10
Zohtuh kha Raeringkuh Oh
Uteno hae, ah minpaaw hae kya acyihkuhpaw kha ny leite na um lan oh paw ka ry khyh; ah minpaaw hae balyn tuh maeking kaw la um hae zah mih balynte rili kha po la zua hae,Ref 10.1: Exo 13.21-22, 14.22-29 maeking kya te rili kyakhe mih balynte Moses kya baptisma a in hae, mih balynte phuin kheitpaw muisaw looh kha la ae hae zah,Ref 10.3: Exo 16.35 mih balynte phuin kheitpaw muisaw tui kha a la neih hae. Pawccecize mih nulang te azuikuhpaw muisaw lungpi kyate a poupaw muisaw tui kha nynh a nia hae, tuh-e lungpi tuh Khri nynh thua.Ref 10.4: Exo 17.6; Nam 20.11 Thuasalama minmin kyaze alunghua tungvaw kya Pachia a lungrythua khyh, tukeiccuze minmin tuh ramkaw kya a chih hae.Ref 10.5: Nam 14.29-30
Minmin nynh ahoy leipaw uccaw hae kha a duaa hae hawte aening nynh ah duaa khyh nawlan oh, atu hynh-e hae tuh aening hanlan dosuinku lanpaw nynh thua hae.Ref 10.6: Nam 11.4 Ccathyaa kyaze, “Ccungccaw hae tuh ae khylan te nia khylan dahung hae zah zue khylan bua a thokuh hae,” cite azeiku hawte, nanning tuh minmin abang hawte zohtuh beiktu hae thua nan oh.Ref 10.7: Exo 32.6 Minmin abang tuh ohhuakunaw rae hae zah nin kheit lungkhu thong kuin thong thum a chi hae hawte, aening tuh ohhuakunaw rae nan oh sih.Ref 10.8: Nam 25.1-18 Minmin abang nynh Pachia kha syntawtua hae zah hupaw nynh a ro hae hawte, aening tuh Khri kha syntawtua nan oh sih.Ref 10.9: Nam 21.5-6 10 Minmin abang nynh ccohkuh hae zah a rohtupaw nynh a ro hae hawte, nanning tuh ccohkuh bua nan oh.Ref 10.10: Nam 16.41-49 11 Hynh-e hae balyn hynh dosuinkupaw lang a tang nawlan minmin kya acyikuh. She athangnaw nynh a thuanuapaw aening thuiheinaw hanlan nynh tuh-e hae tuh zei athua. 12 Tukeiccuze ka thadyn cite a tuakuhpaw nynh tuh a khuliaku khyh nawlan raeringkuh sah. 13 Ccungccaw miakaw nynh a tung hae paw syntawnaw rou kha nynh na tung oh. Pachia tuh a lungzipaw thua zah, na taening lei oh paw syntawnaw kha nae kya thuasah lan khyh; syntawnaw kha na teing kho nawlan oh, syntawnaw ryte luenawpaw laanpi kha mah ae raepah cih oh.
14 Tukeiccuze ka sungsah hae, zohtuh beiknaw kha ccuetaw oh. 15 Ahawpaw ccungccaw hae kya ho hawte nynh kae hopya oh; ka hopaw hynh nanning nynh la tuasekuh oh. 16 Hythua ah pya oh paw hythuanaw banang tuh Khri chiise kha ah neethungku oh paw thua khyh tou? Ah iathungku oh paw sanlou tuh Khri pyn kha ah neethungku oh paw thua khyh tou?Ref 10.16: Mat 26.26-28; Mar 14.22-24; Luk 22.19-20 17 Sanlou phe kheit kyalya athua keiccuze aening tuh patae ah ci oh zemah pyn pynkheit nynh ah thua oh; pawccecize aening balyn tuh tuh-e sanlou phe kheitpaw kha nynh ah mangkheih oh. 18 Israel hae kha dotua oh; silawnaw hae paw a ae hae paw tuh silawhang kya ryalahbua hae paw thua khyh hae tou?Ref 10.18: Lev 7.6 19 Tuhteze ka ho rypaw tuh pawmou? Zohtuh hae kalan silawnawpaw looh thuasah, tuh-e zohtuh thuasah abyapipaw nynh thua ka ci tou? 20 Thuasalama lawki hae nynh silawnaw hae paw tuh Pachia kalan thua leite, raerangsaro hae kalan nynh si a law hae. Raerangsaro hae ryte vaeccawtang hae paw lang kae tangsah ry khyh oh.Ref 10.20: Deu 32.17 (LXX) 21 Bawipaw banang te raerangsaro hae banang kha na neihkheih kho khyh oh; Bawipaw ccaboi te raerangsaro hae ccaboi kha na mangkheih kho khyh oh. 22 Aening nynh Bawipaw kha eiungnaw ah hoisah cih oh tou? Aening tuh aning laeze ah thawsaehua tou?
Pachia Phu-e nawlan Cyih
23 “Pawpaw balyn kae cyi kho,” a ci hae, thuasalama pawpaw balyn hynh marya athanepaw thua khyh. “Pawpaw balyn kae cyi kho,” a ci hae, thuasalama pawpaw balyn hynh bawmtu thua khyh hae.Ref 10.23: 1Ko 6.12 24 Namaw hanlan thanenaw kha ccungkuh nan; ming hae hanlan thanenaw kha ccungtua. 25 Ahmaw nykunaw thinlung keiccu byakhia leite, saw zuanaw kya a zua hae paw miakaw kha ae oh; 26 pawccecize, Ccathyaa nynh, “laephi te a lungkhu umpaw balyn tuh Bawipaw kya-e nynh thua,” a ci.Ref 10.26: Sam 24.1 27 A zyn leipaw lukhakheit nynh aepaw ae kopah oh zah ccia lan na ry oh ze, ahmaw nykunaw thinlung keiccu byakhia leite, nae malang ae nyapya hae paw miakaw kha ae oh. 28 Thuasalama lukhakheit nynh, “E tuh zohtuh hae kalan pyapaw nynh thua,” cite ae hopya oh ze, khate ae hopahpaw keiccu thuasah, ahmaw nykunaw thinlung keiccu thuasah tuh-e tuh ae nan oh. 29 Ahmaw nykunaw thinlung ka cipaw hynh namaw thinlung kha thua leite, mingccang hae thinlung kha nynh ka ho ry. Pawccemou mingccangpaw kya-e nykunaw thinlung nynh kae ka luenaw kha bya yn pia lanpaw tuh? 30 Lungtuabya hote ka ae lanze, lungtuabya hote ka aepaw tuh-e looh keiccuze pawccemou kae tuh thethya yn ho hae?
31 Tukeiccuze na ae oh zemah thuasah, na nia oh zemah thuasah, pawpaw na cyi oh zemah, pawpaw balyn tuh Pachia phu-enaw hanlan cyih oh. 32 Judah hae, Grik hae te Pachia khriccaawbuu kha vawsawnaw pya nan oh. 33 Ccungccaw hae nynh khumnaw a muebua hae ccaw cite, kamaw elang thanenaw ccungku leite, ccungccaw patae elang thanenaw ka ccung zah, ka cyipaw miakaw kya ccungccaw balyn kha lunghoysah khylan ka zuaku hawte nanning mah cyihbua oh.