5
Ohhuakunaw nynh Khriccaawbuu Thusah
1 Nanning laku ohhuakunaw a um cite ka thae, tuhcihawpaw ohhuakunaw tuh lawki hae kya heize thae boi lan um khyh; ccungccaw lu kheit nynh a paaw zu kha palei a ikhae cite ka thae.Ref 5.1: Deu 22.30
2 Nanning tuh na tansakuh oh! Khate a cyihpaw ccungccaw kha nae kyate ccaring dee athua nawlan nanning tuh rawkhui lan ccan khyh tou?
3 Pawccecize kae tuh pynsaw lante nanning ryte ka um khyh zemah muisaw lante ka um; nae kya ka um buapaw hawte tuhcihawpaw a cyihpaw ccungccaw kha ah Bawipaw Jesu min te bya phe ka pia vae.
4 Na pumku vae oh ze, ah Bawipaw Jesu thungnaw liate ka muisaw tuh nae kya umbua zah,
5 tuh-e paw a muisaw tuh Bawipaw Jesu Nin kya khum a thua nawlan, a pynsaw kha ro khylan amaw tuh Satan kalan na ap cih oh.
6 Nanning na pooku oh paw tuh hoy khyh. Ccapyhtaripaw ransi nynh vaepoi khaleih kha a thosah cipaw na nyh khyh oh tou?Ref 5.6: Gal 5.9
7 Nanning tuh ransi phing leipaw na thua oh hawte, athawpaw vaepoi na thua nawlan oh, arynpaw ransi kha marya cciccae oh. Pawccecize aening Kawtaw Poi tuutaw athuapaw Khri tuh aening hanlan silawnawpaw lang chia athua vae.Ref 5.7: Exo 12.5
8 Tukeiccuze arynpaw ransi, thyaruhnaw te hoyleinaw ransi khate thua leite, ransi phing leipaw sanlou athuapaw thinlung athyaapaw te byaccing khate poi kha tua oh sih.Ref 5.8: Exo 13.7; Deu 16.3
Ohhuakunaw kha Byapia Thua Cih
9 A ohhuakuh hae paw ryte na mungku khyh nawlan oh, ka ccaky kya nae kalan phe kae zei vae.
10 Tuhzemah hynh-e laephi kya-e a ohhuakuh hae paw, a karankuh hae paw, ccungccaw a luade hae paw te zohtuh beik hae paw ryte kharouh mungkuh nan oh cite ka ho rypaw thua khyh; tuhte ka ho lanze nanning tuh laephi kyate na pou oh aho vae cih.
11 Thuasalama uno cite ko athua pite a ohhuakuhpaw, a karankuhpaw, zohtuh beikpaw, ccungccaw thethya hopaw, aruipaw, ccungccaw a luadepaw ryte mungkuh nan oh, ae mah aekheih nan oh cite atu nae kalan ccaw kae zei.
12 Atolang e ccungccaw hae kha byapia lanpaw tuh kae nynh pawmou ka se? Alungkhu e ccungccaw hae kha nanning nynh byapia lanpaw thua khyh tou?
13 Atolang e ccungccaw hae kha Pachia nynh bya a pia cih hae. Ccathyaa nynh, “Ccungccaw hoyleipaw kha nae kyate ccaring dee oh,” a ci.Ref 5.13: Deu 13.5, 17.7 (LXX)