2
Khri Khiadenaw Kong Phunghonaw
Uteno hae, nae kalan kae thua lyaze Pachia byakhupaw kha myarya byahothyanaw te hawnaw khate kae hopah khyh oh. Pawccecize Jesu Khri te vaelantung kya a khiadenaw hae kong laelan, nanning kya pawsang mah ny lei lante bya ka paeku vae. Nae kalan kae thua lya kha nyaanaw, rinaw te thyngkunaw te nynh kae thua.Ref 2.3: Loc 18.9 Bya ka hopaw te phung ka hopaw kha ccungccaw hawnaw te asekuhpaw soihnawpaw bya thua leite, Muisaw te thungnaw langsakunaw nynh thua; tuhteze nynh nae zynnaw tuh ccungccaw hawnaw kya tyn leite, Pachia thungnaw kya atyn cih.
Pachia Hawnaw
Tuhzemah piccan athua vae hae paw kya tuh hawnaw bya kha kae ho; thuasalama hynh-e she e hawnaw kha thua khyh, a zo cih hae paw hynh-e she e uktu hae hawnaw kha mah thua khyh. Thuasalama Pachia hawnaw byakhupaw kha nynh kae ho, tuh-e tuh laephi a um mawze Pachia nynh aening phu-enaw hanlan a paccyn ty vae paw thuruh athuapaw hawnaw kha nynh thua. Hynh-e she e uktu hae hum nynh sanmah tuh-e hawnaw tuh nyh khyh hae; a la ny hae ze, a phu-epaw Bawipaw kha vaelantung kya a khiade cih lei hae paw. Thuasalama Ccathyaa kyaze,
“Pachia nynh amaw a sungsah
hae paw hanlan a paccynpaw
uccaw hae kha mit nynh
muih boi khyh,
nakaring nynh thae boi khyh,
ccungccaw thinlung nynh mah
tua boi khyh,”
cite azeiku hawte nynh thua.Ref 2.9: Isa 64.4 10 Thuasalama Pachia nynh tuh-e hae tuh Muisaw liate aening kalan phe oun phypya vae, pawccecize Muisaw nynh tuh pawpaw balyn kha marya a zah, Pachia kya-e akhupaw uccaw kha heize phe a zah. 11 Pawccecize ccungccaw uccaw hae kha ccungccaw lungkhu umpaw ccungccaw muisaw laelan hum nynh mou a nyh? Tuhawte Pachia uccaw hae kha Pachia Muisaw laelan hum nynh san nyh khyh. 12 Atu aening nynh laephi muisaw kha ah mue khyh oh, Pachia nynh aening oun pyapaw lasung hae kha ah thaethya nawlan oh, Pachia kyate yn thuapaw Muisaw kha nynh ah mue oh. 13 E uccaw hae konglang hynh ccungccaw hawnaw nynh ccangpyapaw bya te kae ho khyh, Thyaa Muisaw nynh ccangpyapaw bya te kae ho zah, Muisaw a hoipaw ccungccaw hae kyakhe muisaw te asekuhpaw byaccing hae kha nynh kae ccaesahpya hae.
14 Muisaw a hoi leipaw ccungccaw nynh tuh Pachia Muisaw kya-e lasung hae kha mue khyh, pawccecize tuh-e lasung hae tuh aning hanlan ngaeenaw nynh thua. Tuh-e lasung hae tuh muisaw lante kyalya nythya athua keiccuze aning nynh nyh kho khyh. 15 Muisaw a hoipaw ccungccaw nynh tuh pawpaw balyn kha pong a nythya, tuhzemah hum nynh sanmah amaw kha akaw-aleih byakhia kho khyh. 16 Ccathyaa nynh,
“Bawipaw kha thuihei kho nawlan,
Bawipaw thinlung kha
hummou a nyh?” a ci.
Thuasalama aening tuh Khri thinlung kha ah hoi oh.Ref 2.16: Isa 40.13 (LXX)