11
Media minphuinpaw Darias nynh ram a uknaw kum kheitnaw kum khe, aning kha bawm khylan te thawzung pya khylan ka thadyn.
“Atu byaccing kha kae hopah cih. Persia ram kya siapharan lu thum oun langkuh cih hae. Tuh-e hae balyn laeze lu palinawpaw tuh a hoirumhua, te a hoirumnaw liate thawzung he yn hoi tuh, Grik ram kha rawse khylan ccangpaw hae balyn kha a tuhou cih hae. Te arawthungpaw siapharan lu kheit yn langkuh cih zah, myarya lepaw ram kha ukte a lungry hawte a cyih cih. Huhan a hoi cciamang lyakhe a peenaw tuh a koi cih zah vaawlui zakaw aki ki pali langkhe a phiakuh cih hae, a peenaw kha a ciihan hae nynh uk vae lan khyh hae, thuasalama aning nynh a la ukpaw peenaw zeih kha huhan hoi lan khyh; pawccecize a peenaw kha lawpya athua vae cih zah, a ciihan athua leipaw milae hae nynh a ccou vae cih hae.
“Tetuh alia lang e siapharan tuh thawzung a hoithung cih, thuasalama a rhawbawi hae kya-e lu kheit tuh amaw laeze thawzung a hoihua cih zah, amaw laeze ram akohua a uk cih. Kum patae aro koute minmin tuh nawccawnaw a rae cih hae, alia lang e siapharan ccanung tuh thahlang e siapharanpaw kalan khe nawccawnaw tynsah khylan zu lang a cceih cih. Thuasalama tuh-e nopinung nynh huhan hoi lan khyh zah, tuh-e siapharan ciihan hae tuh tyn lan khyh hae. Tuh-e nopinung te a kya umbua hae paw, a ccaaw, amaw a bawmtupaw kha chia athua cih hae.
“Tuh ccyh lyatuin, tuh-e nopinung a puizia hae kyate tuh-e siapharan rya a sanlae lanpaw lu kheit yn pou cih. Aning nynh rhawkaw hae kha a ccianua cih hae zah, thahlang e siapharan rhawlungrua lungkhu lang teenuate a tuk cih hae zah a tae cih hae. Mih pachia hae, mih zohtuh hae, aphutepaw sui banang te ngun banang hae kha rhawtuknaw kya-e luadepaw uccaw hae lante Izip ram lang aning nynh a cciakhae cih. Thahlang e siapharan kha rhawtuk leite kum patae a sibia cih; te thahlang e siapharan nynh alia lang e siapharan kha rhaw a tuk cih, thuasalama amaw ram lang a ki cih.
10 “Thahlang e siapharan ccapaw hae nynh rhawtuk lan paccynkute, rhawkaw patae kha a pum cih hae, tui alepaw hawte malang khe a naangbia cih hae zah, a rhawlungrua kyacia bua a tuk cih hae. 11 Alia lang e siapharan tuh a thinria cih zah, thahlang e siapharan kha ccianuate rhaw a tuk cih, thahlang e siapharan nynh rhawkaw patae kha a suelua cih hae, tuhzemah alia lang e siapharan rhawkaw hae nynh a tae cih hae. 12 Tuhcite rhawkaw patae kha he a tae te, a thinlung tuh a hangsakuh cih, rhawkaw athong patae kha a tae hae zemah, rhaw kha po tae lan khyh. 13 Pawccecize thahlang e siapharan nynh atakaw lya laeze alung huapaw rhawkaw patae ryte rhaw bua a tho cih, kum beihtaraw aro te, aning tuh myarya lungpaw rhawkaw hae te aenia uccaw patae ryte oun cceih cih hae.
14 “Tuh ccyh lyakhe ccungccaw patae nynh alia lang e siapharan kha a rhaw cih hae. Na minphuin hae laku e a puatho hae paw nynh na muihpaw vizin kha ccingsah khylan rhaw a tho cih hae, thuasalama a shung cih hae. 15 Te thahlang e siapharan tuh yn cceih cih zah laekarung thaenuakute tynkaring lan akoihkuhpaw khuapi kha a lah cih. Te alia lang e rhawkaw hae nynh thuasah, a po hae paw rhawkaw hae nynh heize thuasah thadynnua kho lan khyh hae, pawccecize douru nawlan thawzung hoi khyh hae. 16 Tuh-e yn ccianuatupaw thahlang e siapharan nynh a rythyte a cyih cih zah, humhung nynh mah khee kho lan khyh. Ram apuithyapaw kya a um cih zah, tuin ram e atyn-are tuh a kuih kya a um cih. 17 A peenaw balyn kya-e thawzung khate ccianua lan a tuakuh cih zah, daenaw a um nawlan a rae cih. A rhaw hae peenaw kha ro khylan nopinung kha zu lang a pya cih; thuasalama tuh-e a tuakunaw tuh thua kho lan khyh zah thane lan khyh. 18 Tukoute rili kin e ram hae kalan a maekuh cih zah ccungccaw patae kha a kyng cih hae. Thuasalama ccangpaw rhawbawi lu kheit nynh a puathonaw kha zya a daesah cih; thanccingte, a puathonaw kha amaw toulou kalan a kisah cih. 19 Tetuh amaw ram lungkhu e rhawlungrua kalan khe a ki cih, thuasalama thypawkute a khuliakuh cih zah a zo vae cih.
20 “A ryalaw kha ccangpaw lu kheit nynh a sanlae cih zah, tuh-e paw nynh a peenaw tuh a phu-e ccaw cite bawi lu kheit kha a saw cih; thuasalama nin beihtaraw kya thinrianaw kya te rhawtuknaw kya thua leite a chih cih. 21 Tuh-e paw tuh siapharan huhan pyarua leipaw ccungccaw hoyleipaw nynh a sanlae cih; aning nynh raeringnaw pyaty leite a tee cih zah, thyaruhnaw khate peenaw kha a mue cih. 22 Amaw a doutu rhawkaw hae te Pachia Ranpibawi Lupi kha khaleih a tae cih hae zah a malang khe a theih cih hae. 23 Te aning te ccawkunaw a rae kou hae te, amaw nynh a ling cih hae zah ccungccaw beihtaraw kyalya te a thawzung umpaw lang a tang cih. 24 Raeringnaw pyaty leite ram lungkhu e a hoirum huapaw hmin hae kha a teenua cih hae, a minpaaw hae nynh a cyi boi lei hae paw kha a cyih cih zah, luadepaw uccaw hae kha a nee cih hae. Rhawlungrua te koihpaw khua hae kha tuk lan a paccynku zemah sosoh hanlan kyalya athua cih. 25 Myarya lungpaw a rhawkaw hae ryte alia lang e siapharan kha rawse zah, a thungnaw te a rawthungnaw khate a lung a thosahku, alia lang e siapharan nynh alung huapaw te athung huapaw rhawkaw khate a tuk cih. Thuasalama aning nynh tae lan khyh, pawccecize a looh a ae hae paw nynh amaw kha rawsete aruh lante a paccynnua cih hae. 26 Aning kha a phee cih hae, a rhawkaw hae tuh ro athua cih hae zah rhawkaw patae kha chia athua cih hae. 27 Tuh-e siapharan lu ning hae tuh ahoy leipaw kha tuate ccaboi ccangkheit kyakhe hynhupaw bya kha a hokuh cih hae. Thuasalama mih tuakunaw ccing lan khyh, pawccecize khyapaw accyh zaw loh khyh. 28 Thahlang e siapharan tuh sisua patae te a ram lang a ki cih, thuasalama a thinlung tetuh athyaapaw byakinnaw kha a rawse. A rypaw kha a cyih cih zah a ram lang a ki cih.
29 “Aning tuh khyapaw accyh kyakhe alia lang e ram kha a teenua cih, thuasalama langmawlya hawte thua vae lan khyh. 30 Pawccecize Kittim ccingbaw hae nynh a ccianua cih hae zah, aning tuh lungrote nulang a ki cih. Athyaapaw byakinnaw kha a thinria thyhte a cyih cih. A ki cih zah athyaapaw byakinnaw a vua hae paw kha pekite a oihsah cih hae. 31 Aning nynh a saw hae paw rhawkaw hae tuh oun thua cih hae zah beikinn te koihnawpaw kha a thusah cih hae. Tyty raepaw maee-ute silawnaw kha a daesah cih hae zah, ro a mangpaw anungsikuhpaw kha a nung cih hae.Ref 11.31: Dan 9.27, 12.11; Mat 24.15; Mar 13.14 32 Byakinnaw a vua hae paw kha tuh hynpyate a soih kho cih hae; thuasalama mih Pachia tungvaw mih lungzipaw tuh tynkaring lan a thadyn cih hae zah a douru cih hae. 33 Ccungccaw hae laku e mihaw hae nynh ccungccaw patae kha a ccangpah cih hae; thuasalama ccyh sosoh tuh thaloi te maeephupi khate chiakunaw, kyngkunaw te luadekunaw kha a teing cih hae. 34 Tuhcite he a teing hae te, bawmnaw beihtaraw a mue cih hae, ccungccaw patae tuh ahme lei lante minmin kalan a pan cih hae. 35 Accyh athang mawlaezung tuh, mihaw hae abang tuh syntawnaw teingte thyaasah athua nawlan hae, chia athua cih hae, pawccecize khyapaw accyh azaw mawlaezung tuhcite acyihkuh ung cih.
36 “Thahlang e siapharan nynh a lungry hawte a cyih cih. Amaw te amaw kha a hangsakuh cih zah pachia miakaw laeze alesaehua lante a tuakuh cih, pachia hae Pachia kha rawsete ri lan umpaw bya kha a ho cih. Thinrianaw ccyh tuh phe accing mawlaezung a laan a sui a ua cih, thuasalama byapaenaw thyhte cyi athua mamin cih.Ref 11.36: 2Th 2.3-4; Bya 13.5-6 37 Aning nynh a minpaaw hae kya-e pachia hae kha thuasah, nopi hae nynh a sungsah hae paw pachia kha thuasah sawtua lan khyh, ccangpaw pachia miakaw kha mah sawtua lan khyh, pawccecize amaw te amaw kha humhung balyn laeze ka lehua cite a tuaku. 38 Tuh-e hae laeze rhawlungrua pachia kha saw a tuahua cih; a minpaaw hae nynh a ny boi lei hae paw pachia kha sui, ngun, aphutepaw lung hae te amee rupaw lasung kha pyate saw a tuahua cih. 39 Ramccang pachia kya-e bawmnaw liate atyn huaccepaw rhawlungrua hae kha a rae cih. A tungvaw nawccawnaw a hoi hae paw kha houh a hoirumsah cih hae zah, ccungccaw patae a uktu lang a nung cih hae, ram kha lasung lang a nee cih hae.
Ccyh Thangnaw
40 “Ccyh athangnaw kya vae tuh alia lang e siapharan nynh aning kha rhaw a tuk cih. Thuasalama thahlang e siapharan nynh marangle hae, marang rhawkaw hae te ccingbaw patae khate khiccung hawte a douru cih zah, tuh-e ram hae kha tui alepaw hawte teenuate a tuk cih hae. 41 Aning nynh apuithyapaw ram kha a teenua cih zah ccungccaw athong patae kha a theih cih, thuasalama Edom ram, Moab ram te Ammon hae ram kyaze abyapihua hae paw tuh aning kuih kyate a lue cih hae. 42 Aning nynh ram hae kha a tuk cih hae zah, Izip ram mah lue lan khyh. 43 Aning tuh aphutepaw sui, ngun te Izip ram a hoirumnaw balyn kha a uktu lang a tang cih; Libia ram te Ethiopia ram nynh mah a nulang a zui cih hae. 44 Thuasalama nithua lang te thahlang e thongpang nynh a thinphangsah cih zah, ccungccaw patae kha ro khylan te maemih khylan myarya thinriate a pou cih. 45 Rili te apuithyapaw mua thyaapaw laku khe a siapharan bu kha a sak cih. Tuhzemah a bawmtu lu kheit san um leite aning athangnaw ccyh tuh a thua cih.