KORIN HAE
KALAN LOCCEIHTU PAUL CCAKY KYNINGNAW
Corinthians
Korin hae kalan Paul Ccaky Kyningnaw hynh Paul te Korin khriccaawbuu laku kyngkunaw aru lyaze zeipaw ccaw nynh thua. Abang khriccaawbuu kya-e hae nynh thawmawte Paul kha a dou hae, thuasalama ccawkuthuinaw lanpaw a ry zia kha langsakuh zah yn ccawku vae ze a lungtua zia kha a ho.
A ccaky thonaw kya Paul nynh Korin khriccaawbuu hae ryte a kyngkunaw hae kha ho zah, pawtemou a sarya vae hae ze thawte a pe hae cipaw kha a ccaesahpya hae. Tuh-e nynh ngaesikunaw te ccawkuthuinaw a poukhaenaw liate a lungtuanaw kha mah a ho. Tukoute Judea ram e Khriccaaw hae hanlan thinlung ccaccing te a bawmbua nawlan hae khriccaawbuu kalan thawccinaw a ngia. Athangnaw byaria hae kya Korin khriccaawbuu lungkhu umpaw ccungccaw beihtaraw nynh kaemaw hynh nynh ahmepaw zuitu kae thua zah Paul tuh lingthya nynh athua cite a hotu hae kha ei hae zah Paul nynh zuitu ccaccing athuanaw kha a langsaku.
1
Beihlangnaw
Pachia rynaw liate Jesu Khri Locceihtu athuapaw Paul te kae unopaw Timote nynh Korin khua kya umpaw Pachia khriccaawbuu te Akhai ram balyn kya umpaw mithyaa hae balyn kalan ccaw kae ky oh:Ref 1.1: Loc 18.1
Ah Paaw Pachia te Bawipaw Jesu Khri kya-e thawccinaw te daenaw tuh nae kya la um sah!
 
Teingnaw koute Paul nynh Luungnaw
Ngaethyaumsahnaw Paaw te ngaengansahnaw balyn Pachia athuapaw, ah Bawipaw Jesu Khri a Paaw, Pachia tuh thehoyte um sah. Pachia nynh aening ah ngae oun ngansahnawpaw, ngaengansahnaw khate vawsawnaw aphuinphuin a tung hae paw kha aening nynh ngaengannaw ah pya kho nawlan oh, ah vawsawnaw balyn kya aening kha ngaengannaw oun pya. Pawccecize aening hanlan Khri teingnaw tuh myarya alung hawte, Khri liate aening ngaengannaw mah myarya alung. Vawsawnaw kae teing ze, tuh-e tuh nanning ngaengannaw te khumnaw hanlan nynh thua; kaening nynh ngaengannaw kae mue ze, tuh-e tuh nanning ngaengannaw hanlan thua zah, tuh-e ngaengannaw tuh kaening kae teingpaw vawsawnaw phuin kha phang ngaesang kho nawlan thawzung ae muesah oh paw nynh thua. Nanning hanlan kaening ngaehoinaw tuh tynkaring; pawccecize nanning tuh kaening teingnaw a neethungkuh bua hae paw na thua oh hawte, kaening ngaengannaw mah a neethungkuh bua hae paw nynh na thua oh cipaw kae ny.
Uteno hae, Asia ram kya kae teingpaw vawsawnaw kha ny leite na um lan oh paw kae ry khyh; pawccecize kae taening kho leipaw vawsawnaw kha thawmawte kae teing keiccuze hiin lante sanmah kae tuakuh vae khyh.Ref 1.8: 1Ko 15.32 Kaemaw te kaemaw kha doliaku leite, chinaw kyate a thoosahpaw Pachia kha kae doliaku nawlan, kaening tuh chi lan byapae vae paw nynh kae thua cite kae tuaku. 10 Pachia nynh kaening kha ri lan umpaw chinaw kyate oun luesah zah malang mah oun luesah cih; amaw nynh bua oun luesah ung cih cite a tungvaw kya ngaehoinaw kae hoi. 11 Ccungccaw patae nynh saw a sangnaw hae liate kae ccoupaw hythuanaw hanlan, ccungccaw patae nynh kaening ccelang lungtuabya a ho nawlan hae, nanning nynh mah sawsangnaw te nae bawm oh.
Paul Khuaccongnaw Ccyh Nuenaw
12 Pawccecize kaening kae pookunaw tuh e hynh nynh thua: Pynsaw hawnaw te thua leite Pachia thawccinaw liate, Pachia nynh oun pyapaw lungthyaanaw te thyaararih lante laephi kya kae hiin cipaw tuh kaemaw nykunawpaw thinlung nynh ccaekia a khan—nae kyakhe tuhcite nynh houh kae hiin. 13 Pawccecize na ria kho oh zah na thaethya oh paw laelan, ccangpaw pawpaw mah nae kalan kae zei khyh; phe thang lan na thaethya cih oh cite ka ngaehoi. 14 Nanning nynh kaening hynh abang-asung nae ny vae oh hawte, Bawipaw Jesu Nin kya nanning tuh kaening kae pookunaw na thua oh hawte, kaening mah nanning na pookunaw oh paw nynh kae thua.
15 E hynh phe ria lan ka ny keiccuze, hythuanaw vae ning na ccou ccaw oh cite nae kalan thuaty lan ka ry; 16 Mesidonia ram lang ka cceihpaw te kae teepaw cih, te Mesidonia ram kyate nae kalan bua kae ki cih zah nanning nynh Judea ram lang khua ka ccongnaw kya nae saw cih oh.Ref 1.16: Loc 19.21 17 Tuhte ka paccynku lya kha zawphalae lante tou ka paccyn? Ka paccynkupaw kha “Athua, athua” cite thuasah, “Thua khyh, thua khyh” cite thuasah hung ho lan cite ccungccaw lante tou ka paccynku? 18 Pachia tuh a lungzipaw ccaccing athua thyhawte, nae kya kae hopaw bya tuh “Athua te Thua khyh” cite apydekuhpaw thua khyh. 19 Pawccecize Silvanas, Timote te kae nynh nae kya kae hopaw Pachia Ccapaw Jesu Khri tuh “Athua te Thua khyh” apydekuhpaw thua khyh; amaw kya tuh “Athua” ci mawcci.Ref 1.19: Loc 18.5 20 Pawccecize amaw kya Pachia kya-e byakinkupaw balyn tuh “Athua” ci thua zah, hynh-e keiccuze Jesu Khri liate Pachia phu-enaw hanlan aening nynh “Amen,” ah ci oh. 21 Nanning te kaening kha Khri kya oun tynsah zah chitui oun thuhpaw tuh Pachia nynh thua. 22 Tuh-e Pachia nynh aening kha tazeih oun khia zah, ah thinlung kya a Muisaw kha aamahkhan lante phe oun pya vae.
23 Nanning kha ngaethya kae umsah oh pawte nynh Korin khua lang ka ccia vae khyh cipaw Pachia kha ccaekia lang nungkute ka ho. 24 Kaening nynh nae zynnaw kha kae uk khyh oh, nae lungtuanaw elang naemaw ryte ryalahkheihtu hae nynh kae thua; pawccecize nanning tuh zynnaw kya tynkaring lan na thadyn oh.