7
1 Sungsah hae, hynh-e byakinpyakupaw hae hynh ah hoi oh keiccuze pynsaw te muisaw nungsikunaw miakaw kyate ahmaw te ahmaw hynh ccikankuh oh sih lah, Pachia rawri te thyaanaw kha ccingsah oh sih.
Korin hae Ngaesikunaw
2 Kaening hynh thinlung oun hungpah oh; kaening tuh hum kya sanmah kae cyihsei khyh, hum sanmah kae roh khyh, hum kya sanmah kaemaw thanenaw kae ccungkuh khyh.
3 Hynh-e hynh nanning kha seibe khylan ka ho khyh; pawccecize nanning tuh kaening te chi ze chikheih hiin ze hiinkheih, kae thinlung kya na um oh cite langmawlya phe kae hopya vae oh.
4 Nanning konglang te myarya leih ka pookuh; nanning liate myarya ka lunglekhaekuh, ngaengannaw te phe ka beih. Riathaenaw kae teingnaw kya balyn kae tuh myaryamaw ka lungtua.
5 Pawccecize Mesidonia ram lungkhu lang he kae thua te, kae pynsaw haeungnaw ccyh hoi khyh, aphuinphuin te riathaenaw kae tung—atolang tuh doukunaw um zah, alungkhu lang tuh rinaw a um.Ref 7.5: 2Ko 2.13
6 Thuasalama mih lungthawthang hae paw kha ngaengannaw a pyatu Pachia nynh Titu yn thuanaw liate kaening kha kae ngae oun ngansah.
7 Titu yn thuanaw liate kyalya thua khyh, Titu nynh nae kyate a muepaw ngaengannaw liate mah kaening tuh kae thawmuin; nae pekinaw, nae rawnaw te ka hanlan na zuakunaw oh kong kha aning nynh oun hopya keiccuze kae tuh ka lung houh tua.
8 Pawccecize ka ccaky te nanning kha nae ngae kae la thyasah oh zah ka la ngaesiku ze heize, atu tuh ka ngaesikuh vae khyh; pawccecize tuh-e ccaky nynh sosoh rou nynh nae ngae ae thyasah oh cipaw ka ny.
9 Atu ka lungtuapaw hynh nae ngae ae thyasah oh keiccu thua khyh, nae ngaethyanaw nynh ngaesikunaw ae hoisah oh keiccu nynh thua; pawccecize kaening keiccuze pawpaw mah na shung khyh nawlan oh, nanning kha Pachia rynaw thyhte nae ngae ae thyasah oh.
10 Pawccecize Pachia rynaw thyhte athuapaw ngaethyanaw nynh tuh khumnaw kalan a thuakhaepaw ngaesikunaw kha thuakhae zah, ngaethyanaw kha thuakhae khyh; thuasalama laephi te asekuhpaw ngaethyanaw nynh tuh chinaw kha a thuakhae.
11 Pawccecize Pachia rynaw thyhte hynh-e ngaethyanaw nynh nae lungkhu kya pawcihawpaw lungthonaw mou a thuakhae cipaw dotua oh: naemaw te naemaw sei thyaasahkunaw, atazae leipaw kya thinrianaw, rawrinaw, myarya pekinaw, thawte zuapyakunaw, detahnaw hae kha nae kya a thuakhae. Hynh-e uccaw kya nanning tuh seinaw na hoi vae khyh oh cipaw kha pawpaw kya balyn phe na langsaku vae oh.
12 Tukeiccuze nae kalan ccaw ka zei zemah a cyihseipaw keiccu ka zei khyh, cyiseinaw a teingpaw keiccu mah ka zei khyh, nanning nynh kae tungvaw kya lungthonaw na hoi oh paw kha Pachia malang hoyte na ny nawlan oh nynh ka zei.
13 Tukeiccuze hynh-e nae ngaengannaw kya kaening mah kae ngaenganbua. Tuh-e kae ngaengannaw apiaze, Titu a lungtuanaw liate kaening mah myarya kae lungtuabua, pawccecize nanning balyn nynh Titu kha a lung na tuasah oh.
14 Titu kyakhe nanning konglang ccangkhakheit ka pooku vae ze, ka maethah khyh; nae kya kae hopaw miakaw tuh ahmepaw athua hawte, Titu kya kae pookunaw tuh mah ahmepaw nynh thua cipaw alang.
15 Nae balynte a bya na ngae oh zah, rawri thyngkute na cciadue oh paw kha he a liathui tuh, nanning ae sungsahnaw oh kha houh ale.
16 Kae nynh nanning kha atyn-are kya kae zyn oh keiccuze ka lungtua.