9
Ccungccaw hae hanlan Daniel Sawsang
1 Ahasuerus ccapaw, a thokeinaw thyhte Media minphuinpaw Darias nynh Khaldi ram kya siapharan lang tang zah,
2 ram a uknaw kum kheitnaw kum khe kae, Daniel nynh athyaapaw ccauh hae kha ka ria zah, Bawipaw nynh profeh Jeremiah kya a hopaw bya thyhte, Jerusalem tuh kum sung sari lungkhu aroh cih, a cipaw kha ka ny.Ref 9.2: Jer 25.11, 29.10
3 Looh-aesungte, buriboei zingkute, buhhaw phingkute Bawipaw Pachia kalan sawsangte ka ngia.
4 Bawipaw ka Pachia kalan khe seinaw phykute saw ka sang zah,
“Na kawbya kha zui zah nang ae sungsahpaw kyakhe zungzae tynpaw sungsahnaw te byakinnaw kha a tynsahpaw, alesaepaw te ri lan umpaw Bawipaw Pachia,
5 kaening tuh kae sei zah kae mesei vae, na kawbya te na phungzae kyate ccanglang maekute hoyleinaw kha kae rae zah nang kha kae dou vae.
6 Kae siapharan hae, kae bawi hae, kae minpaaw hae te ram kya-e ccungccaw balyn kalan na min te bya a ho hae paw na ryalahtu profeh hae bya kha kae ngae vae khyh.
7 “Pou Bawipaw, nang tuh na ding; na tungvaw mih lungzi khyh keiccuze na deenaw hae ram, anaenaw te asawnaw e ram takyh kya um hae paw Judah hae, Jerusalem khuaccaaw hae te Israel hae balyn tuh atunin hynhcite maethyanaw kae mue.
8 Pou Bawipaw , na tungvaw kae sei keiccuze kae siapharan hae, kae bawi hae te kae minpaaw hae te kaening tuh maethyanaw kae mue.
9 Bawipaw kae Pachia kha kae la dou zemah, aning tuh thawccinaw te seingaethyanaw a hoi,
10 Bawipaw kae Pachia nynh a ryalahtu profeh hae liate kaening nae nungpyapaw na kawbya hae kha kae zui khyh zah, na bya kha kae ngae khyh.
11 “Israel hae balyn tuh na bya ngae leite, na kawbya kha eite a cceihsei vae hae. Tuhcite na tungvaw kae sei keiccuze Pachia ryalahtu Moses kawbya kya azeikuhpaw thyalawnaw kha kae tungvaw buu athua vae.
12 Kaening te oun uktu hae kha rawsete a hopaw a bya kha tynsah zah, myarya ccihpaw shethya kha kae tungvaw a thuasah vae, Jerusalem tungvaw a thuapaw shethya tuh vaawlui zakaw kya thua boi khyh.
13 Moses kawbya kya azeiku thyhte, e shethya balyn tuh kae tungvaw accah vae. Kae hoyleinaw kyate paleihkute a byaccing kha zuite, Bawipaw kae Pachia thawccinaw kha kae ngiakuh khyh.
14 Tukeiccuze e shethya hynh kae tungvaw a thuasah mawlaezung Bawipaw nynh a thinlung kya a nung. Thanccingte, Bawipaw kae Pachia tuh a cyipaw miakaw kya ahme; pawccecize kaening nynh a bya kha kae ngae khyh.
15 “Pou Bawipaw kae Pachia, athawsaepaw kuih te na ccungccaw hae kha Izip ram kyate na poukhae hae zah atunin cia heize na min na thaansaku, kaening tuh kae sei vae, ahme lei lante kae cyisei vae.
16 Pou Bawipaw, adingpaw na ryalawnaw thyhte, na mua thyaapaw Jerusalem tungvaw na thinrianaw te na thin-unaw tuh beih dae ccavae sah, cite kaening nynh saw kae sang; kae seinaw te kae minpaaw hae hoyleinaw keiccuze Jerusalem te na ccungccaw hae tuh kae pepan um hae paw balyn laku kya a thethahpaw lang a tang vae hae.
17 Tukeiccuze, pou kae Pachia, na ryalahtu nynh saw ka sangpaw te kae ngiapaw hynh beih yn thaepya tua. Bawipaw, namaw hanlan, aroh vae paw na beikinnthyaa kyakhe na mitmae tuh beih awsah tua.
18 Pou ka Pachia, na nakaring tuakute beih thaetua. Na mit beih dae lah, kae ronaw hynh thuasah, na min te ko athuapaw khuapi hynh thuasah beih dotua. Kaening nynh kae dingnaw liate thua leite, myarya lepaw na thawccinaw liate ka sawsangnaw hynh na malang kae thuakhae.
19 Pou Bawipaw, beih thaetua, pou Bawipaw, beih yn ngaethya; pou Bawipaw, beih yn ngaepah lah, beih cyitua! Pou ka Pachia, namaw hanlan rangsaku tua, pawccecize na khuapi te na ccungccaw hae tuh na min te ko athua hae paw nynh thua,” ka ci.
Lonaw Sung Sari
20 Ka Pachia kya-e mua thyaapaw ccelang Bawipaw ka Pachia malang khe ka sawsangnaw kha thuakhae te, ka seinaw te ka ccungccaw Israel hae seinaw kha phykute saw ka sang zah bya ka ho lyakhe,
21 tuhcite sawsangte bya ka ho cciamang lyakhe, vizin kya langmaw ka muih vae paw Gabriel tuh zete silaw ccyh khe arangte ka kya yn thua.Ref 9.21: Luk 1.19, 26
22 Gabriel nynh kae kha, “Daniel, nang kha hawnaw te nythyanaw pya khylan atu kae thua vae.
23 Na sawsangnaw tuh he na tho te, aning nynh ae leih zah, nang kha hopya khylan kae thua vae, pawccecize nang kha myarya ae sungsah. Tukeiccuze ka bya hynh hoyte ngae lah, vizin asuilan kha nytua:
24 “Cyiseinaw kha thangsah khylan, seinaw kha zosah khylan, hoyleinaw kha ngaethya khylan, zungzae tynpaw dingnaw kha thuakhae khylan, vizin te profeh kha tazeihkhia khylan te hmin thyaa huaccepaw kha chitui thuh khylan, na ccungccaw hae te athyaapaw na khuapi hanlan lonaw sung sari kha byapae athua.
25 Tukeiccuze nyh lah thaethyatua: Jerusalem kha sakthuite langmaw a um thyhte umsah khylan kawpya athua nin kyate tho zah chitui thuhpaw bawi a ccyh athua mawlaezung lonaw naw sari aro cih; te lonaw sung taruh naw ning lungkhu khe Jerusalem tuh laanpi hae te tuihung hae ryte bua raethui athua cih, thuasalama tuh-e ccyh tuh vawsaw riathae ccyh athua cih.
26 Lonaw sung taruh naw ning koute, chitui thuh athuapaw kha ahme leite a theih cih hae, nyalangte yn thua cih paw bawi a rhawkaw hae nynh khuapi te beikinnthyaa kha a roh cih hae. Tuh-e khuapi athangnaw tuh tui alepaw hawte yn thua cih zah, phe athang cia rhawtuknaw a um cih. Ronaw kong kha kawtho athua vae.
27 Aning nynh lonaw naw kheit lungkhu ccungccaw patae ryte atynpaw byakinnaw kha a rae cih, tuh-e lonaw angankuh he thua te, silawnaw te pyanaw kha umsah vae lan khyh; anungsikuhpaw rohtupaw tuh a um cih zah, tuh-e paw tungvaw kya thangnaw kawthonaw kha a thua mawlaezung tuin kya a um cih,” yn cipya.Ref 9.27: Dan 11.31, 12.11; Mat 24.15; Mar 13.14