4
1 Tukeiccuze Pachia nynh ngaethya oun umsahnaw liate hynh-e ryalaw hynh kae law keiccuze kae lungthang khyh.
2 Aruh lante kae cyipaw maethya lan umpaw uccaw hae kha kae vua vae; thyaruhnaw te hiin leite, Pachia bya kha ccungccaw ling nawlan kae mang khyh; byaccing kha ccaerarih lan langsakunaw liate Pachia malang khe ccungccaw miakaw thinlung kya thehoysah lan umpaw ozia khate nynh kae hiin.
3 Kae phypaw thehoypaw tuh phang bong athua lanze, tuh-e tuh azo cciamang hae paw hanlan rou nynh phang bong athua.
4 Pachia muinsan athuapaw Khri kya-e aphu-epaw thehoypaw awnaw tuh a zyn lei hae paw kya a aw khyh nawlan, mih thinlung kha hynh-e laephi pachia nynh phe a mohsah.
5 Pawccecize kaening nynh kae hopaw tuh kaemaw kong thua khyh; Khri Jesu tuh Bawipaw nynh thua cipaw te Jesu keiccuze kaening tuh nae see hae nynh kae thua cipaw kha nynh kae ho.
6 Pawccecize, “Mohnaw kyate awnaw tuh phaephae aw sah,” cite a hotupaw Pachia nynh Jesu Khri mae kyakhe Pachia phu-enaw nynawpaw awnaw kha pya khylan, ah thinlung kya phaephae a awsah vae.Ref 4.6: Gen 1.3
7 Thuasalama hynh-e ahang huaccepaw thungnaw tuh kaening kya-e thua leite Pachia kya-e nynh thua cipaw langsaku nawlan, kaening nynh laephi ang hae kya hynh-e sisua hynh kae hoi.
8 Vawsawnaw aphuinphuin kae tung salamah koi tuh kae koi khyh; kae lungvawsaw salamah kae lungthang khyh;
9 tuaasahnaw kae ing salamah ccaring vua kae thua khyh; oun khulia hae salamah ro kae thua khyh.
10 Jesu a hiinnaw kha mah kae pyn kya a langku ccaw cite Jesu a chinaw kha kae pyn kya zungzae kae phubia.
11 Pawccecize Jesu a hiinnaw kha a chihthyapaw kae pynsaw kya a langku ccaw cite, kae hiin lungkhu balyn Jesu keiccuze chinaw kalan palei oun ap hae.
12 Tukeiccuze kaening kya tuh chinaw nynh ryalah zah, nanning kya tuh hiinnaw nynh rya a lah.
13 Ccathyaa nynh, “Kae tuh ka zyn keiccuze ka ho,” cite a ho thyhte, tuh-e te alokuhpaw zynnaw muisaw kha kae hoi pawte, kaening mah kae zyn keiccuze kae ho.Ref 4.13: Sam 116.10 (LXX)
14 Bawipaw Jesu a thoosahtupaw nynh kaening kha mah Jesu ryte oun thoosah bua cih zah, nanning ryte amaw a umnaw kalan oun teekhae cih cipaw kae ny.
15 Pawpaw balyn tuh nanning hanlan nynh thua; tuhcite a thawccinaw tuh ccungccaw alunghua kya a pazaeku keiccuze Pachia phu-enaw hanlan lungtuabya honaw tuh houhouh alung cih.
Zynnaw liate Hiinnaw
16 Tukeiccuze kae lungthang khyh. Atolang e kae pyn tuh roh salamah, alungkhu lang e kae muisaw tuh nin kheit koute nin kheit thawsah athua.
17 Pawccecize sosohtari kae teingpaw, zawbahaepaw hynh-e vawsawnaw nynh khinkhia kho leipaw, myarya akhinccipaw zungzae phu-enaw kha kae hanlan oun paccynpya.
18 Tukeiccuze muih khopaw uccaw hae kha do leite muih kho leipaw uccaw hae kha nynh kae do; pawccecize muih khopaw uccaw hae tuh sosoh nynh atyn, thuasalama muih kho leipaw uccaw hae tuh zungzae atyn.