5
Belshazzar Poituanaw
1 Belshazzar siapharan nynh a kuihkaw e bawi thong kheit hanlan poitua zah, tuh-e hae malang khe misutui kha a nia.
2 Misutui a niatua lyakhe a kuihkaw e bawi hae, a zu hae te a lovae hae ryte misutui nia nawlan, a paaw Nebukhadnezzar nynh Jerusalem beikinn e a la lawpaw sui banang hae te ngun banang hae kha law lan kaw a pya hae.
3 Jerusalem umpaw Pachia inn kya-e a la law hae paw sui banang hae te ngun banang hae kha lah hae zah, tuh-e tuhte siapharan, a kuihkaw e bawi hae, a zu hae te a lovae hae nynh a nianaw hae.
4 Misutui kha neih hae zah sui pachia, ngun pachia, sohin pachia, sivaw pachia, thingphe pachia te lung pachia kha the a hoysah hae.
Pang kya Zeipaw Ccaw
5 Tualeipite ccungccaw kuihdung tuh yn langkuh zah, maeekhuatung pe, siapharan inn pang vawlan khe ccaw a zei. Tuhcite a zei cciamangpaw kuih kha siapharan nynh phang a do.
6 Te siapharan maesue tuh rulaekuh zah, myarya a thinphang. A kuih a ccu pong thyngkuh zah a ccukharu hae phaphah a buakuh hae.
7 Siapharan nynh beidinhothya hae paw, Khaldi hae te apawe hae paw kha oun ko oh, cite thawte a sia; te siapharan nynh Babilon ram e mihaw hae kha, “E ccaw azeikuhpaw a ria khopaw te asuilan a ho khopaw tuh boeining sepaw kha lawsahku athua cih, a nging kya suisi oisah athua cih zah, ka peenaw kya bawi lu thumnaw lang a tang cih,” a ci.
8 Siapharan kya-e mihaw hae tuh oun thua hae, thuasalama ccaw zeikuhpaw kha ria kho khyh hae zah, asuilan mah siapharan kha hopah kho khyh hae.
9 Tetuh Belshazzar Siapharan tuh myarya a thinphang zah a maesue phe rulaekuh, a kuihkaw e bawi hae mah paw cyi lanpaw nyh khyh hae.
10 Siapharan te a kuihkaw e bawi hae nynh byahokuh hae paw kha siapharannung nynh he a thae tuh, poituanaw khaan lungkhu lang yn tee. Siapharannung nynh, “Pou siapharan, na hiinshe sae vae sah! Na thinphang nan sah, na maesue mah rulaekuh nan sah.
11 Na peenaw kya athyaapaw pachia hae muisaw te phe beihpaw lu kheit a um. Aning tuh na paaw she lyaze pachia hae hawnaw te alokuhpaw hawnaw, thyanaw, nynaw a hoi cite ny athua. Na paaw, Nebukhadnezzar siapharan nynh aning kha mitleihthya hae paw, beidinhothya hae paw, Khaldi hae te apawe hae paw lupi lang a nung,
12 pawccecize uccaw cyithyanaw, nynaw, maan leihthyanaw, lakawbya asuilan kha ccaesah thyanaw te byalungnaw hopiathyanaw kha, siapharan nynh Belteshazzar cite min a phupaw Daniel kyahin muih athua. Atu Daniel kha ko hae sah lah, aning nynh na maan kha ae leihpah cih,” a cipya.
Pang kya Zeikuhpaw Asuilan kha A Ho
13 Tetuh Daniel kha siapharan malang a thuakhae hae. Siapharan nynh Daniel kha, “Siapharan athuapaw ka paaw nynh Judah ram kyate kyng zah a cciakhaepaw Judah hae laku e Daniel tuh nang hynh tou na thua?
14 Athyaapaw pachia hae muisaw tuh na kya um zah, thyanaw, nynaw te hawnaw na hoi cite ka thae.
15 E azeikuhpaw hynh ria khylan te asuilan kha ka kya hopya khylan, mihaw hae te beidinhothya hae paw kha ka malang khe thuakhae thua hae salamah minmin nynh asuilan kha ho kho khyh hae.
16 Thuasalama nang tuh byakhupaw asuilan kha na ho kho zah, byalungnaw kha na hopia kho cite ka thae. Atu, azeikuhpaw kha na ria kho zah, tuh-e asuilan kha nae hopya kho zetuh, boeining sepaw kha lawsahku na thua cih, na nging kya suisi oisah na thua cih zah, ka peenaw kya bawi lu thumnaw lang na tang cih,” a cipya.
17 Tetuh Daniel nynh siapharan malang khe, “Na lasung tuh namaw elang tang sah, tuhkhyhze mingccang hae kha pya hae! Thuasalama tuh-e ccaw azeikuhpaw tuh siapharan nang kha kae riapah cih zah asuilan kha kae nysah cih.
18 Pou siapharan, Ahang Huaccepaw Pachia nynh na paaw kha siapharan lang tangnaw, lesaenaw, phu-enaw te huhan hoinaw kha a pya.
19 Pachia nynh a pyapaw tuh-e lesaenaw liate ccungccaw hae, minphuin hae te bya aphuinphuin a ho hae paw balyn nynh amaw malang khe rih hae zah a thyngkuh hae. Ccungccaw a chia rypaw kha a chia, a hiin rypaw kha a hiin, a hangthung rypaw kha hangthung zah, a sawbung rypaw kha a sawbung.
20 Thuasalama a thinlung yn hangsakuh zah, lungkhungte he yn lysakuh tuh, a siapharan tungkhung kyate vua thua zah, a phu-enaw kha lawpya athua.
21 Ccungccaw hae kyate ccaring dee thua zah, sarangpaw thinlung kha hoisah athua. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw a nythya mawlaezung, ramkaw e lann hae kya umbua zah, tangnuapaw hawte lonua kha a boukuh, a pyn kha vaawlang e dangtui khate ciasah athua.
22 Te a ccapaw athuapaw Belshazzar nang nynh tuh-e balyn tuh na ny zemah, zakawsangsakunaw thinlung na hoi khyh.
23 Vaawlang e Bawipaw kha rawsete namaw te namaw kha na hangsahku! A beikinn kya-e banang hae kha na kalan na lawsah hae zah, nang te na kuihkaw e bawi hae, na zu hae te na lovae hae nynh misutui na nianaw oh. Ngawmuih leipaw, nawthae leipaw te paw sanmah a nyh leipaw sui pachia, ngun pachia, sohin pachia, sivaw pachia, thingphe pachia te lung pachia hae kha the na hoysah hae; thuasalama na hiinnaw te na cyisahnaw miakaw a uktupaw Pachia kha tuh saw na tua khyh.
24 “Tukeiccuze a umnaw kyate kuih kha sawnua zah, e ccaw hynh a zei.
25 Te a zeipaw ccaw tuh: MENE, MENE, TEKEL, te PARSIN, a ci.
26 Tuh-e asuilan tuh: MENE cipaw tuh, Pachia nynh na peenaw nin hae kha ria zah a thangsah vae;
27 TEKEL cipaw tuh, zawccu vawlan khe nang kha khin na thua vae zah, na ccing leinaw kha muih athua vae;
28 PERES cipaw tuh, na peenaw kha phia thua zah, Media hae te Persia hae kha pya athua vae hae, cinawpaw asuilan nynh thua,” a cipya.
29 Te Belshazzar nynh kawpya hae zah, Daniel kha boeining sepaw kha lawsakuh hae zah, suisi kha a nging kya a oisah hae, te aning tuh peenaw kya lu thumnaw bawi nynh thua, cite thaesahnaw kha a rae hae.
30 Tuh-e khuazi ccaccei khe Khaldi hae siapharan Belshazzar kha a chia hae.
31 Te sung taruh kum ning loukaw a cih vae paw Media minphuin athuapaw Darias nynh peenaw kha a law.