28
Kawngaenaw elang Hythuanaw
(Lev. 26:3-13; Deu. 7:12-24)
1 Atunin kaw kae pya oh paw a kawbya balyn kha zuakute na zui oh zah, Bawipaw nae Pachia bya kyalya kha na ngae oh zetuh, Bawipaw nae Pachia nynh laephi vaw e minphuin balyn luki ahangnaw khe ae nung cih oh;Ref 28.1-14: Deu 11.13-17
2 Bawipaw nae Pachia bya kha na ngae oh zetuh, hynh-e hythuanaw balyn hynh nae tungvaw a thua cih zah na ccou cih oh:
3 Khua kya hythua na mue cih oh, loo kya hythua na mue cih oh.
4 Ccaaw hae te thuasah, nae laephi athae te thuasah, nae sahiin-awvaw ataw hae te thuasah, nae vaetua te nae tuutaw hae pungzaenaw te thuasah hythuapya na thua cih oh.
5 Nae sua te nae sanlou nonnawpaw pakekhupaw kha hythuapya athua cih.
6 Na tee vae oh ze hythuanaw na mue cih oh zah, na pou vae oh ze hythuanaw na mue cih oh.
7 Nanning rawsete ae thonuakuh oh paw nae rhaw hae kha Bawipaw nynh nae malang khe rhaw a shungsah cih hae; nanning rawsete laanpi ccangkheit kyakhate oun thua cih hae zah, nae malang laanpi ccangsari kyakhate a ccue cih hae.
8 Nae ccung-inn kya te na cyi oh paw balyn kyakhe Bawipaw nynh hythuanaw kha nae tungvaw khe kaw a pya cih; Bawipaw nae Pachia nynh ae pya cih oh paw ram kyakhe hythua ae pya cih oh.
9 Bawipaw nae Pachia kawbya hae kha na zui oh zah amaw laanpi kya na ccia oh zetuh, bya ae kinpyaku oh thyhte, athyaapaw amaw ccungccaw lante Bawipaw nynh ae tynsah cih oh.
10 Bawipaw min liate ko na thua oh paw kha laephi ccungccaw balyn nynh a muih cih hae zah nanning kha ae rih cih oh.
11 Bawipaw nynh nanning pya khylan nae minpaaw hae kya bya a kinpyaku hae paw ram kyakhe sisua thuasah, nae ccaaw hae thuasah, nae sahiin-awvaw te nae laephi athae thuasah pataepi a hoipaw lang ae rae cih oh.
12 Nae ram kya amaw accyh te khuaarawsah khylan te na cyi oh paw balyn kya hythuapya khylan, Bawipaw nynh ahoirumpaw a sisuainn, vaawlang kha nae hanlan ae hungpah cih oh. Minphuin patae kha na koiisakuh cih oh, thuasalama nanning nynh minmin kya-e kha na koii lan khyh oh.
13-14 Atunin kaw kae pya oh paw Bawipaw nae Pachia kawbya hae hynh na ngae oh zah, zuakute na zui oh ze thuasah, te ccangpaw pachia hae kha zuite beik khylan atunin kaw kae pya oh paw bya balyn kyate voilang ranglang na maeku khyh oh ze thuasah Bawipaw nynh nanning kha lu lang ae rae cih oh zah, aleihmae lang ae rae lan khyh oh; ahang huanaw kya rou khe na um cih oh zah, ane huanaw kya na um lan khyh oh.
Kawngae leipaw Raeringnaw Pyanaw
(Lev. 26:14-46)
15 Thuasalama atunin kaw kae pya oh paw Bawipaw nae Pachia kawbya hae te phungbya hae kha zuakute zui leite amaw bya kha na ngae khyh oh zetuh, hynh-e thyalawnaw balyn hynh nae tungvaw ae thuanua cih oh:
16 Nae khua kya thyalawnaw na tung cih oh, nae loo kya thyalawnaw na tung cih oh.
17 Nae sua kya te sanlou nonnawpaw nae pakekhupaw kya thyalaw na thua cih oh.
18 Nae ccaaw hae kha thuasah, nae laephi athae kha thuasah, nae vaetua phu te nae tuuphu ataw hae kha thuasah thyalaw athua cih hae.
19 Na tee vae oh ze thyalawnaw na tung cih oh, he na pou vae oh ze thyalawnaw na tung cih oh.
20 Kamaw kha nae vua oh zah, ahoy leipaw nae cyisahnaw keiccuze, ro na thua oh zah arangte na zo mawlaezung oh, cyi lan na zuaku oh paw atyn-are kyakhe vawsawnaw, bungzounaw, keisukeilae nungkunaw kha Bawipaw nynh nae tungvaw ae sawnua cih oh.
21 Nanning nynh ccou khylan na tee cih oh paw ram kyate ae maemih mawlaezung oh, Bawipaw nynh akaekuh thyapaw alepaw ccinaw kha ae kaesah cih oh.
22 Bawipaw nynh nanning kha ngoinaw, ngesaw lingpaw ccinaw, phinnaw khate thuasah, myarya sonaw te khuaakannaw thuasah, te khivae keiccu aku chinaw te aphi pou zah aku chinaw khate thuasah Bawipaw nynh vawsaw ae pya cih oh; tuh-e hae nynh na ro mawlaezung oh ae deehui cih oh.
23 Nae luki e vaawlui tuh sohin athua cih zah, nae zakaw e laephi tuh sivaw athua cih.
24 Bawipaw nynh nae ram kya arahpaw khuaa kha laenoi lang a tangsah cih zah, ro na thua mawlaezung oh vaawlui kyate vuiping kyalya kha nae tungvaw khe a ccawsah cih.
25 Nae rhaw hae malang khe Bawipaw nynh rhaw kha ae shungsah cih oh; minmin kha rawsete laanpi ccangkheit kyate na ccianua cih oh zah, minmin malang khe laanpi ccangsari kyate na ccue cih oh. Nanning tuh laephi peenaw balyn kya bungzounaw a thuakhaepaw lang na tang cih oh.
26 Nae rhua tuh khivae kya-e pavaw miakaw te laephi kya-e sarangpaw hae hanlan looh athua cih hae zah, tuh-e hae a deetupaw lu kheit sanmah um lan khyh.
27 Bawipaw nynh na dansaku kho lei oh paw Izip ram e balyh, ving ccinaw, chii ccinaw te laethah khate vawsaw ae pya cih oh.
28 Bawipaw nynh ngaeenaw, mitmohnaw, te lungmuanaw khate vawsaw ae pya cih oh;
29 mitzupaw nynh mohnaw kya azahku hawte, nanning nynh ninthu pi khe na zahkuh cih oh, thuasalama nae laanpi kha na muihkuh kho lan khyh oh; nae laan nae sui ua lan khyh zah, ae bawm lan oh paw humhung sanmah a um lei lante luadenaw kha na tung cih oh.
30 Zu na dy oh zemah milae nynh ae ikhaepah cih oh. Inn na sakku oh zemah na umnah lan khyh oh. Misu khokhu na raeku oh zemah athae kha na ae lan khyh oh.
31 Nae vaetua kha nae mitmuihnaw khe a chia hae zemah a saw kha na ae lan khyh oh. Nae lann hae kha nae malang khe luadete a cciakhae cih hae zah, na muethui vae lan khyh oh. Nae tuu hae kha nae rhaw hae kalan pya athua cih hae zah ae bawm lan oh paw humhung sanmah um lan khyh.
32 Nae ccapaw hae te nae ccanung hae kha phang na do lya oh khe, milae kalan pya athua cih hae; minmin kha nae mit te ninlang na do cih oh, thuasalama ccangkhakheit cyi khonawpaw thawzung na hoi lan khyh oh.
33 Na ny lei oh paw ccungccaw hae nynh nae laephi kya-e athae te nae ryalaw mee balyn kha a ae cih hae; nanning tuh vawsaw pyanaw te sydenaw kha po na ing cih oh,
34 nae mit nynh a muih cih paw uccaw keiccuze nae lung amuakhaekuh cih.
35 Bawipaw nynh nae ccukharu te nae ccu kyakhe dansah kho athua leipaw myarya ccihpaw balyh hae kha ae hoisah cih oh zah, nae ccuphe kyate nae lukhy cia apazaekuh cih.
36 Nanning kha thuasah, na hangthungku oh paw siapharan kha thuasah nanning te nae minpaaw hae nynh na ny lei oh paw minphuin kalan khe Bawipaw nynh ae cciakhae cih oh zah, tuin kyakhe thing te thuasah, lung te thuasah raepaw ccangpaw pachia hae kha na beik cih oh.
37 Bawipaw nynh ae cciakhae cihnaw oh ccungccaw hae laku khe nanning tuh ri lan umpaw, tousenaw phungpaw lang, te dothatheihpaw lang na tang cih oh.
38 Ccacii patae kha loo lang na cciakhae oh zemah tungkhipaw nynh a ae keiccuze beihtaraw kyalya kha na rue cih oh.
39 Misu khokhu hae kya misu na ccou cih oh zah na do-oih oh zemah ripaw nynh a ae keiccuze misutui kha na neih lan khyh oh zah athae kha na lokuh lan khyh oh.
40 Nae ram balyn kya oliv ku kha na hoi oh zemah nae oliv thae tuh akhuaku keiccuze oliv chitui kha na thuhkuh lan khyh oh.
41 Ccanung hae te ccapaw hae kha na saahku oh zemah rhaw hae nynh a kyng keiccu hae ze, nae kya-e thua lan khyh hae.
42 Nae thingku balyn te nae laephi athae balyn tuh tarue hae nynh a zoukhae cih hae.
43 Nanning laku e ramccang hae tuh nanning luki houhouh a hangku thung lya hae khe, nanning tuh houhouh na ccahbung cih oh.
44 Nanning nynh minmin kha koiisahku leite minmin nynh nanning kha ae koiisakuh cih oh; minmin tuh lu athua cih hae zah nanning tuh aleihmae na thua cih oh.
45 Bawipaw nae Pachia nynh kaw ae pya oh paw kawbya hae te phunglang hae kha zuite amaw bya kha na ngae khyh keiccu oh ze, nanning tuh ro na thua mawlaezung oh, hynh-e thyalawnaw balyn nynh nanning kha deehuite ae phah cih oh zah nae tungvaw accah cih.
46 Tuh-e thyalawnaw hae tuh nanning te nae ciihan hae tungvaw kya muihsahnaw te ngaeangnaw lante zungzae a um cih.
47 Atyn-are he na hoi oh te, lungtuanaw thinlung khate Bawipaw nae Pachia kha lungtuate na beik khyh oh,
48 tukeiccuze Bawipaw nynh ae sawnua cih oh paw nae rhaw hae kha vuelaw tuihaw te, boeining lawku leite, atyn-are ahobou lante rya na lawpah cih oh. Bawipaw nynh nanning kha ae ro mawlaezung oh sivaw taphu kha nae nging kya ae khang cih oh.
49-50 Nanning kha mosipi hawte uingnuaku khylan, mih bya na thae lei oh paw, akum tangpaw kha sawtua leite akum nopaw kha mah thaw a ccih leipaw, thinrianaw mitmae a hoipaw minphuin kha Bawipaw nynh asawnaw, laephi adianaw kyate ae konua cih oh.
51 Nanning na ro mawlaezung oh, tuh-e minphuin nynh nae sahiin-awvaw ataw hae te nae laephi athae kha a ae cih, nanning kha ae ro mawlaezung oh, ccathae, misutui te chitui kha thuasah, nae vaetua pungzaenaw te nae tuu ano hae paw kha thuasah ae cciatawpah lan khyh oh.
52 Nae ram balyn kya umpaw, na doliaku oh paw, ahangpaw te atynpaw nae lungrua hae kha a ting mawlaezung hae, nae khua balyn kha ae koihlu cih oh; Bawipaw nae Pachia nynh ae pya oh paw ram balyn kya umpaw nae khua balyn kha ae koihlu cih oh.
53 Nae rhaw hae nynh ae koihlu oh zah vawsawnaw kha he ae pya oh tuh, Bawipaw nae Pachia nynh ae pya oh paw, na saahku oh paw nae ccanung hae te nae ccapaw hae saw kha na ae cih oh.
54 Nanning laku e ozia anepaw te asung-epaw pise nynh a uno hae, a pompaw a zu te nyathya a hiinhypaw a ccaaw hae tungvaw hysah lan khyh zah,
55 aning nynh a ae cciamangpaw a ccaaw hae saw kha heize ccapyh san pyabua lan khyh hae, pawccecize nae rhaw hae nynh nae khua balyn kha koihlute vawsaw ae pya cih keiccu oh ze, amaw hanlan pawpaw mah umlae vae khyh.
56 Nanning lakuze myaryamaw a ozia ne zah a sung-e keiccuze a ccuphe te laephi a sy ngan leipaw, ozia anepaw te asung-epaw nopi nynh a pompaw a vawpaw tungvaw thuasah, a ccanung tungvaw thuasah, a ccapaw tungvaw thuasah looh kha hysah lan khyh zah,
57 nae khua hae kha rhaw nynh koihlu hae zah, ae lanpaw pawpaw mah a um vae khyh keiccuze a saahpaw a ccaaw hae te a phae te a phae laku kyate a poupaw a lang kha heize aruh lante a ae cih.Ref 28.57: 2Si 6.28-29; Raw 4.10
58 Hynh-e aphu-epaw te ri lan umpaw min, Bawipaw nae Pachia rhaw kha ri leite, hynh-e ccauh kya azeikuhpaw hynh-e upadi kya-e bya hae balyn hynh zuakute na zui khyh oh zetuh,
59 Bawipaw nynh naemaw te nae ciihan hae tungvaw kya le zah zungzae teingpaw vawsawnaw, le zah zungzae teingpaw ccinaw kha a ccawsah cih.
60 Na ri oh paw Izip ram e ccinaw balyn kha nae tungvaw bua a thuasah cih zah, tuh-e ccinaw hae nynh nanning kya a bahkuh cih hae.
61 E upadi ccauh kya azeikuh leipaw ccangpaw ccinaw te vawsawnaw miakaw kha nanning ro na thua mawlaezung oh, Bawipaw nynh nae tungvaw a ccawsah cih.
62 Vaawlui e awsi zeih na la lung oh zemah, Bawipaw nae Pachia bya kha na ngae khyh keiccu oh ze, beihtaraw kyalya nynh na um vae cih oh.
63 Te Bawipaw nynh hoynaw ae raepyanaw oh kya te ae pungzaesahnaw oh kya a lungtuakhaeku hawte, nanning rosahnaw kya te zosahnaw kya Bawipaw tuh a lungtuakhaekuh cih; ccou khylan na teenua oh paw ram kyate nanning kha ae maemih cih oh.
64 Bawipaw nynh nanning kha laephi voikheit lang te voikheit lang cia ccungccaw balyn laku kya ae pazaesakuh cih oh; tuin kyakhe nanning te nae minpaaw hae nynh na la ny boi lei oh paw, thing te thuasah, lung te thuasah raepaw ccangpaw pachia hae kha na beik cih oh.
65 Tuh-e minphuin hae laku kya nae thawdang lan khyh zah, nae ccuphe hanlan haeungnaw mah um lan khyh. Bawipaw nynh lungriathaenaw, mit thawzyanaw te lungthawthangnaw kha ae pya cih oh.
66 Nae hiinnaw tuh thinphangnaw te a um zungzae cih; nae hiinnaw tuh aamahkhan um leite khuazi khuadae rikawte na um cih oh.
67 Nae thinlung nynh a ripaw te nae mit nynh a muihpaw keiccuze, awkhua ccyh vae ze, “Zete myng thua ravo nyn,” na ci cih oh zah, zete ccyh vae ze, “Awkhua myng thua ravo nyn,” na ci cih oh.
68 Na muihthui vae lan khyh oh cite bya kae kinpyaku oh paw laanpi khate Bawipaw nynh nanning kha Izip ram lang sanphalung te ae kikhae cih oh; tuin kyakhe naemaw te naemaw kha seenung te seepaw lante nae rhaw hae kalan na zuakuh cih oh, thuasalama a retupaw um lan khyh.