11
Paul te Ahme leipaw Locceihtu hae
1 Ka ngaeenaw hynh sosoh oun ngaesangpah oh ci ka ry. Beih yn ngaesangpah oh!
2 Pachia nynh a thawsia hawte kae mah nae hanlan ka thawsia, pawccecize nanning kha athyaapaw liaccady hawte Khri kalan pya khylan, Khri athuapaw vawpaw lu kheit te chiapya lan phe kae haaw vae oh.
3 Thuasalama hupaw nynh a thyaruhnaw khate Evi kha a ling hawte nae thinlung kha thyaararih lan Khri na zuinaw oh kyate ae cciakhaesei cih oh cipaw ka thinphang.Ref 11.3: Gen 3.1-5, 13
4 Pawccecize lukhakheit nynh nae kalan yn thua zah kaening nynh kae ho leipaw ccangpaw Jesu kong kha a ho ze thuasah, na mue oh paw te alokuh leipaw muisaw kha na mue oh ze thuasah, na lawku oh paw te alokuh leipaw thehoypaw kha na lawku oh ze thuasah kou hoy lan la ngaesang oh.
5 Kae tuh hynh-e abyapi huapaw locceihtu hae laeze kharouh ka nyaahua khyh cite ka tuaku.
6 Kae tuh byaho a thya leipaw ka thua zemah, nynaw kya tuh tuhte ka thua khyh; hynh-e konglang hynh pawpaw kya balyn aphuinphuin te nae kya kae langsaku vae.
7 Nanning kha hangthung khylan kamaw te kamaw zakawsangsakute, amee mue leite Pachia thehoypaw kae hopya oh keiccu kae tuh seinaw ka rae tou?
8 Nanning hanlan ryalaw khylan ccangpaw khriccaawbuu hae kya-e bawmnaw kha lawte minmin kha ka luade hae cite heize ho kho athua.
9 Nae kya ka um lya ka hanlan ahobou lya kha hum sanmah phupaw ka risah khyh; pawccecize ka hanlan ahoboupaw kha Mesidonia langte oun thua hae paw uno hae nynh yn bawm hae. Tukeiccuze kae tuh nanning kha phupaw ae risah oh paw ka thua khyh nawlan pawpaw balyn kya ka raeringkuh, tuhte po ka raeringkuh cih.Ref 11.9: Phil 4.15-18
10 Khri kya-e byaccing tuh ka kya a um thyhawte, Akhai ram hae kya hynh-e ka pookunaw hynh hum nynh sanmah yn khee kho lan khyh.
11 Pawccemou? Nanning kha kae sungsah khyh oh keiccu tou? Kae sungsah oh paw kha Pachia nynh phe ny.
12 Kaening hawte pooku lanpaw ccyhhoypaw a mue ry hae paw nynh tuh-e ccyhhoypaw tuh a muebua khyh nawlan hae, ka cyipaw kha po ka cyih ung cih.
13 Pawccecize khahcite a pookuh hae paw tuh ahme leipaw locceihtu hae, ahynpaw ryalahtu hae, Khri locceihtu hae lang mimaw te mimaw a umsakuh hae paw nynh thua hae.
14 Ngaeangthua lanpaw thua khyh! Pawccecize Satan nynh heize awnaw kya-e vaawpaw o-ang lante amaw te amaw kha a umsaku.
15 Tukeiccuze Satan a ryalahtu hae nynh mah dingnaw ryalahtu hae hawte a umsaku hae paw tuh ngaeang lanpaw thua khyh; minmin athangnaw tuh mih ryalawnaw hae thyhte athua cih.
Paul A Teingnaw
16 Hum nynh sanmah kae hynh mingaeepaw hawte yn tua nan sah cite bua ka ho; tuhte nae tua oh ze, kae nynh ccapyh ka pooku nawlan kae hynh mingaeepaw hawte oun ccou oh.
17 Hynh-e pookunaw kong ka hopaw hynh Bawipaw kya-e kawhoinaw te ka hopaw thua leite, a ngaeepaw hawte nynh ka ho.
18 Ccungccaw patae nynh pynsaw lante a pooku hae keiccuze kae mah ka pookuh bua cih.
19 Pawccecize nanning tuh na haw oh keiccuze mingaee hae kha lungtuate na ngaesangpya oh.
20 Lukhakheit nynh see lang ae mang oh ze thuasah, ae zuaku oh ze thuasah, ae luade oh ze thuasah, ae theihrya oh ze thuasah, nae mae ae bia oh ze thuasah nanning nynh na ngaesang oh.
21 Kaening tuh tuhte cyi lan myarya kae la nyaa cipaw kae maethyanaw kha nynh ka ho! Thuasalama a ngaeepaw hawte ka ho lanze, lukhakheit nynh hankhakheit kong a pooku ngan ze, kae mah ka pookuh ngan.
22 Minmin tuh Hebru hae athua hae tou? Kae mah Hebru paw nynh ka thua. Minmin tuh Israel hae athua hae tou? Kae mah Israel paw nynh ka thua. Minmin tuh Abraham ciihan athua hae tou? Kae mah Abraham ciihan nynh ka thua.
23 Minmin tuh Khri ryalahtu athua hae tou? Kae tuh houh a hoy huapaw ryalahtu nynh ka thua cite a ngaeepaw hawte ka ho—kae tuh thawmawte rya houh a lahpaw, avae patae thong a ccahpaw, riatae lei a zia a bua hae paw, vyavya leih a chihpaw nynh ka thua.Ref 11.23: Loc 16.23
24 Vae sung pali accing nawlan vae kheit ary lante Judah hae nynh vae pangaw yn bua hae.Ref 11.24: Deu 25.3
25 Ruising te buakunaw vae thum, lung te deihkunaw vae kheit, sanphalung nynh rokhaekunaw vae thum ka tung; zi kheit nin kheit rili vawlan ka phaly.Ref 11.25: Loc 16.22, 14.19
26 Atu te atu khua ka ccong zah vawpi kya vawsawnaw, damiah hae kyate vawsawnaw, kamaw ccungccaw hae kyate vawsawnaw, Zenta hae kyate vawsawnaw, khuapi kya vawsawnaw, ramkaw kya vawsawnaw, rili kya vawsawnaw, ahme leipaw uno hae kyate vawsawnaw kha ka tung.Ref 11.26: Loc 9.23, 14.15
27 Thawbangte rya rupaw lawnaw, i leite azi patae umnaw, vuelawnaw te tuihawnaw, atu te atu looh leite umnaw, akyaapaw teingnaw te boeining leite umnaw kha ka tung.
28 Tuhpiaze khriccaawbuu hae balyn hanlan ka thawsianaw nynh mah nin takyh phang yn ne.
29 Lukhakheit nynh a thawzya ze, kae mah thawzyabua leite ka um zawtou? Lukhakheit nynh a thy a pawku ze, kae mah lungriathae leite ka um zawtou?
30 Ka pooku lanze, kamaw ka thawzyanaw a langsakuhpaw uccaw kong kha nynh ka pookuh cih.
31 Kae tuh ka hyn khyh cipaw kha zungzae thehoysah athuapaw Bawipaw Jesu a Paaw te a Pachia nynh phe a ny.
32 Damaskas khuapi kyakhe Aretas siapharanpaw kuihkaw e uktu bawi nynh kae kha kyng khylan Damaskas khuapi kha rhawviatu hae a ngawsah hae.Ref 11.32-33: Loc 9.23-25
33 Kae kha shua lungkhu yn phang hae zah thanlan-aw kyakhate khualungrua kyate yn sahbung hae zah a kuih kyate phe ka lue.