynh thua.
17 Ram uktu siapharan tuh
a sung-epaw thua zah,
ram kya-e bawi hae tuh
zu-aenaw hanlan thua leite,
thawzung hanlan cite
angaekuhpaw ccyh kyakhe
poi a tua hae, tuh-e ram tuh
alungtuapaw ram nynh thua.
18 Thawnawnaw keiccuze
inn lungkhu acia,
sawphahkunaw keiccuze inn azu.
19 Nuin khylan poi a tua hae,
misutui nynh lungtuasah zah,
phua nynh rypaw miakaw a cyi kho.
20 Siapharan kha na thinlung te
heize thyalaw nan,
mihoipaw kha na ikhung kya
heize thyalaw nan;
pawccecize azouthyapaw
pavaw nynh tuh-e roi kha
a zoukhae cih, tuhkhyhze sake saepaw
ahysuepaw nynh
tuh-e kong tuh a ho cih.