4
Vae Ningnaw Nebukhadnezzar Maan
1 Nebukhadnezzar siapharan nynh bya aphuinphuin ho hae paw laephi pynpi e minphuin hae balyn kalan khe: Nae kya daenaw um sah!
2 Ahang Huaccepaw Pachia nynh rya yn lawpyapaw muihsahnaw hae te ngaeang lan umpaw balyn kha hothui ka ry.
3 Pachia nynh a raepaw muihsahnaw hae tuh pawcih baban mou lesae zah,
ngaeangnaw a raepaw tuh pawcih baban mou huhan a hoi!
A peenaw tuh zungzae tynpaw peenaw thua zah,
a kya-e kawhoinaw tuh she takyh kya atyn, a ci.
4 Kae, Nebukhadnezzar tuh ka inn kya ngaengan thawdangte ka um zah, ka siapharan inn kya hiinhoyte ka um.
5 Kae yn risahpaw maan ccangkheit ka sah; ka i lyakhe ri lan umpaw vizin kha ka muih.
6 Tukeiccuze ka maan kha leihpya khylan Babilon ram e mihaw hae balyn kha ka malang thuakhae lan kaw ka tho.
7 Te mitleihthya hae paw, beidinhothya hae paw, Khaldi hae te apawe hae paw tuh oun thua hae zah, ka maan kha ka hopya hae, thuasalama ka maan kha yn leihpah kho khyh hae.
8 Nyathyakou khe ka pachia min liate Belteshazzar cite ko thua zah athyaapaw pachia hae muisaw te phe beihpaw Daniel tuh ka malang yn thua zah, ka maan kha ka hopya:
9 “Mitleihthya hae paw lupi athuapaw, pou Belteshazzar, nang tuh athyaapaw pachia hae muisaw te phe na beih zah, nang na hanlan tuh myaryamaw arupaw byakhupaw um khyh cipaw ka ny. Maan ka sahpaw hynh ngaetua lah, yn leihpya tua.
10 Ka i lya ka muihpaw
vizin tuh hynhte nynh thua;
laephi ngaelung khe
myarya hangpaw thingku ku kheit a um.
11 Thingku tuh lethung zah
myarya a bong,
adungpaccy tuh vaawlui
phe phah zah,
laephi pynpi adianaw kyate
muih kho athua.
12 Tuh-e thing anaw hae tuh
myarya puithya,
a thae tuh myarya lung zah,
ahysuepaw balyn hanlan
looh lang phe azaw.
Loramsaw hae nynh
a mynzia kaw khe a um hae,
vaawlang e pavaw hae nynh
akaran kya mih bu luakuh hae zah,
khah-e thingku khate
ahysuepaw balyn kha kua athua hae.
13 Ka ih zah vizin ka muih lyakhe ngawran he ka do tuh, vaawlang te yn rungbungpaw athyaapaw rhawviatu lu kheit a um.
14 Aning nynh thawte sia zah a hopaw tuh:
‘Thingku kha nge lah,
akaran hae kha loi hae,
anaw kha sia lah, athae kha
phiariphiarae nung hae.
Sarangpaw hae tuh
tuh-e thingku kaw kyate
ccue hae sah lah, pavaw hae tuh
akaran hae kyate zou hae sah.
15 Thuasalama a ccungmuing te
a tharui kha sivawrui te
sohinrui khate khii lah,
laephi kya cciataw,
nebaleihpaw lonua kya
cciatawtua.
Vaawlang e dangtui nynh
aning kha ccawphu sah.
Laephi kya-e lonua hae kyakhe
loramsaw hae ryte
umkheih hae sah.
16 Kum sari lungkhu
ccungccaw thinlung hoi leite,
sarangpaw thinlung hoi sah.
17 Ahang Huaccepaw Pachia nynh
ccungccaw hae peenaw kha
a uk cipaw te tuh-e peenaw tuh
a pya rypaw ccungccaw kha pya zah,
anyaa huapaw ccungccaw hae kha mah
a pya hae cipaw kha
ccungccaw balyn nynh
a ny ccaw hae cite,
thingku ngawtu hae nynh
tuhcite byapia hae,
tuh-e byapaenaw tuh
athyaapaw vaawccungccaw hae kya-e
kawpyanaw liate nynh thua,’ a ci.
18 E hynh kae, Nebukhadnezzar Siapharan nynh maan ka sahpaw nynh thua. Atu tuh Belteshazzar, nang nynh ka maan kha leihtua; ka peenaw lungkhu umpaw mihaw hae balyn nynh ka maan kha a leih kho khyh hae zemah, nang tuh athyaapaw pachia hae muisaw te phe na bia keiccuze maan kha na leih kho,” a cipya.
Daniel nynh Vae Ningnaw Maan kha A Leih
19 Te Belteshazzar cikuhpaw Daniel tuh sosoh lungkhu myarya a lungriathae zah a thinphang. Siapharan nynh, “Belteshazzar, ka maan te asuilan nynh na thin ae phangsah nan sah,” a cipya. Belteshazzar nynh, “Ka bawipaw, na maan hynh nang ae hua hae paw elang thua sah lah, na maan asuilan hynh na rhaw hae elang thua vae sah!
20 Na maan kya na muihpaw thingku, myarya le zah, anaw myarya abongpaw, adungpaccy tuh vaawlui phe phahpaw, laephi pynpi adianaw kyate muih kho athuapaw,
21 anaw tuh myarya puithya zah athae myarya alungpaw, ahysuepaw balyn hanlan looh lang phe azawpaw, aku kaw khe loramsaw hae um hae zah, vaawlang e pavaw hae nynh akaran kyakhe bu a luakunaw hae paw thingku tuh—
22 namaw nynh na thua, pou siapharan! Nang tuh na le zah na thung. Na lesaenaw tuh houhouh le zah vaawlui phe aphah, na uknaw tuh laephi adianaw cia phe a thua.
23 Siapharan nynh a do lyakhe, athyaapaw ngawtu lu kheit tuh vaawlang te yn rungbung zah, ‘Khah-e thingku kha nge lah rotua, thuasalama a ccungmuing te a tharui kha tuh laephi kya cciatawtua, sivawrui te sohinrui ryte khiide lah, ramkaw e lonua kya cciatawtua, kum sari lungkhu vaawlang e dangtui nynh ccawphu sah lah, loramsaw hae ryte umkheih hae sah,’ a ci—
24 Pou siapharan, e hynh na maan asuilan thua zah, tuh-e tuh Ahang Huaccepaw Pachia nynh ka bawipaw siapharan na tungvaw kya a thuasah lanpaw nynh thua:
25 Ccungccaw hae laku kyate nang kha dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung, tangnuapaw hawte lonua kha na boukuh cih zah, kum sari lungkhu vaawlang e dangtui nynh ae ccawphu cih.
26 Thingku a ccungmuing te a tharui kha cciataw lan kawpya athua, cipaw asuilan tuh, Pachia nynh laephi pynpi a uk cipaw he na nyh te, na peenaw kha namaw hanlan bua atyn cih cinawpaw nynh thua.
27 Tukeiccuze, pou siapharan, tuanaw kae pyapaw hynh beih lawku tua: dingnaw raenaw khate na seinaw kha shawkhawkuh lah, tuaasahkunaw a teing hae paw tungvaw thawccinaw hoinaw khate na hoyleinaw kha shawkhawku tua, tuhteze nynh na hiin hoynaw ccyh asae cih,” a ci.
Nebukhadnezzar Maethyanaw Muenaw
28 E hae balyn nynh Nebukhadnezzar siapharan tungvaw a thuanua.
29 Sawpaw sah haw lae ning he athang te, siapharan tuh Babilon e a siapharan inn innccuvaw khe cceih zah,
30 “E hynh alesaepaw Babilon, siapharan umnawpaw khuapi lang cite athungpaw ka huhan te aphu-epaw ka lesaenaw hanlan ka raepaw thua khyh tou?” a ci.
31 Tuh-e bya a ho lyakhe, vaawlang te roi roikheit yn ccae zah: “Pou Nebukhadnezzar siapharan, ka bya hynh ngaetua: Na peenaw tuh na kyate lawpya athua vae!
32 Nang kha ccungccaw hae kyate ccaring dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung tangnuapaw hawte lonua kha na boukuh cih,” a cipya.
33 Tuh-e bya tuh Nebukhadnezzar tungvaw palou accing. Aning kha ccungccaw hae kyate dee thua zah, tangnuapaw hawte lonua kha a boukuh, vaawlang e dangtui nynh a pyn kha phe a ciasah; a ming tuh mosipi ming hawte sae zah, a kuihting te a ccuting tuh pavaw ccuting hawte asae.
Nebukhadnezzar nynh Pachia A Thehoysah
34 Tuh-e ccyh he athang te, kae, Nebukhadnezzar tuh vaawlang khe ka do zah, ka lungccingthui.
Ahang Huaccepaw Pachia kha
the ka hoysah,
zungzae hiinpaw Pachia kha
sawtuate the ka hoysah.
Pawccecize a uknaw tuh
zungzae tynpaw uknaw thua zah,
a peenaw tuh she takyh kya atyn.
35 Laephi ccungccaw balyn tuh
alakawpaw lang ria thua hae zah,
vaawccungccaw hae te
laephi ccungccaw hae kha
a ry hawte a cyi hae.
Humhung nynh mah
a kuih kha khee kho khyh zah,
“Pawmou na cyi?” cite
a hopah khopaw um khyh.
36 Tuh ccyh lyakhe, ka lungkyhthui zah, ka peenaw a phu-e nawlan ka lesaenaw te ka sung-enaw kha ka muethui. Tuanaw yn pyatu hae te ka kuihkaw e bawi hae nynh kae kha yn cciadue hae zah, ka peenaw kya uknaw kaw kha pyathui ka thua, langmawlya laeze ka huhan tuh houh alehua.
37 Atu kae, Nebukhadnezzar nynh vaaw Siapharan kha the ka hoysah, ka hangthung zah saw ka tua;
pawccecize a cyipaw balyn tuh kyh zah,
a laanpi tuh ading;
a lysakuh hae paw kha
a nyaasah bung kho hae.