11
1 Kae nynh Khri kha ka dosuinku hawte nanning mah kae hynh oun dosuinkuh oh.Ref 11.1: 1Ko 4.16; Phil 3.17
Lu Bongkunaw
2 Uteno hae, nanning nynh pawpaw kya balyn kae kha nae liathui oh zah, nae kalan kae ap oh phungzae hae thyhte na zui oh keiccuze kae thehoysah oh.
3 Thuasalama Khri tuh pise miakaw lu thua zah, vawpaw tuh a zu lu nynh thua cipaw te Pachia tuh Khri lu nynh thua cipaw kha kae nysah ry oh.
4 Pise lu kheit nynh a lu bongkute sawsang ze thuasah, profehbya a ho ze thuasah amaw a lu kha thethyasahpaw nynh thua.
5 Thuasalama nopi lu kheit nynh a lu bongku leite sawsang ze thuasah, profehbya a ho ze thuasah, amaw a lu kha thethyasahpaw nynh thua; pawccecize tuhte a cyi ze, a lu-opaw te nynh aloku.
6 Pawccecize nopi nynh a lu kha a bongku khyh ze, a sang ngokuh sah; nopi lu kheit hanlan sang ngokupaw, lu-okupaw tuh maethya lan um ze, a lu kha bongkuh sah.
7 Pise tuh Pachia muinsan te a phu-enaw athua keiccuze a lu bongku lan ccan khyh. Thuasalama nopi tuh pise phu-enaw nynh thua.Ref 11.7: Gen 1.26-27
8 Pawccecize pise tuh nopi kyate raepaw thua khyh, nopi tuh pise kyate raepaw nynh thua.Ref 11.8-9: Gen 2.18-23
9 Pise tuh nopi hanlan raepaw thua khyh, nopi tuh pise hanlan raepaw nynh thua.
10 Tukeiccuze vaaw hae keiccuze nopi nynh a lu vawlan kawhoinaw syntawnaw a hoi aho.
11 Tuhzemah Bawipaw kya nopi leite pise um khyh, pise leite nopi mah um khyh.
12 Pawccecize nopi tuh pise kyate yn thua hawte, pise mah nopi liate nynh yn thua; thuasalama pawpaw balyn tuh Pachia kyate nynh oun thua hae.
13 Naemaw te naemaw byapiatua oh: nopi nynh lu bongku leite Pachia kalan sawsangpaw tuh angaekuh tou, ngaekuh khyh tou?
14 Pise nynh a sang kha myarya sae lan a hangku ze, amaw hanlan maethyaum cipaw laephi phung nynh ae ccangpah khyh oh tou?
15 Thuasalama nopi nynh a sang kha myarya sae lan a hangku ze, amaw hanlan phu-enaw nynh thua. Pawccecize a sang tuh amaw bongku nawlan pyapaw nynh thua.
16 Thuasalama lukhakheit nynh a ei ry ze, tuhcihawpaw phung ah hoi khyh oh, Pachia khriccaawbuu hae mah hoi khyh hae.
Bawipaw Zerya
(Mat 26.26-29; Mar 14.22-25; Luk 22.14-23)
17 Akawlan e thuiheinaw kya nanning kha kae thehoysah khyh oh, pawccecize nanning nynh na sueluaku vae oh ze, ahoypaw hanlan thua leite athahpaw hanlan nynh athuahua.
18 Pawccecize masaty lanze, khriccaawbuu buukheit lante na sueluaku vae oh ze, nae laku phiakunaw a um cite ka thae; tuh-e tuh abang-asung ka zyn.
19 Pawccecize nanning kya ahmepaw ccungccaw hae kha langsaku khylan, nae kya buu phiakunaw mah a um cih.
20 Nanning nynh he na sueluaku vae oh ze, tuh-e tuh Bawipaw zerya mang khylan na sueluaku oh paw thua ccaccing khyh.
21 Pawccecize ae ccyh he thua te, nanning lu raveih nynh naemaw looh kha lawkute na ae oh keiccuze lu kheit tuh a vuelaw zah mingccangpaw tuh a rui.
22 Pawmou na cyi oh? Aenaw lanpaw te nianaw lanpaw inn na hoi khyh oh tou? Tuhkhyhze Pachia khriccaawbuu kha na dothatheih oh zah ryachi hae kha maethya na bong oh tou? Pawte kae hopah cih oh? Hynh-e kya kae thehoysah cih oh tou? Kae thehoysah lan khyh oh.
23 Pawccecize nae kalan kae ccangpya oh paw hynh Bawipaw kyate ka muepaw nynh thua: Bawipaw Jesu nynh amaw a phee khuazi hae khe sanlou kha lah zah,
24 lungtuabya a ho koute, sanlou kha eih zah, “Hynh-e hynh ka pyn nynh thua, nanning hanlan nynh thua. Kamaw liathui nawlan ae oh,” a ci.
25 Tuhawte zerya a mang kou hae te, banang kha mah lah zah, “Hynh-e banang tuh ka chii kya atynpaw byakin thawpaw nynh thua. E hynh na nia takyh oh te, kamaw liathui nawlan neih oh,” a ci.Ref 11.25: Exo 24.6-8; Jer 31.31-34
26 Pawccecize nanning nynh hynh-e sanlou na ae takyh oh te hynh-e banang na nia takyh vae oh ze, Bawipaw a chinaw kong kha amaw yn thua mawlaezung na phy oh paw nynh thua.
27 Tukeiccuze humhung zemah Bawipaw sanlou te banang kha angaekuh lei lante ae zah a neihpaw miakaw tuh Bawipaw a pyn te a chii kya seinaw a raepaw nynh thua.
28 Tukeiccuze naemaw te naemaw hoyte tuakuh ty oh, tukoute sanlou kha ae oh lah banang kha neih oh.
29 Pawccecize Bawipaw pyn asuilan kha nythya leite, ae zah a neihpaw miakaw tuh a tungvaw byapiaku khylan ae zah a neihpaw nynh thua.
30 Hynh-e keiccuze nanning lakuze ccungccaw patae tuh mih thawzya zah a ccih hae, abang tuh a chih hae.
31 Pawccecize ahmaw te ahmaw kha bya ah piaku oh ze, aening kha bya oun pia vae lan khyh hae.
32 Thuasalama Bawipaw nynh aening kha bya he oun pia te, aening tuh laephi ccungccaw hae ryte seibe ah thua khyh nawlan oh, oun thuiheipaw nynh thua.
33 Tukeiccuze ka uteno hae, ae lan na sueluaku vae oh ze, lu kheit te lu kheit la ngawkuh bua oh.
34 Nae vuelaw ze innvaw kya aesya oh, tuhteze nynh he na pumkuh oh te, byapianaw na ing lan khyh oh. Ccangpaw konglang tuh kamaw kae thua te, kae ccangpah cih oh.