10
Minphuin hae Rhawkunaw
Sairas nynh Persia siapharan lang a tangnaw kum thumnaw kum khe, Belteshazzar cite minphu athuapaw Daniel kyakhe bya ccangkheit phy athua. Tuh-e bya tuh akyhpaw thua zah, myarya lepaw rhawkunaw te asekuhpaw nynh thua. Tuh-e bya kha nyhthya zah a muihpaw vizin kha mah a thaethya.
Tuh ccyh lya tuh kae, Daniel tuh lonaw naw thum ngaethyate ka um vae. Aepaw thuapaw kha ka ae khyh, saw mah ka ae khyh, misutui mah ka neih khyh, chitui mah papin ka thuhkuh khyh, lonaw naw thum phe ccing lan tuhcite ka um. Masaty sawpaw, nin kuin nin pali nin, Tigris vawpi pe ka thadyn lyakhe, ngaw ka do zah laaw te kuapaw boeining kha lawkuh zah Ufaz sui taeccia cciakuhpaw ccungccapaw kha ka muih.Ref 10.5-6: Bya 1.13-15, 2.18, 19.12 A pyn tuh aphutepaw lung te lokuh zah a mae tuh khozawlaekuhpaw nynh alo, a mit tuh a awpaw dahmaee te lokuh zah a kuih te a ccu tuh awrarih lan nuihpaw sohin te nynh aloku hae, bya a hopaw roi tuh ccungccaw zapi roi nynh alo. Kae, Daniel lu kheit rou nynh vizin kha ka muih; kae umkheihpaw ccungccaw hae tuh muih khyh hae; myarya thyngkute ccue hae zah a rekuh hae. Tukeiccuze tuh-e myarya lepaw vizin tuh muih khylan ka makhae nynh ka umhy vae. Ka thawzung zya zah ka ngesaw tuh dawkadae lan acih, ka thaw um vae khyh. Te bya a hopaw roi kha ka thae; bya a hopaw roi kha he ka thae te, phe ka ningkuh zah laekhu kya moh ka bakhung.
10 Te kuih ccangkheit nynh kae kha yn kyng zah kae tuh ka kuih te ka ccukharu khate ka thokuh. 11 Aning nynh kae kha, “Sungsah lan kou umpaw Daniel, kae hopah cih paw bya hynh hoyte ngaetua. Thadyntua, pawccecize kae hynh na kalan saw ka thua,” yn cipya. Tukeiccuze aning nynh e bya yn hopya lyakhe thyngkute ka thadyn. 12 Aning nynh kae kha, “Daniel, rih nan, pawccecize thaethya khylan te na Pachia malang zakawsangsaku khylan na thinlung kya bya na paeku takaw nin kyamawte na bya kha thaethya thua vae zah, tuh-e na bya keiccuze kae tuh kae thua vae. 13 Thuasalama Persia ram uktu bawi nynh nin kuin lae kheit lungkhu phe yn khee. Tukeiccuze lupi lu kheit athua buapaw Mikhael tuh kae kha bawm khylan yn thua, te aning kha Persia ram uktu bawi ryte tuin kya ka cciataw hae,Ref 10.13, 21: Bya 12.7 14 nin athang nin kya na ccungccaw hae kya yn cyihkuh lanpaw kha nang thaethyasah khylan kae thua vae. Pawccecize e vizin tuh malang ccyh hanlan nynh thua,” yn cipya.
15 Aning nynh e bya yn hopya lyakhe ka mae tuh laekhu kya ka bakhung zah bya ka ho khyh. 16 Te ccungccaw muinsan alopaw lu kheit nynh ka mung kha yn hae zah byaho khylan ka khalang tuh ka aw, te ka malang a thadynpaw ccungccapaw kha, “Ka bawipaw, ka tungvaw teingnaw yn thuakhaepaw e vizin keiccuze ka thaw um khyh. 17 Na ryalahtu kae nynh ka bawipaw kha pawtemou bya ka hopah kho cih? Pawccecize ka thyngkuh zah ka thawzung um vae khyh, ka hy mah um vae khyh,” ka cipya.
18 Tukoute ccungccaw muinsan lopaw lu kheit nynh kae kha yn hae zah ka thaw bua yn umsah. 19 Aning nynh, “Sungsah lan kou umpaw, rih nan, nang tuh na khyn. Na thawsae sah lah, na rawhoy sah!” yn cipya. Aning nynh he yn hopah tuh thawzung ka mue zah, “Ka bawipaw, yn hopah ccaleih, pawccecize thawzung phe nae pya vae,” ka cipya. 20 Tetuh aning nynh, “Pawccemou na kalan kae ccia cipaw na nyh tou? Persia bawipaw kha rhawtuk khylan atu ka ki cih, te ka cceih koute Grik bawipaw tuh yn thua cih. 21 Thuasalama byaccing ccauh kya zei athuapaw kha kae hopah cih. Na bawipaw Mikhael holeite tuh ka kalan pante, e bawi hae a rawsepaw lu kheit san um khyh.