2
Nebukhadnezzar Maan
1 Nebukhadnezzar nynh siapharan lang a tangnaw kum ningnaw kum khe maan ccangkheit sah zah, a lungvaw a sawsah keiccuze ih kho khyh.
2 Tukeiccuze siapharan nynh mitleihthya hae paw, beidinhothya hae paw, naawthya hae paw te Khaldi hae kha a maan leih lan pum khylan kaw a pya hae. Minmin tuh oun thua hae zah siapharan malang he a thadyn hae te,Ref 2.2: Gen 41.8
3 siapharan nynh minmin kha, “Maan ccangkheit ka sah zah, tuh-e maan asuilan ka ny ry keiccuze ka lungvawsaw,” a cipya hae.
4 Khaldi hae nynh siapharan kha Aramaik bya te khung hae zah,note2.4 E kyate byaria 7 athang cia Hebru bya kha mang leite Aramaik bya kha a mang. “Pou siapharan, na hiinshe sae vae sah! Na maan kha kaening oun hopah lah, kae leihpah cih,” a cipya hae.
5 Siapharan nynh Khaldi hae kyakhe, “E hynh kaw ka thopaw nynh thua: ka maan te ka maan asuilan kha nae leihpya khyh oh ze, nae kuih nae ccu kha pae athua cih zah, nae inn tuh aronahpaw apumkuhpaw lang a tang cih.
6 Thuasalama ka maan te ka maan asuilan kha nae leihpya kho oh ze, lasung, nae ryalaw mee te alesaepaw sawtuanaw kha kae pya cih oh. Tukeiccuze ka maan te ka maan asuilan kha yn hopya tua oh,” a cipya hae.
7 Minmin nynh, “Siapharan nynh na maan kha masaty kaening oun hopah lah, na maan kha kae leihpah kho cih,” cite vae ningnaw bya a khung hae.
8 Siapharan nynh, “Tynkaring lan kaw ka tho vae paw kha na ny oh keiccuze, accyh khaw cia rosah lanpaw kha na zuaku oh cipaw ccaerarih lan ka ny:
9 Maan kha nae hopya khyh oh ze, nae hanlan detahnaw a um cih. Ccyh arulaeku mawlaezung hynbya hopya lan cite naemaw laku kya nawccawnaw na hoi vae oh. Tukeiccuze maan kha yn hopya tua oh, tetuh maan asuilan nae leihpya kho oh paw kha ka nyh cih,” a cipya hae.
10 Khaldi hae nynh siapharan kha, “Siapharan nynh ny na rypaw hynh ae hopah khopaw tuh laephi vawlan lu kheit san um khyh! Alesaepaw te athungpaw siapharan humhung nynh mah mitleihthyapaw, beidin hothyapaw te Khaldi hae kha hynhcihawpaw bya hynh khia boi khyh hae.
11 Siapharan nynh na khiapaw bya hynh myaryamaw aru, achih khopaw ccungccaw hae kya a umbua leipaw pachia hae holeite tuh, humhung nynh mah ae hopah kho lan khyh,” a cipya hae.
12 E bya keiccuze siapharan tuh a bung phe paw zah, Babilon khua umpaw mihaw hae balyn kha chia lan kaw a tho.
13 Kaw kha tho thua vae zah, mihaw hae kha chianaw anae vae; te Daniel te a ban hae kha chia khylan a ccung hae.
14 Siapharan a rintu bawi Ariok tuh Babilon mihaw hae kha chia khylan he a pou tuh, Daniel nynh raeringkute hawnaw bya khate siapharan inn e bawi, Ariok kha hopah zah,
15 “Pawccemou siapharan nynh hynhcih baban arang lante kaw a tho?” cite a khia. Ariok nynh khah-e konglang kha Daniel kya ccaerarih lan a hopya.
16 Tukeiccuze Daniel nynh siapharan kalan cceih zah, maan asuilan leihpya khylan, siapharan nynh accyh a pya nawlan a ngiaku.
Pachia nynh Nebukhadnezzar Maan A Leih
17 Te Daniel tuh a inn lang cceih zah, a ban hae, Hananiah, Mishael te Azariah kha a hopya hae,
18 amaw Daniel te a ban hae te Babilon ram e tuhlaepaw mihaw hae tuh chia athua khyh nawlan hae, e byakhupaw konglang hynh vaawlang e Pachia kalan thawccinaw ngia khylan a hopya hae.
19 Tetuh byakhupaw tuh khuazi vizin kyakhe Daniel kya phy athua vae, te Daniel nynh vaawlang e Pachia kha the a hoysah.
20 Daniel nynh ho zah:
“Hawnaw te thungnaw tuh
amaw kya-e athua keiccuze
Pachia min tuh she kheit koute
she kheit thehoyte umsah.
21 Aning nynh accyh te
kumvaelori kha a rulae,
siapharan hae kha
sahbung hae zah a hangthung hae;
mihaw hae kha hawnaw pya hae zah,
nythyanaw a hoi hae paw kha
nynaw a pya hae.
22 Akhupaw te thuruhpaw
uccaw hae kha a langsaku;
mohnaw kya a umpaw
miakaw kha nyh zah,
awnaw tuh amaw kya a um.
23 Pou ka minpaaw hae Pachia,
na tungvaw lungtuabya hote,
kae thehoysah,
pawccecize hawnaw te
thungnaw kha nae pya vae,
kaening nynh kae ngiapaw kha
atu ka kya nae phypya vae,
siapharan nynh kaw oun pyapaw kha
kaening kalan nae phypya vae,” a ci.
Daniel nynh Maan A Leih
24 Tukeiccuze Daniel tuh Babilon mihaw hae kha chia lan siapharan nynh rya a pyapaw Ariok kalan cceih zah, “Babilon mihaw hae kha theih nan hae; kae hynh siapharan malang yn thuakhae lah, a maan kha ka leihpah cih,” a cipya.
25 Tetuh Ariok nynh Daniel kha siapharan malang khe arangte thuakhae zah: “Na maan ae leihpah kho cih paw lu kheit kha kyngpaw Judah hae laku kya ka muih vae,” a cipya.
26 Siapharan nynh a min Belteshazzar cikuhpaw Daniel kha, “Maan ka sahpaw te ka maan asuilan kha nae leihpah kho cih tou?” a cipya.
27 Daniel nynh siapharan kha, “Siapharan nynh na khiapaw byakhupaw hynh asuilan ae hopah khopaw ahawpaw ccungccaw, beidinhothyanaw, mitleihthyapaw, apawepaw lu kheit san um khyh,
28 thuasalama byakhupaw asuilan ae hopah khopaw Pachia lu kheit tuh vaawlang khua kya a um, aning nynh nyathya nin kya yn cyihkuh lanpaw kha namaw Nebukhadnezzar siapharan kya ae hopya vae. Na i lya-e na maan te vizin na muih hae paw kha hynh-e hae nynh athua:
29 Pou siapharan, na i lyakhe malang yn cyihkuh lanpaw kha maan na sah; byakhupaw ae leihpahpaw Pachia nynh malang yn cyihkuh lanpaw kha na kya ae langsahpyaku.
30 Thuasalama ccangpaw ahysuepaw laeze hawnaw ka hoi keiccuze, e byakhupaw hynh Pachia nynh ka kya a langsahkupaw thua khyh, thuasalama siapharan nynh na maan asuilan kha na ny kho nawlan te na lung kya yn thungkuhpaw tuanaw kha na thaethya kho nawlan nynh thua.
31 “Pou siapharan, ngawran na do zah, myarya lepaw zohtuh kha na muih. E zohtuh tuh myaryamaw ale, phaephae aw zah huatawpaw thua khyh; na malang khe thadyn zah a muinsan tuh ri lan a um.
32 Tuh-e zohtuh a lu tuh sui ccipaw thua zah, a by te a kuihbaw hae tuh ngun nynh thua, a vue te a phae tuh sohin thua zah,
33 a ccu tuh sivaw nynh thua, a ccuphe abang tuh sivaw thua zah, abang tuh anglae nynh thua.
34 Na do lyakhe ccungccaw kuih te cyithui athua leipaw lungtungpi ccangkheit tuh amaw pou lan yn pou zah sivaw te anglae khate raekuhpaw a ccu kha deih zah zoihtatyh lan phe koi.
35 Te sivaw, anglae, sohin, ngun te sui tuh zoihtatyh lan marya a koi hae, te hawnin ccyh lyaze huimin kya-e asipaw hawte thua hae zah, khisan nynh muih lan a um lei lan ciate ccaring a mung hae. Thuasalama zohtuh a deihpaw lungtungpi tuh myarya lepaw mua lang tang zah laephi pynpi kya phe abeih.
36 “E hynh na maan nynh thua; atu na maan kha kae leihpah cih.
37 Pou siapharan, nang tuh siapharan hae siapharan nynh na thua, vaawlang e Pachia nynh peenaw, huhan, thungnaw te phu-enaw kha ae pya,
38 mih umnaw raveih um hae paw ccungccaw hae thuasah, sarangpaw hae thuasah, vaawlang e pavaw hae thuasah na kuih kya ae pya zah, minmin balyn kha a uktu lante ae rae vae, nang tuh zohtuh kya-e sui lu nynh na thua.
39 Namaw koute nang laeze anyaa huapaw ccangpaw peenaw ccangkheit yn langkuh cih, te laephi pynpi a uk cih paw ccangthumnaw peenaw athuapaw sohin peenaw tuh yn langkuh cih.
40 Te ccangpalinaw peenaw tuh yn um cih zah sivaw hawte a thawsae cih; sivaw nynh atyn-are balyn kha a koi a khya hawte, tuh-e peenaw nynh e hae balyn kha a koi a khya cih hae.
41 Zohtuh a ccu te a ccudung hae tuh anglae abang, sivaw abang athuapaw kha na muih thyhte, aphiakuhpaw peenaw athua cih; thuasalama sivaw te anglae apykuhpaw kha na muih thyhte, sivaw thawzung abang tuh tuh-e peenaw kya a um cih.
42 A ccudung hae tuh sivaw abang, anglae abang athua thyhte, tuh-e peenaw tuh thungnaw a hoi zemah koi azoi cih.
43 Sivaw te anglae apykuh hae paw kha na muih thyhte, minmin tuh lu kheit te lu kheit zuvaw lang a tang cih hae, thuasalama sivaw tuh anglae te apykuthya khyh hawte, pynkheihlan umkheihthya lan khyh hae.
44 Tuh-e siapharan hae she kyakhe papin aroh kho leipaw peenaw ccangkheit kha vaawlang e Pachia nynh a rae cih zah, tuh-e peenaw tuh mingccang hae kuih kya thua lan khyh. Kuih te cyi keiccu thua leite lungtungpi tuh mua kyate poh yn khohkuh zah, sivaw, sohin, anglae, ngun te sui hae a deihpaw kha na muih thyhte,
45 tuh-e peenaw nynh e peenaw hae balyn hynh a roh cih hae zah a thangsah cih hae, te tuh-e peenaw tuh zungzae atyn cih. Alesaepaw Pachia nynh malang yn cyihkuh lanpaw kha siapharan namaw kya ae hopya vae. Maan na sahpaw ccaccing kha kae hopya vae, na maan asuilan kha kae leihpya vae,” a cipya.
Daniel te A Ban hae Hangthungnaw
46 Tetuh Siapharan Nebukhadnezzar nynh a mae tebing zah Daniel kha a beik, te ccathae silawnaw te mynkhuhpaw kha Daniel kalan pya lan kaw a pya hae.
47 Siapharan nynh Daniel kha, “Thanccingte, na Pachia tuh pachia hae Pachia, siapharan hae Bawipaw, byakhupaw suilan kha a phy khopaw nynh thua, pawccecize nang nynh e byakhupaw suilan kha na phy kho vae!” a cipya.
48 Te siapharan nynh Daniel kha a rya kaesah zah aphutepaw lasung patae a pya, Babilon ram pynpi uktu lang nung zah, Babilon mihaw hae balyn kya lupi lang a nung.
49 Daniel nynh a ngia liate siapharan nynh Shadrak, Meshak te Abednego kha Babilon ram kya ryalaw synriatu lang a nung hae. Daniel tuh siapharan inn kya a um.