12
Muisaw Lasung hae
1 Uteno hae, nanning nynh muisaw lasung hae konglang ny leite na um lan oh paw ka ry khyh.
2 Lawki lang na tang lya oh tuh, nanning kha ae la soih oh zah byahothya leipaw zohtuh hae kalan ae la thuakhae sei oh paw kha na ny oh.
3 Tukeiccuze Pachia Muisaw liate a hopaw ccungccaw nynh tuh, “Jesu tuh thyalawnaw tung sah!” cite ho boi khyh, te Thyaa Muisaw liate holeite hum nynh sanmah, “Jesu tuh Bawipaw nynh thua,” cite ho kho khyh cipaw kha thaethya oh ci ka ry.
4 Lasung tuh aphuinphuin a um zemah Muisaw ccangkheit rou nynh a um.Ref 12.4-11: Rom 12.6-8
5 Pachia ryalawnaw tuh aphuinphuin a um zemah Bawipaw lu kheit rou nynh a um.
6 Ryalawpaw tuh aphuinphuin a um zemah ccungccaw miakaw kya atyn-are ryalahpaw Pachia lu kheit rou nynh a um.
7 Ccungccaw balyn hoynaw hanlan milu raveih kya Muisaw langkunaw kaw kha pya athua.
8 Muisaw liate ccungccaw lu kheit kha hawnaw byahothyanaw pya zah, tuh-e Muisaw liate mingccangpaw kha nynaw byakhupaw hothyanaw kha a pya.
9 Tuh-e Muisaw liate mingccangpaw kha zynnaw pya zah, tuh-e Muisaw liate mingccangpaw kha ngeccih dansahnaw lasung kha a pya.
10 Mingccangpaw kha ngaeangnaw rae khonaw pya zah, mingccangpaw kha profehbya ho khonaw a pya, mingccangpaw kha muisaw hae phiathyanaw a pya; mingccangpaw kha bya hae aphuinphuin hothyanaw a pya, mingccangpaw kha bya hae asuilan ccaesah thyanaw a pya.
11 Hynh-e hae balyn hynh tuh-e Muisaw ccangkheit nynh ryalawpaw thua zah, a ry hawte milu raveih kha ccarou a neethung hae.
Pyn kya-e hae
12 Pyn pynkheit kyakhe pyn kya-e hae patae um hae zah, pyn kya-e hae balyn tuh alung hae zemah pyn pynkheit athua hae hawte, Khri mah tuhawte nynh athua.Ref 12.12: Rom 12.4-5
13 Pawccecize Judah thuasah, Grik thuasah, see thuasah, aluepaw ccungccaw thuasah, aening balyn tuh Muisaw ccangkheit liate pyn pynkheit lungkhu lang baptisma insah ah thua oh; ah balynte Muisaw ccangkheit kha nia lan pya ah thua oh.
14 Pawccecize pyn tuh pyn kya-e ccangkheit kyalya um leite, aranphei patae a um.
15 Ccu nynh, “Kae tuh kuih ka thua khyh keiccuze pyn te kae sekuh khyh,” a ci lanze, tuhte a cinaw nynh pyn kya-e athuanaw kha zyasah lae lan khyh.
16 Nakua nynh, “Kae tuh mit ka thua khyh keiccuze pyn te kae sekuh khyh,” a ci lanze, tuhte a cinaw nynh pyn kya-e athuanaw kha zyasah lae lan khyh.
17 Pyn abalyn mawte mit a la thua lanze, pawkyamou thaenaw tuh a um vae cih? Pyn abalyn mawte nakua a la thua lanze, paw kyate mou amyn tuh a thae vae cih?
18 Thuasalama atu tuh Pachia nynh amaw a lungry hawte pyn kya-e hae miakaw kha mih umnaw raveih kyakhe pong a nung hae.
19 Minmin balyn tuh pyn kya-e ccangkheit kyalya a la thua hae ze, pyn tuh pawkyamou a um vae cih?
20 Atu tuh pyn kya-e hae tuh patae a um hae zemah pyn tuh pynkheit rou nynh a um.
21 Mit nynh kuih kha, “Nang tuh kae peki khyh,” ci kho lan khyh. Tuhawte lu nynh ccu kha, “Nang tuh kae peki khyh,” ci kho lan khyh.
22 Thanccingte ho lanze, thawzya huapaw alopaw pyn kya-e hae tuh houh ahoboupaw nynh thua hae.
23 Pyn kyaze sawtua lan eih um khyh cite ah tua oh paw aranphei kha sawtuanaw houh ah pya oh; ah pyn kyaze dohoy leipaw kha houh puithya lan ah ccaan oh.
24 Ah pyn kyaze dohoypaw kha tuh ccaan ho vae khyh. Thuasalama pyn kyaze sawtuanaw aboupaw aranphei kha sawtuanaw alehua pyate Pachia nynh pyn kha a rae;
25 pyn lungkhu kya phiakunaw um leite, aranphei hae nynh ccangkheit te ccangkheit alokuhpaw do-oihkunaw a hoi nawlan hae nynh tuhte a rae.
26 Pyn kya-e ccangkheit nynh a teing ze, mih balyn mawte a teingbua hae; pyn kya-e ccangkheit tuh sawtuanaw a ccou ze, mih balyn mawte mih lungtuabua.
27 Atu nanning tuh Khri pyn na thua oh zah, lu raveihte tuh-e pyn kya-e hae nynh na thua oh.
28 Pachia nynh masaty locceihtu hae, ccangningnaw profeh hae, ccangthumnaw ccangpahtu hae, tukoute ngaeangnaw a rae hae paw, tukoute ngeccih dansahnaw lasung a mue hae paw, ming hae a bawm hae paw, ming hae a ukthya hae paw, bya aphuinphuin a hothya hae paw kha khriccaawbuu kya ryalaw a pya hae.Ref 12.28: Efe 4.11
29 Mih balynte locceihtu athua hae tou? Mih balynte profeh athua hae tou? Mih balynte ccangpahtu athua hae tou? Mih balynte ngaeangnaw a rae hae tou?
30 Mih balynte ngeccih dansahnaw lasung a mue hae tou? Mih balynte bya aphuinphuin a ho hae tou? Mih balynte bya a leih hae tou?
31 Thuasalama ahoy huapaw lasung hae kha mue lan zuakuh oh. Te ahoy huaccepaw laanpi kha kae muihsah ung cih oh.