13
Raeringnaw Bua Pyanaw
1 Atu hynh nae kalan kae thuapaw vae thumnaw athua cih. Ccathyaa nynh, “Seibenaw miakaw tuh ccaekia lu ning khyhze lu thum nynh a ho hae paw bya te rou nynh tynsah athua cih,” a ci.Ref 13.1: Deu 17.6, 19.15
2 Nae kalan bua kae thua ze hum sanmah ngaethya ka umsah lan khyh cite vae ningnaw kae thua lyaze langmaw a sei hae paw te tuhlaepaw balyn kha raeringnaw ka pya hae, atu nae kya ka um khyh lya mah minmin kha raeringnaw ka pya hae;
3 pawccecize Khri nynh kae ka kyate bya a ho cipaw ccaekia kha na ry oh; Khri tuh nanning te na kyngkunaw oh kya nyaa khyh, nae kya a thungpaw nynh thua.
4 Pawccecize aning tuh nyaanaw te vaelantung kya khiade athua zemah, Pachia thungnaw liate a hiin; tuhawte kaening mah amaw kya kae nyaa zemah nanning te ah kyngkunaw oh kya Pachia thungnaw liate amaw ryte kae hiin cih.
5 Zynnaw kya na hiin oh tou, na hiin khyh oh tou cipaw naemaw te naemaw sihseikuh oh. Naemaw te naemaw syntawku tua oh. Tuhte na syntawkuh oh zah na shung ccaccing khyh oh ze, nae kya Jesu Khri a um cipaw na nyhkuh khyh oh tou?
6 Kaening tuh kae shung khyh cipaw na nyh cih oh cite ka zyn.
7 Nanning nynh ahoy leipaw kha kharouh na cyi khyh nawlan oh Pachia kalan saw kae sang— kaening tuh syntawkunaw kya kae shung khyh cite langsaku rypaw thua khyh, kaening tuh a shung hae paw hawte kae la thua zemah nanning nynh ahmepaw kha na cyi ccaw oh cite nynh saw kae sang.
8 Pawccecize kaening tuh byaccing rawsete pawsang mah kae cyih kho khyh, byaccing hanlan rou nynh kae cyi.
9 Kaening tuh kae nyaa zah nanning tuh nae thawsae ze, kae lungtua. Accingpaw lang na tang nawlan oh saw kae sangpya oh.
10 Tukeiccuze ronaw hanlan thua leite thawzung tynsahnaw hanlan Bawipaw nynh kae yn pyapaw kawhoinaw kha he kae thua te rehahan lante ka mangsei khyh nawlan, nanning te ah sawku lya oh hynh-e ccaw hynh nae kalan kae zei.
Nyathya Beihlangnaw
11 Uteno hae, nyathyakou kya kae beihsya oh. Accingpaw lang tang lan zuakuh oh; kae ngia oh paw kha la ngae oh, lu kheit te lu kheit lungngingte um oh lah, lungdaete la um oh; sungsakunaw te daenaw Pachia tuh nanning ryte a um cih.
12 Athyaapaw myngkunaw khate lu kheit te lu kheit byabeihkuh oh.
13 Mithyaa hae balyn nynh nanning kha ae beihlang oh.
14 Bawipaw Jesu Khri thawccinaw, Pachia sungsahnaw te Thyaa Muisaw vaeccawkunaw tuh nae balyn tungvaw kya la um sah. Amen.